52-097/2021

ALMANNAMÁLARÁÐIÐ
Eirargarður 2 • FO-100 Tórshavn
Tel: +298 304000 • Fax: +298 304045 • E-mail: amr@amr.fo
Løgtingið
Tinghúsvegur 1-3
100 Tórshavn
13. desember 2021
Mál: 21/21985
Viðgjørt: KÁ
Nr. 52-097/2021
Svar
uppá
skrivligan fyrispurning nr. 52-097/2021 eftir tingskipanini § 52a til Elsebeth Mercedis
Gunnleygsdóttur, landsstýrismann við almannamálum, frá Eyðgunn Samuelsen,
løgtingsmanni, um Eirargarð
Spurningar:
1. Nær verður farið undir at umvæla/dagføra Eirargarð 16?
2. Hvat fevnir arbeiðið um?
3. Nær verður arbeiðið væntandi liðugt?
4.
Svar:
Spurningarnir verða svaraðir undir einum.
Tá landsstýrismaðurin tók við, varð hann kunnaður um støðuna á fleiri av verandi bústovnum,
sum eru í ringum standi. Ein lýsing, sum er gjørd av stovnunum fyri nøkrum árum síðani vísir
greitt, at okkurt munagott eigur at gerast fyri at betra um umstøðurnar. Talan er í nógvum førum
um gomul sethús, sum ikki eru hildin við líka og tí krevja ábøtur.
Landsstýrismaðurin valdi tí at fara til verka beinanvegin fyri at bøta um støðuna, og í 2020
samtykti Løgtingið løgtingslóg nr. 85 frá 7. juni 2020 um dagføring av vardum bústøðum, sum
heimilar landsstýrismanninum at dagføra verandi bústovnar fyri í alt 33 mió. kr.
Úrslitini byrja nú at síggjast. Úr rúgvuni av smærri verkætlanum, sum eru lidnar síðani
landsstýrismaðurin tók við kunnu nevnast:
• Eirargarður 14, 2, í Havn, sum er total renoveraður,
• Sambýlið á Traðarvegnum í Sandavági, har m.a. kjallarin er umbygdur,

-- 1 of 2 --

ALMANNAMÁLARÁÐIÐ
Síða 2 av 2
• Hóvabrekka á Argjum, har m.a. 8 baðirúm og vátrúm eru dagførd,
• Økisdepilin í Vági (Eiðisgarður), har bygt er eitt dag- og umlættingartilboð,
• Sambýlið á Fugloyarvegnum í Havn, har m.a. tekjan er umvæld,
• Blikagøta í Runavík, har m.a. stakitt og uttanduragoymsla er gjørt.
Farið verður undir at umvæla Eirargarð 16, 1 og 2, í næstum. Arbeiðið byrjar 1. februar 2022.
Tað fevnir um dagføring av 8 skolirúmum/baðirúmum. Í løtuni verður kannað, um til ber at
finna fígging á játtanini við møguligari umraðfesting til at skifta ljós og leggja nýggja
gólválegging. Sambært tíðarætlanini, so verður miðað ímóti, at arbeiðið við skoli-/baðirúm er
liðug 1. apríl 2022.
Aðrar verkætlanir, sum eru farnar ella fara í gongd í komandi tíðum eru m.a.
• Sambýlið við Heyggjar í Havn,
• Sambýlið við Rúnavegin í Runavík,
• Sambýlið við Grønlandsvegin 63 í Havn,
• Sambýlið í Niðaragøtu í Hoyvík.
Tá komið er út í síðstu helvt í 2022, kunnu enn størri úrslit síggjast av, hvat fingist er burturúr.
Í tilgongdini hevur landsstýrismaðurin umhugsað at umraðfesta onkra ætlan, og verður hetta
kannað í løtuni. Í tí sambandi verður helst neyðugt at leingja verandi løgtingslóg, og hækkað
fíggjarkarmin fyri at røkka heilt á mál við tí, sum landsstýrismaðurin hevur sett sær fyri. Hetta
verður tikið upp politiskt í nærmastu framtíð, tá málið er búgvið.
Av størri verkætlanum, sum eru ígongd, er talan um
• Bú- og umlættingarheimið á Kvíggjartúni á Argjum til børn og ung við autismu,
• Sambýli til fólk við menningartarni á Mýrini í Hoyvík,
• Sambýli til fólk við menningartarni og fjølbreki í Reynstúni á Argjum.
Arbeiðið á Kvíggjartúni gongur væl. Jørð- og betongarbeiðið er liðugt og farið er undir sjálva
byggingina. Bygningurin verður liðugur síðst í 2022.
Betongarbeiðið á Mýrini er komið væl áleiðis, og farið verður undir byggingina í næstum.
Sambært tíðarætlanini verður bygningurin liðugur síðst í 2022.
Prosjekteringin á Reynstúni er um at verða liðug og verður arbeiðið boðið út í januar 2022. Um
hálvan februar 2022 verður lisitatión, og tá verður kostnaðurin kendur. Fylgjandi verður
lógaruppskot lagt fyri Løgtingið. Bygningurin verður sambært tíðarætlanini liðugur síðst í
2023.
Tórshavn, 13. desember 2021
Elsebeth Mercedis Gunnleygsdóttur
landsstýrismaður

-- 2 of 2 --

Skrivligur fyrispurningur
eftir § 52a í Tingskipanini
Spyrjari: Eyðgunn Samuelsen, løgtingsmaður
Svarari: Elsebeth Mercedis Gunnleygsdóttur, landsstýrismaður í almannamálum
Evni: Eirargarður
Spurningar:
1. Nær verður farið undir at umvæla/dagføra Eirargarð 16?
2. Hvat fevnir arbeiðið um?
3. Nær verður arbeiðið væntandi liðugt?
Viðmerkingar:
Bygningarnir Eirargarður 14 og 16 vórðu bygdir í 1970’unum og eru í ringum standi
og ótíðarhóskandi í dag. Ætlanin hevur verið at gera ymsar ábøtur og dagføringar á
Eirargarði 14 og 16, meðan bíðað varð eftir nýggja heiminum í Reynstúni. Við
lógaruppskoti frá mars 2020 vórðu 30 milliónir settar av til at dagføra fleiri vardar
bústaðir. Eirargarður er ein av hesum. Nú byggingin av heiminum í Reynstúni enn
ikki er byrjað, hevur tað stóran týdning fyri búfólk, starvsfólk og avvarðandi, at
arbeiðið á Eirargarði verður framt.
Fyri at frætta, hvussu langt ætlanin at dagføra og umvæla er komin, verða hesir
spurningar settir.
Á Løgtingi 1. desember 2021
Eyðgunn Samuelsen

-- 1 of 1 --