52-012/2021

U T T A N R Í K I S - O G M E N T A M Á L A R Á Ð I Ð
Tinghúsvegur 5-7 • Postrúm 3279 • FO-110 Tórshavn
 +298 30 65 00 •  ummr@ummr.fo • www.ummr.fo
Løgtingið
Tinghúsvegur 1-3
Postboks 208
110 Tórshavn
Dagfesting: 18. august 2021
Tygara ref.:
Máltal.: 21/08502-17
Svar
upp á
fyrispurning nr. 52-012/2021 eftir § 52 a í tingskipanini um ætlanina við landsins ognum í
Hoydølum, frá Høgna Hoydal, løgtingsmanni, settur Jenis av Rana, landsstýrismanni.
Fyrispurningurin er soljóðandi:
1. Hvat er endamálið við og sakliga grundgevingin fyri, at landsstýrismaðurin ætlar at lata
landsins ognir í Hoydølum av hondum?
2. Heldur landsstýrismaðurin, at tað er rætt og rímiligt at lata eina ogn og eitt friðað pláss í
landinum, sum allir føroyingar eiga og hava atgongd til, burtur til endamál, ið kunnu gera
hetta pláss, bygningar og lendi til privata ogn hjá einstaklingum, sum øll ikki hava
atgongd til?
3. Kennir landsstýrismaðurin ikki ábyrgd av, hvat tær friðaðu Hoydalar í framtíðini verða
brúktar til?
4. Ætlar landsstýrismaðurin at leggja málið fyri Løgtingið at taka støðu til, áðrenn avgerð
verður tikin í málinum?
Svar
Til nr. 1: Samráðingar hava verið við Tórshavnar kommunu um eitt makaskifti, har økið í
Hoydølum kring gráa skúlabygningin og parkeringsøkið kring henda vera latin Tórshavnar
kommunu. Sum viðurlag fyri makaskiftið letur kommunan sín part av ognunum á Frælsinum til
landið, so farast kann undir at gera eitt nýtt kampus á økinum. Størsti parturin av Hoydølum, eitt
nú gamla Sanatoriið og tað, ið hartil hoyrir, eru ikki partur av ætlaða makaskiftinum.
Sakliga grundgevingin er tvíføld:
1) At tryggja landinum fullan ræðisrætt á ognunum á Frælsinum, við tí fyri eyga at brúka tær til
almannagagnligt virksemi hjá Fróðskaparsetrinum, og
2) at lata kommununa fáa ræði á nevnda parti í Hoydølum og harvið virka fyri at fáa lív og trivnað
aftur í vakra dalin, heldur enn at økið fer at standa í órøkt í longri tíð.
Til nr. 2: Í løtuni er tað bert viðarlundin, sum er friðað – og henda er ikki partur av ætlaða
makaskiftinum við kommununa. Bygningar, bygningslutir og lendið annars eru ikki friðað, men
eitt tilmæli um friðing verður í løtuni viðgjørt í Uttanríkis- og mentamálaráðnum. Ein

-- 1 of 2 --

U T T A N R Í K I S - O G M E N T A M Á L A R Á Ð I Ð
Tinghúsvegur 5-7 • Postrúm 3279 • FO-110 Tórshavn
 +298 30 65 00 •  ummr@ummr.fo • www.ummr.fo Page 2 of 2
frílendisætlan er gjørd fyri Hoydalar, og tað lendið er ikki partur av ætlaða makaskiftinum við
kommununa. Sum nevnt í svarinum til fyrsta spurningin, er ætlanin at gera makaskifti við
Tórshavnar kommunu um gráa skúlabygningin og parkeringsøkið kring henda – og ikki økið í síni
heild. Talan er ikki um at lata øki til privata ogn hjá einstaklingum – tvørturímóti verður tað latið
Tórshavnar kommunu, sum hevur ein áhugað í, at almenningurin eisini framyvir hevur atgongd til
økið.
Til nr. 3: Landsstýrismaðurin kennir ábyrgd av økinum, og fegnist eg tí almikið um, at vit hava
gjørt sáttmála við LISA, so hesi í dag kunnu brúka partar av gamla Sanatoriinum til teirra skapandi
virksemi. Harvið er lív komið aftur í Hoydalar, til stóra gleði fyri okkum øll.
Hinvegin, so hevur grái skúlabygningurin staðið tómur, síðani næmingarnir fluttu út á Glasir, og
fer hann við tíðini at fella í órøkt, um einki hendir. Tórshavnar kommuna hevur gjørt greitt, at
kommunan hevur áhuga í gráa skúlabygninginum og parkeringsøkinum kring henda. Tey boðini
gleða meg. Mítt ynski er, at lív aftur kemur í dalin, og tí haldi eg tað vera upplagt, at tað er
kommunali myndugleikin á staðnum, heldur enn landið, ið tekur støðu til, hvat grái
skúlabygningurin og økið kring henda í framtíðini verða brúkt til.
Til nr. 4: Um, og tá, endalig semja fæst við Tórshavnar kommunu um makaskiftið, verður málið
lagt fyri Løgtingið at taka støðu til.
Vinarliga
Jenis av Rana
landsstýrismaður

-- 2 of 2 --

Skrivligur fyrispurningur
eftir § 52a í Tingskipanini
Spyrjari: Høgni Hoydal, løgtingsmaður
Svarari: Jenis av Rana, landsstýrismaður í uttanríkis- og mentamálum
Evni: Ætlanin við landsins ognum í Hoydølum
Spurningar:
1. Hvat er endamálið við og sakliga grundgevingin fyri, at landsstýrismaðurin ætlar at lata
landsins ognir í Hoydølum av hondum?
2. Heldur landsstýrismaðurin, at tað er rætt og rímiligt at lata eina ogn og eitt friðað pláss í
landinum, sum allir føroyingar eiga og hava atgongd til, burtur til endamál, ið kunnu gera
hetta pláss, bygningar og lendi til privata ogn hjá einstaklingum, sum øll ikki hava atgongd
til?
3. Kennir landsstýrismaðurin ikki ábyrgd av, hvat tær friðaðu Hoydalar í framtíðini verða
brúktar til ?
4. Ætlar landsstýrismaðurin at leggja málið fyri Løgtingið at taka støðu til, áðrenn avgerð
verður tikin í málinum ?
Viðmerkingar:
Landsstýrismaðurin hevur á tingi upplýst, at ætlanin er at gera eitt makaskifti um ognirnar hjá
landinum í Hoydølum, so landsins friðaðu ognir á hesum plássi gleppa landinum av hondum.
Søgan um Hoydalar frá Sanatorii til skúla er flestum kend. Alt lendið er í mestan mun friðað, og
fleiri ætlanir hava verið gjørdar um at gera lendið og bygningar alt meira atkomiligt til nýtslu hjá
øllum fólki í landinum.
Tí verður spurt, hvat endamálið og grundgevingin er, og um landsstýrismaðurin ætlar at leggja
málið fyri Løgtingið at taka støðu til.
Á Løgtingi, 6. august 2021
Høgni Hoydal

-- 1 of 1 --