52-046/2021

F Í G G J A R M Á L A RÁ Ð I Ð
Ministry of Finance
Tinganes • Box 2039 • FO-110 Tórshavn
 (+298) 35 20 20 •  fmr@fmr.fo • www.fmr.fo
Løgtingið
Tinghúsvegur 1-3
Postboks 208
110 Tórshavn
Tórshavn, tann 12. oktober 2021
J. nr.: 21/20167
Svar uppá fyrispurning nr. 46/2021 frá Frimodt Rasmussen, løgtingsmanni, settur Jørgeni
Niclasen, landsstýrismanni í fíggjarmálum, um lántøku til Eystur- og Sandoyartunlarnar.
Fyrispurningurin er soljóðandi:
1. Hevur landstýrismaðurin kannað møguleikan at umfíggja lánsavtaluna til Eystur- og
Sandoyartunlarnar?
2. Eru ætlanir um at kanna møguleikan at umfíggja tunlarnar?
3. Er nøkur forðing fyri at umfíggja tunlarnar?
Svar:
Til nr. 1 og nr. 2
Landsstýrið hevur lagt verkætlanina Eystur- og Sandoyartunnilin til eitt alment partafelag at byggja
og reka. Tí er tað ábyrgdin hjá felagnum at kanna og meta um fyrimunir og vansar við at leggja
skuldina um.
Tunnilsfelagið hevur upplýst, at tað metir ikki, at tað er ein fyrimunur at leggja skuldina um í verandi
løtu. Sambært felagnum hevði tað verið kostnaðarmikið at sagt verandi skuld upp og síðani at lagt
hana um. Í øðrum lagi er ivasamt, um felagið hevði fingið lagaligari fígging við fastari rentu. Váðin
við broytiligari rentu er mettur at vera ov stórur. Í triðja lagi er verkætlanin ikki liðug, og tí er
byggiváði framvegis tengdur at verkætlanini. Hartil eru inntøkurnar nakað lægri enn tað, sum mett
varð frammanundan. Hetta merkir, at samlaða verkætlanin helst hevur nakað lægri kredittvirði nú
sammett við síðst í 2016, tá ið felagið gjørdi avtalurnar um fígging. Tí er ætlanin ikki í løtuni at kanna
møguleikan nærri at umfíggja skuldina.
Til nr. 3
Sambært felagnum er størsta forðingin fyri at umfíggja tunlarnar í løtuni kostnaðurin, sum knýtir seg
at tí at siga upp skuldina og at umfíggja hana. Harafturat er samlaða verkætlanin ikki liðug enn, og
byggiváði er framvegis knýttur at verkætlanini. Hetta ger tað sera ivasamt, um felagið í løtuni hevði
fingið aðra fígging, sum er lagaligari enn verandi fígging.
Tinganes, 13. oktober 2021
Jørgen Niclasen
Landsstýrismaður í fíggjarmálum

-- 1 of 1 --

Skrivligur fyrispurningur
eftir § 52a í Tingskipanini
Spyrjari: Frimodt Rasmussen, løgtingsmaður
Svarari: Jørgen Niclasen, landsstýrismaður í fíggjarmálum
Evni: Lántøka til Eystur- og Sandoyartunlarnar
Spurningar:
1. Hevur landstýrismaðurin kannað møguleikan at umfíggja lánsavtaluna til Eystur- og
Sandoyartunlarnar?
2. Eru ætlanir um at kanna møguleikan at umfíggja tunlarnar?
3. Er nøkur forðing fyri at umfíggja tunlarnar?
Viðmerkingar:
Í løgtingslóg nr. 54 frá 6. mai 2016 § 2, stk. 3 stendur, at felagið kann taka lán og ábyrgdarlán við at
útskriva lánsbrøv til verkætlanina. Landsstýrismaðurin skal í síni heild góðkenna lánstreytirnar.
Treytirnar eru broyttar munandi, síðan lán varð tikið. Tosaði við ein, sum hevur við Femern
sambandið millum Danmark og Týskland at gera. Sum eg havi skilt, so er leisturin fyri fígging fyri
Femern og Eystur- og Sandoyartunlarnar tann sami. Talan er um almenn partafeløg, og lánið skal
niðurgjaldast við brúkaragjøldum.
Femern ætlanin kostar um 60 mia. kr. og varð roknað við, at tað tók 35 ár, til hon var goldin.
Roknaða rentan væntaðist at skula liggja um 3%. Nú avtalurnar eru komnar upp á pláss, vísir tað
seg sum, at rentan er negativ og at afturgjaldstíðin er stytt frá 35 árum til 25 ár, grundað á
rentustøðið.
Nú tað vísir seg, at nýtslustigið av tunlunum er í lægra lagi, grundað á príspolitikk, so kundi tað
verða áhugavert at fingið útgreinað, um kanningar hava verið, sum kunnu gera, at nýtsluprosentið
fer upp.
Á Løgtingi, 1. oktober 2021
Frimodt Rasmussen

-- 1 of 1 --