52-047/2021

FISKIMÁLARÁÐIÐ
M i n i s t r y o f F i s h e r i e s
Y v i r i v i ð S t r o n d 1 5 • P . O . B o x 3 4 7 • F O - 1 1 0 T ó r s h a v n • F a r o e I s l a n d s
T e l . ( + 2 9 8 ) 3 5 3 0 3 0 • f i s k @ f i s k . f o • w w w . f i s k . f o
Løgtingið
Tinghúsvegur 1-3
Postboks 208
110 Tórshavn
15. oktober 2021
Mál: 21/20209-2
(at tilskila í svari)
Tygara skriv: 52-047/2021
Svar til fyrispurning 52-047/2021 frá Høgna Hoydal, løgtingsmanni, um vinnuligar
royndir og verkætlanir í 2020
Spurningar:
1. Hvussu nógvar umsóknir komu um kvotur til vinnuligar royndir og verkætlanir og
ískoytiskvotur í 2020?
2. Vórðu umsóknirnar viðgjørdar í umsitingini og tilmæli gjørd í Fiskimálaráðnum til
landsstýrismannin um, hvørjar umsóknir luku treytirnar og eftir fakligari meting áttu
at játtast sambært lóg og kunngerð?
3. Hví vórðu ongar játtanir givnar til umsóknir til vinnuligar kvotur og verkætlanir í
2020 – og við hvørjari heimild og skjalfestari grundgeving vórðu kvoturnar ikki
játtaðar – meðan ískoytiskvotur kortini vórðu latnar?
4. Um umsóknir vórðu tilmældar frá umsitingini í Fiskimálaráðnum at játta, hvørjar
vóru so tær ítøkiligu umsóknirnar, ið ikki vórðu játtaðar kortini?
5. Um svarið er játtandi til spurning 2 og 4, hvør er tann lógliga, sakliga, proporsjónala
og líkaregluliga grundgevingin fyri ikki at játta – og hvør er sakliga grundgevingin
fyri, at landsstýrismaðurin ístaðin leggur broyting í sjófeingislógini fyri tingið, ið
broytir treytirnar fyri at søkja um hesar kvotur?
6. Eru umsóknir frá umsøkjarum, ið ikki vórðu tilmældar fakliga frá umsitingini í 2020,
sum ístaðin hava fingið játtan í 2021 eftir broyttu treytunum?
Svar:
Til nr. 1.
Í 2020 komu 38 umsóknir inn viðvíkjandi vinnuligum royndum og verkætlanum, og 16
umsóknir komu inn viðvíkjandi ískoytiskvotum.

-- 1 of 3 --

FISKIMÁLARÁÐIÐ
2/3
Til nr. 2.
Ja, umsóknirnar vórðu viðgjørdar í umsitingini, og tilmæli gjørt til landsstýrismannin.
Til nr. 3.
Orsakirnar, til at ongar játtanir vóru givnar til vinnuligar royndir og verkætlanir í 2020, eru
ein samanrenning av fleiri viðurskiftum.
Av tí, at tað var so langt útligið, áðrenn grundarlagið fyri at søkja eftir umsóknum var upp á
pláss, var avgerð tikin um ikki at hava svartkjaft sum grundarlag fyri vinnuligum royndum
og verkætlanum og ískoytiskvotum í 2020. Hetta tí at væntast kundi ikki, at svartkjafturin
fór at verða gagnnýttur í nøktandi mun í 2020, um bíðast skuldi eftir einari drúgvari
málsviðgerðartilgongd í sambandi við viðgerð av umsóknunum. Til tess at byrgja fyri, at
virði fóru fyri skeyti, og at tryggja, at tey smærru og minni væl útgjørdu skipini kundu fáa
lut í atgongdini, var tí lagt upp til í løgtingsmáli 136/2019 at heimilað landsstýrismanninum
ístaðin at lata nøgdirnar av svartkjafti út sum felagskvotu við hámarki sambært vanligu
reglunum í §§ 22 og 23 í sjófeingislógini. Hesa heimild fekk landsstýrismaðurin, og vórðu
svartkjaftakvoturnar avgreiddar á henda hátt.
Viðvíkjandi makreli og norðhavssild varð lýst eftir umsóknum til vinnuligar royndir og
verkætlanir umframt ískoytiskvotur við umsóknarfreist 10. august 2020.
Niðurstøða var gjørd viðvíkjandi tilmælum til ískoytiskvotur tann 28. september 2020.
Talan er um kvotu, sum verður latin fyri at styrkja um kvotugrundarlagið hjá ávísum
fiskifari, og kunnu hesar kvotur tí gagnnýtast beinanvegin. Øðrvísi er við vinnuligum
royndum og verkætlanum, har talan ofta er um verkætlanir, sum skulu fyrireikast, áðrenn
tær kunnu førast út í lívið.
Viðvíkjandi vinnuligum royndum og verkætlanum lat umsitingin landsstýrismanninum eitt
tilmæli. Um tað mundið var longu liðið so væl út á árið, at umrøtt varð, um tað var meira
skynsamt at fáa eina heimild frá Løgtinginum at flyta hesar nøgdir yvir ár, og soleiðis geva
vinnuligu royndunum og verkætlanunum eitt breiðari og betri grundarlag at byrja á í 2021.
Á henda hátt kundi svartkjaftur eisini gerast partur av grundarlagnum, umframt at
kvotugrundarlagið til fyrsta árið tá bleiv meiri haldgott, tí talan tá bleiv um kvotur fyri 2020
og 2021.
Eg tók tí avgerð um, heldur enn at játta makrel og norðhavssild til vinnuligar royndir og
verkætlanir í 2020, at leggja uppskot fyri Løgtingið (løgtingsmál 69/2020), har biðið var um
heimild at flyta kvotur til vinnuligar royndir og verkætlanir frá 2020 til 2021. Hetta varð
samtykt í Løgtinginum áðrenn ársskiftið.
Eisini var við uppskotinum lagt upp til, at møguleiki skuldi vera fyri at søkja um kvotu í
sambandi við ítøkiligt skipakeyp uttan krav um veiðiloyvi. Tann lógarbroytingin varð tó
ikki samtykt í tí umfarinum, men í staðin lagt fram aftur og samtykt tann 29. apríl 2021 (sí
løgtingsmál 100/2020).
Til nr. 4.
Eins og greitt er frá til spurning nr. 3, var við lógarbroyting í sjófeingislógini heimild fingin
frá Løgtinginum at flyta nøgdirnar til 2021 og harvið m.a. skapa eitt størri kvotugrundarlag

-- 2 of 3 --

FISKIMÁLARÁÐIÐ
3/3
fyri einum nýggjum umsóknarumfari. Landsstýrismaðurin tók tískil onga avgerð um
vinnuligar royndir og verkætlanir í 2020; og tískil varð eingin umsókn játtað í 2020.
Umsitingin viðgjørdi umsóknirnar og gjørdi eina frágreiðing við einum tilmæli til
landsstýrismannin. Í frágreiðingini var ein stutt lýsing og meting av øllum umsóknunum.
Frágreiðingin frá umsitingini er eitt innanhýsis arbeiðsskjal, sum er gjørt av
myndugleikanum til egna nýtslu, sbrt. § 7, nr. 1 í løgtingslóg um innlit í fyrisitingina.
Landsstýrismaðurin hevur tó í svari til spurning nr. 6 givið upplýsingar úr frágreiðingini, tó
uttan at upplýsa nøvnini á umsøkjarum.
Til nr. 5.
Viðvíkjandi orsøk til ikki at játta umsóknum til vinnuligar royndir og verkætlanir í 2020
verður víst til svar upp á spurning nr. 3.
Sum víst á í svari til spurning nr. 3, var avgerð tikin um ikki at hava svartkjaft sum
grundarlag fyri vinnuligum royndum og verkætlanum og ískoytiskvotum í 2020 fyri at
tryggja, at virði ikki fóru fyri skeytið. Seinni varð eisini avgjørt at bíða við vinnuligum
royndum og verkætlanum fyri makrel og norðhavssild og flyta nøgdirnar til 2021 at verða
útlutaðar saman við svartkjaftinum. Metingin var, at hetta fór at tryggja eitt meira haldgott
grundarlag hjá vinnuligum royndum og verkætlanum í 2021.
Øll, sum søktu í 2020, hava fingið at vita, at um tey ætlaðu at søkja um kvotu til vinnuligar
royndir og verkætlanir í 2021, var neyðugt at senda eina nýggja ella dagførda umsókn inn
samsvarandi oyðublaðnum.
Viðvíkjandi teimum broyttu møguleikunum at søkja í 2021, varð við lógarbroyting, sum
fekk gildi í mai 2021 (løgtingsmál 100/2020), lagt upp fyri, at burturav nøgdini til vinnuligar
royndir og verkætlanir kundi kvota eisini verða latin umsøkjarum til verkætlan, ið fevndi
um ítøkiligt skipakeyp, har treyt ikki er um, at skipið skal hava veiðiloyvi. Henda broyting
varð gjørd fyri at tryggja betri møguleika hjá nýggjum aktørum at fáa lut í kvotum.
Henda broyting í lóggávuni hevði síðani við sær einstakar broytingar í kunngerðini fyri
vinnuligar royndir og verkætlanir fyri 2021 í mun til 2020, tí atlit mátti takast fyri hesum.
Til nr. 6.
Umsóknarumførini í 2020 og 2021 kunnu ikki heilt samanberast, tí at broytingar eru
gjørdar í sjófeingislógini, soleiðis at tað nú ber til serstakt at søkja um kvotu til ítøkiligt
skipakeyp.
Í 2021 eru tað feløg, ið hava fingið játtað kvotu til vinnuligar royndir og verkætlanir, sum
eisini vóru millum umsøkjararnar í 2020, men hvørs umsóknir ikki vórðu tilmæltar tá.
Jacob Vestergaard
landsstýrismaður

-- 3 of 3 --

Skrivligur fyrispurningur
eftir § 52a í Tingskipanini
Spyrjari: Høgni Hoydal, løgtingsmaður
Svarari: Jacob Vestergaard, landsstýrismaður í fiskivinnumálum
Evni: Vinnuligar royndir og verkætlanir í 2020
Spurningar:
1. Hvussu nógvar umsóknir komu um kvotur til vinnuligar royndir og
verkætlanir og ískoytiskvotur í 2020?
2. Vórðu umsóknirnar viðgjørdar í umsitingini og tilmæli gjørd í
Fiskimálaráðnum til landsstýrismannin um, hvørjar umsóknir luku treytirnar
og eftir fakligari meting áttu at játtast sambært lóg og kunngerð?
3. Hví vórðu ongar játtanir givnar til umsóknir til vinnuligar kvotur og
verkætlanir í 2020 – og við hvørjari heimild og skjalfestari grundgeving vórðu
kvoturnar ikki játtaðar – meðan ískoytiskvotur kortini vórðu latnar?
4. Um umsóknir vórðu tilmældar frá umsitingini í Fiskimálaráðnum at játta,
hvørjar vóru so tær ítøkiligu umsóknirnar, ið ikki vórðu játtaðar kortini?
5. Um svarið er játtandi til spurning 2 og 4, hvør er tann lógliga, sakliga,
proporsjónala og líkaregluliga grundgevingin fyri ikki at játta – og hvør er
sakliga grundgevingin fyri, at landsstýrismaðurin ístaðin leggur broyting í
sjófeingislógini fyri tingið, ið broytir treytirnar fyri at søkja um hesar kvotur?
6. Eru umsóknir frá umsøkjarum, ið ikki vórðu tilmældar fakliga frá umsitingini í
2020, sum ístaðin hava fingið játtan í 2021 eftir broyttu treytunum?
Viðmerkingar:
10. juli 2020 lýsti Fiskimálaráðið eftir umsóknum til vinnuligar royndir og verkætlanir
og til ískoytiskvotur. 10. August 2020 skuldu umsóknirnar vera latnar
Fiskimálaráðnum.
Kvotur vórðu játtaðar til ískoytiskvotur. Men ongar kvotur vórðu játtaðar til
vinnuligar royndir og verkætlanir. Seinni legði landsstýrismaðurin uppskot til
lógarbroyting fyri tingið, ið broytti treytirnar fyri hesum kvotum, m.a. við at skoyta
upp í játtan til ítøkiligt skipakeyp – sum í 2021 fór við mestu tøku tonsunum.
Tí verður spurt, hvat hendi her. Og hvussu skjalfestast kann, at hetta er lógligt, sakligt,
proporsjónalt og í samsvari við líkaregluna í fyrisiting.
Á Løgtingi, 1. oktober 2021
Høgni Hoydal

-- 1 of 1 --