52-039/2021

F Í G G J A R M Á L A RÁ Ð I Ð
Ministry of Finance
Tinganes • Box 2039 • FO-110 Tórshavn
 (+298) 35 20 20 •  fmr@fmr.fo • www.fmr.fo
Løgtingið
Tinghúsvegur 1-3
Postboks 208
110 Tórshavn
Tórshavn, tann: 1. oktobur 2021
J. nr.: 21/18839
Viðgjørt: AE
Svar til skrivligan fyrispurning nr. 52-040/2021 frá Eyðgunn Samuelsen, løgtingskvinnu,
settur landsstýrismanninum í fíggjarmálum, Jørgeni Niclasen, um byrgingina um
Haraldsund
Fyrispurningurin er soljóðandi:
1. Hevur landsstýrismaðurin ætlanir um at nýta ein part av grótinum úr tunlunum norður um
Fjall til at gera byrgingina um Haraldssund lidna?
2. Nær er ætlanin at gera byrgingina lidna?
Svar:
Byrgingin um Haraldsund er 350 metrar long og 20 metrar breið. Byrgingin er ongantíð gjørd
liðug. Landsverk fekk í 2008 játtan til at gera projekt fyri liðugtgerð av byrgingini, og var arbeiðið
tá klárt at bjóða út. Verkætlanin verður mett til at kosta eini 32 mió kr.
Við verkætlanini verður byrgingin dagførd, soleiði hon verður tíðarhóskandi og lýkur dagsins krøv
til eina slíka farleið.
Byrgingin verður eftir ætlan umbygd nakað, og verður stórur partur av verandi verklagi partur av
endaligu loysnini. Broytingin í mun til verandi byrging er, at vegurin verður lagdur soleiðis at
hann verður ein nattúrligur partur av vegunum báðumegin.
Tað er ikki tørvur at brúka tunnilsgrót til projektið sum ætlanin er at gera, tí ætlanin er at endurnýta
tilfarið í verandi byrging til nýggju byrgingina, og sambært projektinum er einans tørvur á heilt
stórum dekkgróti afturat tilfarinum, sum longu er í byrgingini. Hetta størra grótið fæst ikki úr
tunnilsgerð, og má tískil spreingjast í einum grótbrotið.
Eftir langtíðarløguætlanin, verður byrgingin um Haraldsund gjørd í 2027-2028.
Tinganes, 1. oktobur 2021
Jørgen Niclasen
Landsstýrismaður í fíggjarmálum

-- 1 of 1 --

Skrivligur fyrispurningur
eftir § 52a í Tingskipanini
Spyrjari: Eyðgunn Samuelsen, løgtingsmaður
Svarari: Jørgen Niclasen, landsstýrismaður í fíggjarmálum
Evni: Byrgingin um Haraldssund
Spurningar:
1. Hevur landsstýrismaðurin ætlanir um at nýta ein part av grótinum úr tunlunum
norður um Fjall til at gera byrgingina um Haraldssund lidna?
2. Nær er ætlanin at gera byrgingina lidna?
Viðmerkingar:
Nú gjørt verður klárt at bora norður um Fjall, kundi ein loysn verið at nýtt ein part av
grótinum úr tunlunum til at gera byrgingina um Haraldssund lidna. Tað hevur verið
frammi í politisku skipanini av og á at gera byrgingina lidna, men nú tunnilsarbeiðið
nærkast, hevur onki verið at hoyrt um hetta.
Tað hevur eisini verið frammi, at Klaksvíkar kommuna hevur gjørt avtalu um ein part
av grótinum. Hetta skuldi tó ikki forðað fyri, at byrgingin eisini verður gjørd liðug,
uttan so, at avtala er gjørd um at veita Klaksvíkar kommunu alt grótið.
Byrgingin um Haraldssund er ongantíð gjørd heilt liðug og eru umstøðurnar at koyra
ikki góðar, tá veðurlíkindini eru vánalig.1 Landsverk hevur gjørt fyrireikingar til eina
verkætlan, sum skal gera byrgingina lidna, og Landsverk hevur í samferðsluætlanini
fyri 2021-2024 mælt til, at verkætlanin verður gjørd beinanveg.
Spurningurin verður settur fyri at fáa greiðu á ætlanunum hjá landsstýrismanninum
hesum viðvíkjandi.
Á Løgtingi, 20. september 2021
Eyðgunn Samuelsen
1 https://www.logting.fo/mal/mal/?id=8467

-- 1 of 1 --