52-060/2021

ALMANNAMÁLARÁÐIÐ
Eirargarður 2 • FO-100 Tórshavn
Tel: +298 304000 • Fax: +298 304045 • E-mail: amr@amr.fo
Løgtingið
Tinghúsvegur 1-3 Postboks 208
110 Tórshavn
29. oktober 2021
Mál: 21/21540
Tygara Skriv:
Viðgjørt:
Nr. 52-060/2021
Svar
uppá
skrivligan fyrispurning nr. 52-060/2021 eftir tingskipanini § 52a til Elsebeth Mercedis
Gunnleygsdóttur, landsstýrismann í almannamálum, frá Rósu Samuelsen,
løgtingsmanni, um rehabilitering og rehabiliteringsdepil
Fyrispurningur er ljóðar soleiðis:
1. Hevur landsstýrismaðurin ætlanir um at seta í verk eina yvirskipaða
rehabiliteringslóg, sum fevnir um allar geirar innan rehabilitering?
2. Arbeiðir landsstýrismaðurin fram ímóti at seta á stovn ein rehabiliteringsdepil sum
eina samskipaða tvørfakliga heildartænastu til kropsliga, sálarliga og sosiala viðgerð?
3. Um ja, nær og hvussu, og um nei, hvørjar eru grundgevingarnar?
4. Er samstarv millum Almannamálaráðið og Heilsumálaráðið um nakrar
framtíðarætlanir fyri rehabilitering?
Svar:
Innleiðandi verður víst til svarið til fyrispurning nr. 52-139/2020, dagfest 17. mai 2021, har
greitt varð frá, at rehabilitering á almannaøkinum – endurmenning - fevnir um menning í
breiðari merking við endamálinum, at viðkomandi borgari aftur fær eitt virkið lív, og við røttum
umstøðum aftur megnar at klára seg sjálvan í størst møguligan mun. Stórur partur av
virkisøkjunum hjá Almannaverkinum eru tí fevnd av økinum rehabilitering. Eitt
høvuðsendamál við løgtingslóg um almannatrygd og tænastur sbrt. § 1, stk. 1 er at menna og
endurmenna.
Til spurning nr. 1
Landsstýrismaðurin hevur síðan hon fekk ábyrgdina av almannaøkinum lagt fyri Løgtingið
lógina um almannatrygd og tænastur, sum er eitt frambrot á almannaøkinum, eisini tá ræður
um endurvenjing og viðlíkahaldsvenjing. Kunngerðir um endurvenjing og viðlíkahalsvenjing,

-- 1 of 2 --

ALMANNAMÁLARÁÐIÐ
síða 2 av 2
sum áseta nærri treytir fyri, nær ein borgari kann fáa endur- og viðlíkahaldsvenjing, eru eisini
gjørdar.
Landsstýrismaðurin hevur eisini raðfest økið fíggjarliga og sett pengar av bæði í inniverandi
ári og í komandi fíggjarlóg. Landsstýrismaðurin raðfestir fyrst og fremst at fáa lógina um
almannatrygd og tænastur at virka fult út.
Til spurning nr. 2 og 3
Landsstýrismaðurin vísir á, at endamálið við løgtingslóg um almannatrygd og tænastum sbrt.
§ 1, stk. 1 er at menna og endurmenna, og at nógv av virkisøkjunum hjá Almannaverkinum eru
beinleiðis endurmennandi í sær sjálvum, ella eru at meta sum ein týðandi partur av einari
endurmenningartilgongd.
Til spurning nr. 4
Tað er eitt gott samstarv ímillum Heilsumálaráðið og Almannamálaráðið um endurvenjingina.
Tær lógarbroytingar og kunngerðir, ið eru settar í gildi um endurvenjingina, eru gjørdar í tøttum
samstarvi ímillum Heilsumálaráðið og Almannamálaráðið. Nevnast kann eisini, at ein
samstarvsavtala er gjørd ímillum Almannaverkið og Sjúkrahúsverkið á økinum.
Landsstýrismenninir á økinum hava í hesum valskeiðinum uppraðfest endurvenjingina
munandi og hava, í tí, sum er eftir av valskeiðnum, ætlanir um framhaldandi at uppraðfesta
endurvenjingina. Landsstýrismaðurin raðfestir fyrst og fremst at fáa lógina um almannatrygd
og tænastur at virka fult út
Tórshavn 29. oktober 2021
Elsebeth Mercedis Gunnleygsdóttur
landsstýrismaður í almannamálum

-- 2 of 2 --

Skrivligur fyrispurningur
eftir § 52a í Tingskipanini
Spyrjari: Rósa Samuelsen, løgtingsmaður
Svarari: Elsebeth Mercedis Gunnleygsdóttur, landsstýrismaður í almannamálum
Evni: Rehabiliteringslóg og rehabiliteringsdepil
Spurningar:
1. Hevur landsstýrismaðurin ætlanir um at seta í verk eina yvirskipaða
rehabiliteringslóg, sum fevnir um allar geirar innan rehabilitering?
2. Arbeiðir landsstýrismaðurin fram ímóti at seta á stovn ein rehabiliteringsdepil
sum eina samskipaða tvørfakliga heildartænastu til kropsliga, sálarliga og
sosiala viðgerð?
3. Um ja, nær og hvussu, og um nei, hvørjar eru grundgevingarnar?
4. Er samstarv millum Almannamálaráðið og Heilsumálaráðið um nakrar
framtíðarætlanir fyri rehabilitering?
Viðmerkingar:
Brúkarin hevur í eitt longri tíðarskeið spurt eftir einum meira skipaðum øki innan
rehabilitering við einum greiðum uppgávu-, ábyrgdar- og heimildarbýti millum
myndugleikar, ráð, stovnar og sjúkrahús.
Økið er í dag ov óskipað og tí er vandi fyri, at borgarar, ið gerast álvarsliga sjúkir ella
skulu til viðlíkahaldsvenjing, detta niðurímillum.
Í svari til fyrispurning frá tingmanninum, Johan Dahl í mai mánað, søgdu bæði
landsstýrismaðurin í heilsumálum og landsstýrismaðurin í almannamálum, at ongar
ítøkiligar ætlanir vóru at skipa rehabilitering í ein depil.
Sambandsflokkurin hevur síðani skipað fyri almennum kjakfundi um tørvin á
rehabilitering í Føroyum, har bæði umboð frá Almannaverkinum og
Sjúkrahúsverkinum vórðu boðin við. Niðurstøðan á fundinum var, at hóast økini tosa
saman og royna at samstarva, so eru karmarnir als ikki nøktandi til endamálið.
Tað eru harumframt avmarkaðir framtíðarmøguleikar fyri menning í verandi skipan.
Rehabilitering fyrigongur bæði á almannaøkinum og heilsuøkinum, og tí hevur
landsstý rismaðurin í heilsumá lum fingið ein fyrispurning um sama evnið.
Tað, at okkara rehabilitering í Føroyum virkar væl og effektivt, hevur sera stóran
týdning fyri øll tey, sum verða rakt av álvarsligari sjúku og tey avvarðandi - sosialt,
fíggjarliga o.a. Tí verður hesin fyrispurningur settur.
Á Løgtingi, 18. oktober 2021
Rósa Samuelsen

-- 1 of 1 --