52-022/2021

Skrivligur fyrispurningur
eftir § 52a í Tingskipanini
Spyrjari: Eyðgunn Samuelsen, løgtingsmaður
Svarari: Elsebeth Mercedis Gunnleygsdóttur, landsstýrismaður í almannamálum
Evni: Nýggja heimið í Reynstúni
Spurningar:
1. Hvussu langt er arbeiðið komið við at byggja nýtt heim til fólk við
menningartarni og fjølbreki (húsfólkini á Eirargarði) í Reynstúni á Argjum?
2. Nær verður heimið í Reynstúni liðugt?
3. Hvat er gjørt av ábótum á núverandi Eirargarði 14 og 16, og hvat verður gjørt,
meðan bíðað verður eftir nýggja heiminum í Reynstúni?
Viðmerkingar:
Í frágreiðing løgmans á ólavsøku verður nýggja heimið í Reynstúni á Argjum nevnt
sum ein ætlan, men einki verður sagt um, hvussu tað líður við arbeiðinum.1 Nógvir
vardir bústaðir eru í vánaligum standi og eru ótíðarhóskandi.
Tann 29. mars 2019 varð lógaruppskot lagt fyri Løgtingið um at byggja nýtt heim í
Reynstúni. Skipanaruppskot og tíðarætlan vóru við í uppskotinum og eftir ætlan
skuldi heimið taka 24 mánaðir at byggja og standa liðugt í 2022. Uppskotið fall
burtur, tá tingið fór heim.
Bygningarnir Eirargarður 14 og 16 vórðu bygdir í 1970’unum og eru í ringum standi
og ótíðarhóskandi í dag. Ætlanin var at gera ymsar ábøtur á Eirargarð 14 og 16,
meðan bíðað varð eftir nýggja heiminum. Hetta framgongur eisini av
lógaruppskotinum frá mars 2020 um dagføring av vardum bústøðum.
Eisini er tað týdningarmikið hjá húsfólki, avvarðandi og starvsfólkum at vita, um ella
nær tey kunnu vænta sær eitt nýtt heim og arbeiðspláss. Tí verður hesin fyrispurningur
settur.
Á Løgtingi, 19. august 2021
Eyðgunn Samuelsen
1 Frágreiðing løgmans á ólavsøku 2021 – s. 65

-- 1 of 1 --

ALMANNAMÁLARÁÐIÐ
Eirargarður 2 • FO-100 Tórshavn
Tel: +298 304000 • Fax: +298 304045 • E-mail: amr@amr.fo
Løgtingið
Tinghúsvegur 1-3Postboks 208
110 Tórshavn
31. august 2021
Mál: 21/16293-5
Tygara Skriv:
Viðgjørt:
nr. 52-022/2021
Svar
uppá
skrivligan fyrispurning nr. 52-022/2021 sambært tingskipanini § 52a til Elsebeth
Mercedis Gunnleygsdóttur, landsstýrismann frá Eyðgunn Samuelsen, løgtingsmann um
Nýggja heimið í Reynstúni
Spurningar:
1. Hvussu langt er arbeiðið komið við at byggja nýtt heim til fólk við menningartarni og
fjølbreki (húsfólkini á Eirargarði) í Reynstúni á Argjum?
2. Nær verður heimið í Reynstúni liðugt?
3. Hvat er gjørt av ábótum á núverandi Eirargarði 14 og 16, og hvat verður gjørt, meðan
bíðað verður eftir nýggja heiminum í Reynstúni?
Svar:
Til 1 og 2: Sum eitt tað fyrsta, setti landsstýrismaðurin sær fyri, alt fyri eitt, at fáa gongd á
byggjaríið til fólk við serligum avbjóðingum, og heldur landsstýrismaðurin, at hetta hevur
eydnast væl. Fleiri verkætlanir vóru á tekniborðinum, men ongin var klár at fara í gongd við
at byggja.
Heimið til børn og ung við autismu í Kvíggjartúni á Argjum var um at verða liðugt
prosjekterað, tá landsstýrismaðurin tók við, men tá tað varð boðið út, var prísurin munandi
hægri enn mett. Tí tók landsstýrismaðurin avgerð um at havna lisitatiónini, og bað um at fáa
verkætlanina umprosjekteraða, uttan at tað skuldi ganga út yvir funktiónirnar. Endin var, at
verkætlanin bleiv boðið út av nýggjum, og úrslitið av hesum varð, at prísurin var tá 17 mió.
kr. lægri enn við fyrru lisitatión. Farið er undir at byggja heimið í mai í ár, og arbeiðið gongur
væl.
Sambýlið til fólk við menningartarni, ið verður bygt á Mýrini í Hoyvík, var heldur ikki klárt
at fara undir at byggja, tá landsstýrismaðurin tók við. Kostnaðarmetingin, tá prosjekt-
uppskotið var liðugt, var munandi hægri enn verklagslógin frá 2018 heimilaði, og tí var
neyðugt hjá landsstýrismanninum at leggja broytingaruppskot fyri Løgtingið, áðrenn haldast
kundi fram við verkætlanini. Løgtingið samtykti broytingaruppskotið, og nú er arbeiðið

-- 1 of 2 --

ALMANNAMÁLARÁÐIÐ
síða 2 av 2
komið so mikið langt, at sáttmálarnir at byggja heimið eru undirskrivaðir í dag, og prísurin er
innanfyri kostnaðarmetingini. Jørðarbeiðið er longu liðugt, so klárt verður at byggja í
næstum.
Bæði heimini verða liðug og klár at flyta inn í við árslok 2022.
Triðja byggiverkætlanin, Røktarheim til fólk við menningartarni og fjølbreki, sum skal
byggjast í Reynstúni á Argjum, hevði undanfarni landsstýrismaður – spyrjarin – fyrireikað
fram til skipanauppskot, sum varð lagt fyri Løgtingið saman við verklagslógini. Men sum
kunnugt, fall lógaruppskotið burtur, sum so nógv onnur mál, tí táverandi samgonga hevði ikki
meirilutan í Løgtinginum.
Landsstýrismaðurin setti sær fyri at fullføra verkætlanina, men tað vísti seg skjótt, at fleiri
snávingarsteinar vóru á vegnum, sum hava seinkað tilgongdina. Hóast hesar, hevur verið
arbeitt miðvíst við verkætlanini, og sambært tíðarætlanini verður klárt at bjóða arbeiðið út
beint eftir ársskiftið.
Landsstýrismaðurin fer at leggja verklagslógina fyri Løgtingið, tá arbeiðið er boðið út og
tilboðini eru komin inn, soleiðis at byggiverkætlanin er so væl fyrireikað og upplýst sum
gjørligt, tá Løgtingið skal taka støðu til málið. Byggitíðin er mett at taka uml. 18 mánaðir, og
verður sambært tíðarætlanini klárt at flyta inn síðst í 2023.
Til 3: Í 2020 eru umvælingar gjørdar á Eirargarði 14 – 2. Hesar umvælingar fevna um:
innklima, nýggj loft, lyftiútgerð, nýggjan gólvbelegning, ABA brandávaringarskipan, umvæla
vesir & vátrúm, umvæla køk og málaraarbeiði.
Í inniverandi ári verður eftir ætlan umvælingar og dagføringar gjørdar á Eirargarði 16 – 1&2..
Tær fevna um umvælingar av vesum og vátrúmum, innbúgv og lyftiútgerð. Arbeiðið verður
sett í gongd í ár um alt gongur sum ætlað.
Umframt omanfyri nevnda er eisini ymiskt viðlíkahald gjørt.
Í 2023 er ætlanin at totaltrenovera Eirargarð 14-1. Í ætlanini, sum fyriliggur, fevnir m.a. um
inniklima, nýtt loft, lyftiútgerð, nýggjan gólvbelegning, umvæla køk, umvæla vesir,
málaraarbeiði og ABA brandávaringarskipan.
31. august 2021
Elsebeth Mercedis Gunnleygsdóttur
landsstýrismaður í almannamálum

-- 2 of 2 --