52-094/2021

F Í G G J A R M Á L A RÁ Ð I Ð
Ministry of Finance
Tinganes • Box 2039 • FO-110 Tórshavn
 (+298) 35 20 20 •  fmr@fmr.fo • www.fmr.fo
Løgtingið
Tinghúsvegur 1-3
Postboks 208
110 Tórshavn
Tórshavn, tann: 06. des. 2021
J. nr.: 21/24251
Svar til fyrispurning nr. 52-094/2021 frá Jóhannisi Joensen, løgtingsmanni, settur Jørgeni
Niclasen, landsstýrismanni í fíggjarmálum, um arbeiðismegina hjá Atlantsflog.
Fyrispurningurin er soljóðandi:
1. Kann landsstýrismaðurin upplýsa, um Atlantic Airways raðfestir bíliga útlendska
arbeiðsmegi fram um royndar føroyskar umsøkjarar?
2. Kann landsstýrismaðurin upplýsa um starvsfólkakostnaðir til flogskiparar og flogternur
frá 1. januar 2021 til 1. oktober 2021 í mun til sama tíðarskeið í 2019?
Svar:
Fíggjarmálaráðið hevur vent sær til felagið við spurninginum omanfyri. Sum kunnugt er
Atlantsflog skipað sum partafelag og rikið við armslongd frá landsstýrinum.
Atlantsflog hevði áðrenn farsóttina fyrireikað seg til nógva flúgving við fýra flogførum og hevði
fingið manningar til øll flogførini. Tíverri hevði Covid-19 farsóttin við sær, at neyðugt varð hjá
flogfelagnum at siga uml. 100 starvsfólkum úr starvi, herav 19 flogmonnum. Eftir heimsfarsóttina
telur flotin trý flogfør, og virksemið er munandi lægri.
Atlantsflog upplýsir, at síðani uppsagnirnar í mai mánaða 2020 eru fleiri flogmenn settir aftur í
starv. Í fjør heyst fingu tveir flogmenn størvini aftur, í november 2021 eru fýra flogmenn settir í
starv, og avtala er gjørd við ein flogmann, sum byrjar aftur í starvi tann 1. januar 2022. Allir hesir
sjey flogmenninir eru millum teir 19 uppsøgdu flogmenninar frá mai 2020, og allir eru settir eftir
sama sáttmála og neyvt sama lønarstigi, sum teir vóru løntir eftir, tá teir vóru sagdir úr starvi. Tí
heldur felagið, at tað er beinleiðis skeivt, tá ført verður fram, at Atlantsflog hevur sett aðrar og
bíligari flogmenn í starv, heldur enn at seta teir uppsøgdu flogmenninar aftur í starv.
Í tíðarskeiðnum 1. januar til 30. september í 2019 vóru starvsfólkakostnaðir til flogskiparar og
flogternur 36,9 mió. kr., og í tíðarskeiðnum 1. januar til 30. september í ár vóru
starvsfólkakostnaðir til flogskiparar og flogternur 24,0 mió. kr. Sama tíðarskeið var framleiðslan
umleið helvtina av framleiðsluni sama tíðarskeið í 2019.
Atlantsflog sigur seg leggja dent á at útbúgva og førleikamenna staðbunda arbeiðsmegi og
samstundis tryggja felagnum burðardygga arbeiðsmegi. Síðani byrjan hevur føroyska flogfelagið

-- 1 of 2 --

F Í G G J A R M Á L A R Á Ð I Ð
Ministry of Finance
2/2
útlært fleiri hundrað fólk sum mekanikarar, flogskiparar, flogternur og hópin av øðrum størvum
innan flogvinnu. Og síðani 2016 hevur felagið bjóða 17 ungum føroyingum góðkenning at flúgva
Airbus A319/320 flogfør, sonevnda type-rating, ið er virðismett til umleið 250.000 kr. fyri hvønn.
Hildið verður eisini á í 2022 at bjóða ungum føroyingum Airbus type-rating, eins og gjørt hevur
verið síðani 2016, undantikið í koronutíðarskeiðnum.
Í løtuni væntar Atlantsflog, at flúgvingin í 2022 fer at nærkast virkseminum í 2019 og eins og
undanfarin ár, ætlar føroyska flogfelagið at seta fríyrkisfólk í størv í fleiri deildum í háárstíð.
Atlantsflog setir fólk í starv eftir galdandi avtalum á arbeiðsmarknaðinum.
Tinganes, 2. desembur 2021
Jørgen Niclasen
landsstýrismaður í fíggjarmálum

-- 2 of 2 --

Skrivligur fyrispurningur
eftir § 52a í Tingskipanini
Spyrjari: Jóhannis Joensen, løgtingsmaður
Svarari: Jørgen Niclasen, landsstýrismaður í fíggjarmálum
Evni: Arbeiðsmegin hjá Atlantsflog
Spurningar:
1. Kann landsstýrismaðurin upplýsa, um Atlantic Airways raðfestir bíliga
útlendska arbeiðsmegi fram um royndar føroyskar umsøkjarar?
2. Kann landsstýrismaðurin upplýsa um starvsfólkakostnaðir til flogskiparar og
flogternur frá 1. januar 2021 til 1. oktober 2021 í mun til sama tíðarskeið í
2019?
Viðmerkingar:
Atlantsflog er okkara tjóðarflogfelag og eitt av stóru arbeiðsplássunum í Føroyum.
Undir koronukreppuni, sum rakti flogvinnuna hart, varð avgjørt at seta 100 mió. kr.
aftrat í almenna flogfelagið við eykajáttan. Hetta fyri at felagið skuldi koma betur
burtur úr kreppuni. Undir viðgerðini í Løgtinginum førdu fleiri tingfólk fram, at
treytin fyri íløguna var, at felagið setti føroysku starvsfólkini aftur í starv, sum høvdu
mist starv sítt orsakað av minkandi flogferðslu. Landsstýrismaðurin varð kunnaður
um hetta ynskið.
Nú er stórur vøkstur í flúgving til Føroya og eisini hjá Atlantsflog. Hetta er gleðiligt.
Røddir eru tó frammi í fjølmiðlunum um, at onnur bíligari arbeiðsmegi verður sett í
størv, sum føroyingar mannaðu frammanundan koronukreppuni, hóast føroysku
starvsfólkini eru tøk.
Atlantsflog hevur altíð verið eitt føroyskt felag, sum vit eru errin av. Einamest tí, at
leiðsla og flestu starvsfólk eru dugnaligir føroyingar við hollum royndum - bæði á
landi og í luftini. Um bílig útlendsk arbeiðsmegi verður raðfest, kann mann ímynda
sær, at tað verður fremmandamál, sum fer at mynda flogtúrin í framtíðini, hóast talan
er um okkara tjóðarflogfelag. Fyri at fáa greiðu á hesum, verður hesin fyrispurningur
settur.
Á Løgtingi, 24. november 2021
Jóhannis Joensen

-- 1 of 1 --