52-024/2021

F Í G G J A R M Á L A RÁ Ð I Ð
Ministry of Finance
Tinganes • Box 2039 • FO-110 Tórshavn
 (+298) 35 20 20 •  fmr@fmr.fo • www.fmr.fo
Løgtingið
Tinghúsvegur 1-3
Postboks 208
110 Tórshavn
Tórshavn, tann: 3. septembur 2021
J. nr.: 21/16759
Viðgjørt: AE
Svar til fyrispurning nr. 52-024/2021 frá Jóhannis Joensen, løgtingsmanni, settur Jørgeni
Niclasen, landsstýrismanni í fíggjarmálum, um rørslutarnað og Bygdaleiðir
Fyrispurningurin er soljóðandi:
1. Eru allir bussarnir hjá Bygdaleiðum í dag útgjørdir við lyftu, soleiðis at fólk við koyristóli
kunnu brúka almenna busskoyring á øllum leiðum?
2. Eru busssteðgistøðini, har bussarnir hjá Bygdaleiðum steðga, gjørd klár til at m.a.
koyristólar kunnu koyra úr og í bussarnar?
Svar til fyrispunring nr. 1
Strandferðslan hevur sum høvuðsendamál at veita trygt og gott ferðasamband hjá øllum
borgarum um alt landið.
Bussarnir hjá Bygdaleiðum, 48 í tali, eru allir nýggir. Teir eru rúmligir, komfortablir, og hava
allir lyftu, soleiðis at ferðafólk í koyristóli kunnu brúka bussarnar. Tað er at gleðast um, at
ferðafólk í koyristóli hava tikið hesa loysn til sín og dagliga ferðast við Bygdaleiðum.
Svar til fyrispunring nr. 2
Umstøðurnar á busssteðgiplássum við landsvegir og kommunalar vegir skulu verða í lagi,
soleiðis at tað er høgligt hjá fólk í koyristóli at fara í og úr bussunum. Ongar forðingar skulu
verða fyri at brúka bussarnar. Nyðugt verður gera tillagingar á fleiri bussteðgiplássum.
Landsstýrismaðurin hevur heitt á Strandfaraskip landsins og Landsverk, um at kanna
umstøðurnar, og gera eina ætlan fyri hvussu busssteðgiplássini kunnu betrast við landsvegir. Ein
stórur partur av vegakervinum er kommunalur, og er neyðugt at kommunurnar luttaka í
arbeiðinum.
Tinganes, 3. septembur 2021
Jørgen Niclasen
landsstýrismaður í fíggjarmálum

-- 1 of 1 --

Skrivligur fyrispurningur
eftir § 52a í Tingskipanini
Spyrjari: Jóhannis Joensen, løgtingsmaður
Svarari: Jørgen Niclasen, landsstýrismaður í fíggjarmálum
Evni: Rørslutarnað og Bygdaleiðir
Spurningar:
1. Eru allir bussarnir hjá Bygdaleiðum í dag útgjørdir við lyftu, soleiðis at fólk
við koyristóli kunnu brúka almenna busskoyring á øllum leiðum?
2. Eru busssteðgistøðini, har bussarnir hjá Bygdaleiðum steðga, gjørd klár til at
m.a. koyristólar kunnu koyra úr og í bussarnar?
Viðmerkingar:
Á heimasíðuni hjá Bygdaleiðum stendur slagorðið “Nýggjari, grønari og rúmligari”.
Hetta eru góð slagorð, sum eiga at betra um tænastuna hjá øllum borgarum í
landinum, sum nýta almennu bussleiðirnar. Undirritaði hevur fyrr havt fyrispurningar
um atkomuviðurskiftini hjá rørslutarnaðum í almennar bygningar. Har varð staðfest,
at enn er nakað á mál, áðrenn allir almennir bygningar lúka krøvini um atkomu fyri
fólk við rørslutarni. MEGD hevur eisini víst á hetta fleiri ferðir.
Tað er tí gleðiligt, at allir bussar hjá Bygdaleiðum eru bæði nýggjari, grønari og
rúmligari. Men spurningurin er, um umstøðurnar at koma í og úr bussunum eru nóg
góðar allastaðni, og um bussarnir eru gjørdir klárir til, at koyristólsbrúkarar kunnu
nýta bussleiðina. Greitt er, at undirlendið, har koyristólar skulu úr og í bussar, eigur at
vera rúmligt og slætt, og spurningurin er, um hetta er veruleikin á øllum
busssteðgistøðum. Tí verður hesin fyrispurningur settur landsstýrismanninum.
Á Løgtingi, 24. august 2021
Jóhannis Joensen

-- 1 of 1 --