52-015/2021

U M H V Ø R V I S - O G V I N N U M Á L A R Á Ð I Ð
GONGIN 7 • POSTSMOGA 377 • 110 TÓRSHAVN
TELEFON 30 66 00 • TELEFAX 30 66 65 • E-MAIL: UVMR@UVMR.FO
Tórshavn, tann 16. august 2021
Journalnr.: 21/15918
Løgtingið
Tinghúsvegur 1-3
Postboks 208
110 Tórshavn
Svar upp á § 52a fyrispurning nr. 52-015/2021 frá Ingilín Didriksen Strøm, løgtingskvinnu,
viðvíkjandi Hellutanga vesturi á Víkum
Spurningur:
1. Hvørjar verða umhvørvisligu avleiðingarnar av, at Hellutangi í longri tíð
liggur vesturi á Víkum, og hvussu verður syrgt fyri, at tær verða avmarkaðar?
2. Heldur landsstýrismaðurin, at økið vesturi á Víkum er vælegnað til aling?
3. Eru ætlanir um at tryggja, at tilbúgvingarætlan fylgir við
umhvørvisgóðkenningum til aling o.a. virksemi, ið kann hava avleiðingar fyri náttúruøkir?
Svar
Roknað verður ikki við, at Hellutangi fer at hava serligar avleiðingar fyri havumhvørvið.
Hellutangi hevur lítið ella einki av olju og øðrum dálkandi evnum umborð, og verður tí ikki
roknað við nakrari týðandi dálking, um hann verður liggjandi til næsta summar.
Hellutangi er ikki til ampa fyri eitt nú fiskiskap og skipaferðslu.
Kanningar av aldu- og streymviðurskiftum á Víkum vísa, at sjógvútskiftið er gott, og metir
Umhvørvisstovan tí, at vandi fyri dálking frá rakstrinum er avmarkaður á aliøkinum á Víkum.
Økið á Víkum liggur út til opið hav, og kann tað tí vera ein avbjóðing fyri bæði fisk og útgerð at
vera á staðnum í vánaligum veðri.
Treytir eru í umhvørvisgóðkenningini fyri alingina á Víkum, at virkið skal hava mannagongdir at
fyribyrgja óhappum, og hvat skal gerast, um óhapp hendir. Umhvørvisstovan er í ferð við at
endurskoða umhvørvisgóðkenningar til alibrúk. Í góðkenningum fyri størri virki er ásett, at tey
skulu hava tilbúgvingarætlanir.
Umhvørvis- og vinnumálaráðið, tann 16. august 2021
Helgi Abrahamsen
landsstýrismaður

-- 1 of 1 --

Skrivligur fyrispurningur
eftir § 52a í Tingskipanini
Spyrjari: Ingilín D. Strøm, løgtingsmaður
Svarari: Helgi Abrahamsen, landsstýrismaður í umhvørvis- og vinnumálum
Evni: Hellutangi vesturi á Víkum
Spurningar:
1. Hvørjar verða umhvørvisligu avleiðingarnar av, at Hellutangi í longri tíð
liggur vesturi á Víkum, og hvussu verður syrgt fyri, at tær verða avmarkaðar?
2. Heldur landsstýrismaðurin, at økið vesturi á Víkum er vælegnað til aling?
3. Eru ætlanir um at tryggja, at tilbúgvingarætlan fylgir við
umhvørvisgóðkenningum til aling o.a. virksemi, ið kann hava avleiðingar fyri
náttúruøkir?
Viðmerkingar:
Enn er ongin náttúrufriðingarlóg ella lendisætlan um, hvørji øki í Føroyum skulu
varðveitast uttan at verða ávirkað av menniskjahond - eitt nú hvat skal vera ídnaðarøki
og hvat skal vera friðað.
Áðrenn aliloyvið varð givið við umhvørvisgóðkenning vesturi á Víkum, heittu borga-
rar saman við Føroya Náttúru- og Umhvørvisfelag á Yvirfriðingarnevndina at friða alt
økið vesturi á Víkum. Hetta er eitt øki, har Fjallavatn og økið uttan um vatnið longu
er friðað. Tó høvdu felagið og borgararnir ikki rætt at verða hoyrd í málinum.
Men aliloyvið varð givið við umhvørvisgóðkenning. Reglur eru í umhvørvisgóðken-
ningini um krøv, ið skulu lúkast, um óhapp er. Tó er onki krav um tilbúgvingarætlan.
Tann 5. apríl í ár sleit fóðurflakin vesturi á Víkum seg leysan og rak á land. Har hevur
Hellutangi ligið síðan. Fleiri royndir hava verið gjørdar at draga Hellutanga leysan,
men enn er ongin roynd eydnast. Nú hoyra vit, at Hellutangi verður liggjandi í allan
vetur, og at ætlanin møguliga er at flyta hann í pettum. Tað kann hugsast, at tað fær
avleiðingar fyri umhvørvið vesturi á Víkum. Tí verður hesin fyrispurningurin settur.
Á Løgtingi, 9. august 2021
Ingilín D. Strøm

-- 1 of 1 --