52-169/2020

F Í G G J A R M Á L A RÁ Ð I Ð
Ministry of Finance
Tinganes • Box 2039 • FO-110 Tórshavn
 (+298) 35 20 20 •  fmr@fmr.fo • www.fmr.fo
Løgtingið
Tinghúsvegur 1-3
Postboks 208
110 Tórshavn
Tórshavn, tann: 5. juli 2021
J. nr.: 21/12802
Viðgjørt: AE
Svar til fyrispurning nr. 52-169/2020 frá Páll á Reynatúgvu, løgtingsmanni, settur Jørgeni
Niclasen, landsstýrismanni í fíggjarmálum, um ferðaætlanina hjá Hasfjord og Teistanum.
Fyrispurningurin er soljóðandi:
1. Ætlar landsstýrismaðurin at halda fram við verandi ferðaætlan um Skopunarfjørð, har
bæði Hasfjord og Teistin sigla allar dagar í vikuni?
2. Um ikki, hví skal skipanin, sum tykist rigga væl, broytast aftur?
3. Hvør er meirkostnaðurin av verandi skipan?
4. Hvør er meirinntøkan av verandi skipan?
Svar:
Fast vegasamband verður eftir ætlan millum Sandoynna og meginøkið í desembur 2023.
Hóast hetta setti samgongan sær fyri, at betra siglingina á Sandoyarleiðini, við at
keypa skip til at sigla tungan farm til og frá Sandoynni. Tað gagnar vinnulívinum á Sandoynni,
og ger tað høgligari hjá ferðafólki at sigla.
Ternan avloysti Teistan á Sandoyarleiðini í ein mánað, meðan Teistin hevur verið til 20 ára
klassing.
Tá ein ferja hjá Strandferðsluni fer úr sigling í eitt tíðarskeið er avleiðingin vanliga, at
tænastustøði lækkar. Hesa ferð hevði stovnurin møguleika at varðveita á leið sama
tænastustøði, við at lata Hasfjord sigla nógv oftari meðan
Ternan røkti Sandoyarleiðina. Tað er ein spurningur um kapasitet, tí Ternan tekur bert á leið
helvtina av akførum í mun til Teistan.
Hetta hevur eisini verið ein royndartíð fyri at vita hvussu siglingin á Sandoyarleiðini kann
skipast.
Hugsa vit okkum at Hasfjord heldur áfram at sigla á Sandoyarleiðini, sum seinasta
mánaðin, kostar tað sambært Strandferðsluni eini 3,2 mió. kr. árliga í rakstri. Tað er peningur,
sum SSL ikki hevur játtan til. Roknað verður ikki við serligum inntøkuvøkstri, tí nøgdin av farmi

-- 1 of 2 --

F Í G G J A R M Á L A R Á Ð I Ð
Ministry of Finance
2/2
verður at kalla tann sama á Sandoyarleiðini, meðan møguliga kundu komi nakað fleiri
persónbilar.
Nú Teistin eftir ein mánað er komin aftur í sigling, verður farið aftur til vanligu ferðaætlanina,
har Teistin siglir 61 túrar um vikuna (tur/retur), og Hasfjord siglir 20 túrar um vikuna, týsdag til
fríggjadag. Samanlagt 81 túrar (tur/retur). Siglt verður sostatt 162 ferðir um fjørðin um vikuna.
Í løtuni eru ikki ætlanir ella peningur til at økja um túratalið.
Tinganes, 05. juli 2021
Jørgen Niclasen
landsstýrismaður í fíggjarmálum

-- 2 of 2 --

Skrivligur fyrispurningur
eftir § 52a í Tingskipanini
Spyrjari: Páll á Reynatúgvu, løgtingsmaður
Svarari: Jørgen Niclasen, landsstýrismaður í fíggjarmálum
Evni: Ferðaætlanin hjá Hasfjord og Teistanum
Spurningar:
1. Ætlar landsstýrismaðurin at halda fram við verandi ferðaætlan um
Skopunarfjørð, har bæði Hasfjord og Teistin sigla allar dagar í vikuni?
2. Um ikki, hví skal skipanin, sum tykist rigga væl, broytast aftur?
3. Hvør er meirkostnaðurin av verandi skipan?
4. Hvør er meirinntøkan av verandi skipan?
Viðmerkingar:
Nú Ternan hevur røkt siglingina fyri Teistan, meðan Teistin hevur verið til eftirlit,
hevur eisini Hasfjord havt eina betri ferðaætlan. Sjey dagar um vikuna og tveir túrar
afturat dagliga. Henda ferðaætlan hevur verið ein munagóður bati hjá fólki og farmi
um Skopunarfjørð.
Røðirnar á Gomlu Rætt og í Skopun hava verið væl styttri, og trongsulin til
bilparkering á Gomlu Rætt hevur ikki verið so út av lagi. Eisini hevur nøgdsemið
millum brúkararnar, sum dagliga brúka farleiðina, verið nógv betri.
Alt í alt ein nøktandi skipan til Sandoyartunnilin er liðugur.
Tí kundi verið ynskiligt, at verandi sigling hjá Hasfjord og Ternuni helt fram, tá
Teistin aftur er tøkur til siglingina, og til heystfrítíðin er av. Also, at Hasfjord siglir
sum nú, samstundis sum Teistin fer í sína regluligu sigling aftur.
Hóast verandi ferðaætlan riggar væl, so ljóðar, at siglingin aftur skal skerjast, nú
summarfrítíðin er í hondum.
Tí hesar spurningar til landsstýrismannin.
Á Løgtingi, 23. juni 2021
Páll á Reynatúgvu

-- 1 of 1 --