52-048/2021

U T T A N R Í K I S - O G M E N T A M Á L A R Á Ð I Ð
Tinghúsvegur 5-7 • Postrúm 3279 • FO-110 Tórshavn
 +298 30 65 00 •  ummr@ummr.fo • www.ummr.fo
Løgtingið
Tinghúsvegur 1-3
Postboks 208
110 Tórshavn
Dagfesting: 14. oktober 2021
Tygara ref.:
Máltal.: 21/08502-32
Svar
upp á
fyrispurning frá Djóna Nolsøe Joensen, løgtingsmanni, nr. 52-048/2021 eftir § 52a í
tingskipanini, um námsfrøðilesandi, settur Jenisi av Rana, landsstýrismanni.
Fyrispurningurin er soljóðandi:
1. Hví er námsfrøði ikki raðfest í fíggjarlógaruppskotinum fyri 2022, so ein flokkur aftrat
kann takast inn at lesa námsfrøði á Fróðskaparsetrinum?
2. Hvørjar nærri greiningar skulu gerast innan námsfrøðiútbúgvingina?
3. Ætlar landsstýrismaðurin at raðfesta námsfrøðilesandi, og um so er, nær koma ítøkiligar
broytingar á økinum?
Svar
Til 1: Uttanríkis- og mentamálaráðið metir tað verða týdningarmikið at útbúgva námsfrøðingar,
sum eftir loknan lestur enda í teimum størvum, har starvsfólkatørvurin er størstur.
Sambært temafrágreiðingini Starvsfólk á vælferðarøkinum komandi 10 árini, sum Búskaparráðið
handaði Uttanríkis- og mentamálaráðnum í apríl 2021, eru 63% av starvsfólkunum í
Almannaverkinum námsfrøðingar, meðan bert 37% av starvsfólkunum á dagstovnaøkinum eru
námsfrøðingar. Sambært Dagstovnalógini § 8, stk. 4, skal starvsfólkabýtið á dagstovnunum verða
í minsta lagi 2/3 námsfrøðingar og 1/3 hjálparfólk.
Av hesi orsøk arbeiðir Uttanríkis- og mentamálaráðið við einum uppskoti um at umleggja verandi
námsfrøðiútbúgving, soleiðis at námsfrøðilesandi koma at hava møguleika at velja tvey spor innan
námsfrøði, ávikavist sosialnámsfrøði og dagstovnanámsfrøði. Hesi bæði sporini koma ætlandi at
verða upptikin hálvárliga, har møguleiki verður at velja dagstovnanámsfrøði á sumri og
sosialnámsfrøði á vetri.
Fyrimunurin við at skilja hesar báðar leiðirnar sundur er, at tað við hesum verður tryggjað, at
dagstovnaøkið verður betri mannað av útbúnum starvsfólki. Somuleiðis er eisini tann fyrimunurin,
at dagstovnanámsfrøði og sosialnámsfrøði hvør í sínum lagi kunnu mennast sum hvør sítt yrki,
sum verður snikkað til júst tað starvsøkið, sum útbúgvingin er tilætlað.

-- 1 of 2 --

U T T A N R Í K I S - O G M E N T A M Á L A R Á Ð I Ð
Tinghúsvegur 5-7 • Postrúm 3279 • FO-110 Tórshavn
 +298 30 65 00 •  ummr@ummr.fo • www.ummr.fo Page 2 of 2
Til 2: Uttanríkis- og mentamálaráðið bílegði kanningina frá Búskaparráðnum, sum inniheldur eina
greining av starvsfólkatroti innan námsfrøðiøkið. Tí verður ikki mett neyðugt at gera nærri
greiningar fyri tann yvirornaða trupulleikan, áðrenn farið verður undir at útbúgva fleiri
námsfrøðingar.
Tó verður Fróðskaparsetur Føroya eftirmett í hesum døgum, har serligt atlit verður tikið at
Námsvísindadeildini. Møguliga kunnu úrslitini frá eftirmetingini geva ábendingar um, hvørs
serligar fyriskipanir eiga at verða partur av hesi umlegging av útbúgvingini.
Til 3: Tað verður mett sum ein uppraðfesting, at bygnaðarligu broytingarnar verða framdar.
Vónandi kemur skipanin at virka frá sumri 2022.
Vinarliga
Jenis av Rana
landsstýrismaður

-- 2 of 2 --

Skrivligur fyrispurningur
eftir § 52a í Tingskipanini
Spyrjari: Djóni Nolsøe Joensen, løgtingsmaður
Svarari: Jenis av Rana, landsstýrismaður í uttanríkis- og mentamálum
Evni: Námsfrøðilesandi
Spurningar:
1. Hví er námsfrøði ikki raðfest í fíggjarlógaruppskotinum fyri 2022, so ein
flokkur aftrat kann takast inn at lesa námsfrøði á Fróðskaparsetrinum?
2. Hvørjar nærri greiningar skulu gerast innan námsfrøðiútbúgvingina?
3. Ætlar landsstýrismaðurin at raðfesta námsfrøðilesandi, og um so er, nær koma
ítøkiligar broytingar á økinum?
Viðmerkingar:
Tørvurin á námsfrøðingum er stórur. Føroya Pedagogfelag hevur upplýst, at umleið
300 námsfrøðingar og hjálparfólk longu eru 60 ár ella eldri. Almannaverkið fær brúk
fyri 700 nýggjum starvsfólkum komandi 10 árini, og tí er neyðugt at útbúgva fleiri
námsfrøðingar sum skjótast. Hetta er átrokandi, og landsstýrismaðurin hevur fyrr
upplýst, at tað er partur av ætlanunum hjá honum. Men tá hugt verður í
fíggjarlógaruppskotið fyri 2022 verður bara skrivað, at «nærri greiningar skulu
gerast». Tað er týdningarmikið fyri námsfrøðiliga økið, foreldur og børnini at vita,
nær økið verður raðfest, so vit kunnu fáa skil á starvsfólkatrotið. Tí verður hesin
fyrispurningurin settur.
Á Løgtingi, 04.10.2021
Djóni Nolsøe Joensen

-- 1 of 1 --