52-019/2021

Dagf. 24. august 2021
HMR J. nr. 21/15748-6
Kaj Leo Holm Johannesen
landsstýrismaður
Svar
upp á
fyrispurning nr. 52-019/2021 eftir § 52a í tingskipanini um COVID-19 kanningar frá Beintu
Løwe Jacobsen, løgtingskvinnu
Spurningurin var soljóðandi:
1. Hvussu nógv hevur landið/heilsuverkið rindað privatum kanningarstovum fyri at taka sær av
COVID-19 kanningum síðan mars mánað í fjør, tá koronufarsóttin byrjaði og higartil í ár?
Svar:
Til spurning 1
Í hesum svari verður kanningarvirksemið avmarkað til at fevna um tær kanningar, ið
sjúkrahúsverkið skipar fyri, samsvarandi viðmerkingunum frá spyrjaranum.
Sjúkrahúsverkið hevur greitt frá, at síðani á heysti í fjør hevur Sjúkrahúsverkið samstarvað við
privatu fyritøkurnar Smyril Line og Thetis um at skipa og standa fyri koronukanningunum á
Eystaru bryggju í Havn. Harumframt greinar Thetis umleið helvtina av øllum teimum kanningum,
sum Sjúkrahúsverkið hevur ábyrgd av. Heilsufrøðiliga Starvsstovan greinar hina helvtina.
Samanumtikið hevur samstarvið við øll verið fyrimyndarligt.
Samanlagt í 2020 og higartil í 2021 hevur Sjúkrahúsverkið brúkt umleið 30 mió. kr. fyri tær
koronukanningar, sum Sjúkrahúsverkið hevur ábyrgd fyri til Heilsufrøðiligu starvsstovuna, Thetis
og Smyril Line. Av hesum eru um 16,5 mió. kr. fluttar Heilsufrøðiligu starvsstovuni fyri greiningar
av kanningum og um 12,6 mió. kr. eru fluttar Thetis fyri greiningar, løn til tey, sum potað, umframt
tað tilfar, sum er neyðugt í sambandi við kanningarnar, t.d. verndarúgerð, potipinnar og gløs.
Harumframt eru um 0,9 mió. kr. goldnar Smyril line fyri ta tíð, tá tey høvdu tænastuna at samskipa,
skipa ferðslu, telefonavgreiðslu o.a fyri sjúkrahúsverkið.

-- 1 of 2 --

Eins og greitt var frá í svari til áðursettan spurning, kann verða sagt, at: Heilsufrøðiliga
Starvsstovan hevur greinað kanningar fyri Sjúkrahúsverkið og ger tað framvegis. Heilsufrøðiliga
Starvsstovan hevur ongantíð gjørt kanningar fyri heilsuverkið og er ei heldur spurd um hetta.
Hesum parti taka Thetis og sjúkrahúsverkið sær av.
Útreiðslurnar hava verið hesar higartil:
Kanningarútreiðslur - í mió.kr. 2020 2021 tilsamans
Heilsufrøðiliga starvsstovan 10,0 6,5 16,5
Thetis 4,7 7,9 12,6
Smyril line 0,3 0,6 0,9
Tilsamans 15,0 15,0 30,0
Hóast Sjúkrahúsverkið hevur latið øðrum uppgávuna at gera og greina koronukanningar, hevur
Sjúkrahúsverkið evstu ábyrgdina av teimum kanningum, ið verða framdar í sjúkrahúsverkinum og
tryggjar, at alt fer rætt fram.
Heilsumálaráðið, 24. august 2021
Kaj Leo Holm Johannesen
landsstýrismaður

-- 2 of 2 --

Skrivligur fyrispurningur
eftir § 52a í Tingskipanini
Spyrjari: Beinta Løwe Jacobsen, løgtingsmaður
Svarari: Kaj Leo Holm Johannesen, landsstýrismaður í heilsumálum
Evni: COVID-19 kanningar
Spurningar:
1. Hvussu nógv hevur landið/heilsuverkið rindað privatum kanningarstovum fyri
at taka sær av COVID-19 kanningum síðan mars mánað í fjør, tá
koronufarsóttin byrjaði og higartil í ár?
Viðmerkingar:
Landssjúkrahúsið valdi í fjør at útveita COVID-19 kanningar til privatar fyritøkur.
Sambært svari frá landsstýrismanninum í desember í fjør, so er Heilsufrøðiliga
Starvsstovan ongantíð spurd um at gera hesar kanningar.
Nú er skjótt hálvtannað ár liðið, síðan koronufarsóttin rakti landið, og tí verður hesin
fyrispurningur settur.
Á Løgtingi, 12. august 2021
Beinta Løwe Jacobsen

-- 1 of 1 --