52-020/2021

F Í G G J A R M Á L A RÁ Ð I Ð
Ministry of Finance
Tinganes • Box 2039 • FO-110 Tórshavn
 (+298) 35 20 20 •  fmr@fmr.fo • www.fmr.fo
Løgtingið
Tinghúsvegur 1-3
Postboks 208
110 Tórshavn
Tórshavn, tann: 24. august 2021
J. nr.: 21/15892
Viðgjørt: AE
Svar til fyrispurning nr. 52-020/2021 frá Bjarna Hammer, løgtingsmanni, settur Jørgeni
Niclasen, landsstýrismanni í fíggjarmálum, um eyka skip til Suðuroynna
Fyrispurningurin er soljóðandi:
1. Ætlar landsstýrismaðurin at fáa eyka skip at stuðla Smyrli á Suðuroyarleiðini?
2. Hvussu langt er arbeiðið komið við at finna eina varandi loysn til trupulleikan við at fáa
farm til og frá Suðuroynni?
Svar:
Framburður er í Suðuroy, og mongdin av farmi hevur verið alsamt vaksandi seinnu árini. Hetta
millum annað vegna gongdina innan fiski- og alivinnuna í Suðuroy, og annars
samfelagsmenningini sum heild. Strandferðslan ásannar, at tað er stórt trýst á Smyrli á
Suðuroyarleiðini og neyðugt er at økja flutningsorkuna við farmi.
Saman við Strandferðsluni hevur landsstýrismaðurin viðgjørt málið og um hvørjir møguleikar
eru. Strandferðslan og landsstýrismaðurin hava havt samrøður við privatu flutningsfeløgini, um
møguleikar fyri at flutningsfeløgini kunnu átaka sær, at sigla farm til og frá Suðuroy nakrar
ferðir um vikuna.
Hugskotið er væl móttikið av flutningsfeløgunum. Feløgini løgd dent á, at um kostnaðurin fyri at
flyta farm ikki skal hækka, er neyðugt at játta pening til endamálið. Arbeitt verður við málinum
politiskt.
Eg vóni, at tað ber til at finna eina politiska semju í sambandi, sum kann tryggja farmflutning á
suðuroyarleiðini – eins og samgongan gjørdi fyri Sandoyarleiðina í 2020.
Tinganes, 24. augst 2021
Jørgen Niclasen
landsstýrismaður í fíggjarmálum

-- 1 of 1 --

Skrivligur fyrispurningur
eftir § 52a í Tingskipanini
Spyrjari: Bjarni Hammer, løgtingsmaður
Svarari: Jørgen Niclasen, landsstýrismaður í fíggjarmálum
Evni: Eyka skip til Suðuroynna
Spurningar:
1. Ætlar landsstýrismaðurin at fáa eyka skip at stuðla Smyrli á Suðuroyarleiðini?
2. Hvussu langt er arbeiðið komið við at finna eina varandi loysn til trupulleikan
við at fáa farm til og frá Suðuroynni?
Viðmerkingar:
Øll vinnan í Suðuroynni savnaði avvarðandi myndugleikar og politisku skipanina í
november 2020, har tað staðiliga bleiv víst á áhaldandi og vaksandi trupulleikan við at
fáa farm til og frá Suðuroynni. Partarnir samdust um, at ein varandi loysn skuldi
finnast beinanvegin. Einki hevur verið at frætta síðan fundin. Seinkingar eru
gerandiskostur, og bilar standa oftari og oftari eftir. Ferðandi hava trupult við at leggja
sínar ferðir til rættis, tí tað er sjáldan nøkur trygd fyri, at tey fáa síni akfør við.
Ferðandi, sum skulu av landinum, mugu aloftast av oynni dagin fyri, um tey skulu
vera vís í at náa flogfarið. Einasta loysnin, sum kann taka trýstið av Smyrli
beinanvegin, er at fáa eina nýggja farmaleið á Suðuroyarleiðini. Tað hevur
Strandferðslan víst á í fleiri umførum. Framtíðarútlitini fyri Suðuroynna vísa ein
áhaldandi vinnuligan vøkstur, stóran áhuga fyri at flyta til oynna og seta búgv,
umframt fleiri og fleiri ferðafólk, sum ynskja at vitja Suðuroynna. Tí verður hesin
fyrispurningurin settur.
Á Løgtingi, 12. august 2021
Bjarni Hammer

-- 1 of 1 --