52-166/2020

Dagf. 25. juni 2021
HMR J. nr. 21/11641-9
Kaj Leo Holm Johannesen
landsstýrismaður
Svar
upp á
fyrispurning nr. 52-166/2020 eftir § 52a í tingskipanini um gulu læknahúsini frá Beintu Løwe
Jacobsen, løgtingskvinnu
Spurningurin var soljóðandi:
1. Hvørjar ætlanir eru við læknahúsunum (gulu húsunum), sum hoyra til Klaksvíkar
Sjúkrahús?
2. Hvussu nógvur peningur er settur av á fíggjarlógini til gulu húsini?
Svar:
Til spurning 1
Ein ætlan er um at dagføra læknahúsini, Gulu hús, soleiðis at umsitingin kann flyta úr
starvsfólkabygninginum hjá Klaksvíkar sjúkrahúsi í Gulu hús.
Gomlu læknahúsini, Gulu hús, vórðu bygd í 1923, og eru ogn hjá landinum. Tey liggja í vøkrum
gróðursettum øki. Tey kunnu verða sett í stand, og síðani verða væl egnað til fyrisiting. Talan er um
at útvega 10 skrivstovupláss, fundarhøli, viðtaluhøli, arbeiðsklivar og skjalasavn. Ætlanin er at
innrætta bygningin til at hava umsiting við so fáum broytingum í innrætting, sum til ber, soleiðis at
dámurin á húsunum kann verða varðveittur.
Til spurning 2
Við fíggjarlógini fyri 2021 eru 6 mió. kr. játtaðar til Klaksvíkar sjúkrahús (løgujáttan). Í
ætlanarárunum 2022 eru 5 mió. kr. settar, og í 2023 eru 10 mió. kr. settar sum játtanarupphædd á
kontuni. Við eykajáttan í vár varð ein sonevnd C-átekning fingin á kontuna. Hetta merkir, at tað ber
til at flyta ikki brúkta játtan í 2021 til seinni fíggjarár.

-- 1 of 2 --

Eingin ávís upphædd er enn avsett til Gulu húsini, men farið er í holt við at prosjektera ætlanina við
Gulu húsunum. Tá ið hetta arbeiðið er liðugt, er millum annað ein kostnaðarmeting kend, sum við
øðrum verður brúkt sum grundarlag undir uppskoti til verklagslóg til hesa umbygging. Ætlanin er at
leggja uppskot til verklagslóg fyri Løgtingið í heyst. Í uppskotinum til verklagslóg kemur ein
upphædd at standa, ið ætlandi verður at brúka til Gulu húsini.
Heilsumálaráðið, 25. juni 2021
Kaj Leo Holm Johannesen
landsstýrismaður

-- 2 of 2 --

Skrivligur fyrispurningur
eftir § 52a í Tingskipanini
Spyrjari: Beinta Løwe Jacobsen, løgtingsmaður
Svarari: Kaj Leo Holm Johannesen, landsstýrismaður í heilsumálum
Evni: Gulu læknahúsini
Spurningar:
1. Hvørjar ætlanir eru við læknahúsunum (gulu húsunum), sum hoyra til
Klaksvíkar Sjúkrahús?
2. Hvussu nógvur peningur er settur av á fíggjarlógini til gulu húsini?
Viðmerkingar:
Gomlu læknahúsini norðan fyri Klaksvíkar Sjúkrahús eru í ringum standi. Nógv hevur
verið tosað um, hvat húsini skulu brúkast til, men kortini er onki hent í málinum. Fyri
at fáa greiðu á hvat fer at henda við sokallaðu gulu húsunum verður hesin
fyrispurningur settur.
Á Løgtingi, 15. juni 2021
Beinta Løwe Jacobsen

-- 1 of 1 --