52-163/2020

U T T A N R Í K I S - O G M E N T A M Á L A R Á Ð I Ð
Tinghúsvegur 5-7 • Postrúm 3279 • FO-110 Tórshavn
 +298 30 65 00 •  ummr@ummr.fo • www.ummr.fo
Løgtingið
Tinghúsvegur 1-3
Postboks 208
110 Tórshavn
Dagfesting: 21. juni 2021
Tygara ref.:
Máltal.: 21/08502-8
Svar
upp á
skrivligan fyrispurning nr. 52-163/2020 frá Sirið Stenberg, løgtingskvinnu, til Jenis av
Rana, landsstýrismanni í uttanríkis- og mentamálum, eftir § 52a í Tingskipanini,
um næmingatalið í fólkaskúlaflokkunum.
Fyrispurningurin er soljóðandi:
1. Metir landsstýrismaðurin, at næmingatalið í fólkaskúlaflokkunum er ov høgt?
2. Um ja, eru nakrar ætlanir at minka um næmingatalið í flokkunum og nær?
3. Um nei, eru aðrar broytingar á fólkaskúlaøkinum á veg? Um ja, hvørjar?
Svar
Til 1: Næmingatalið í fólkaskúlaflokkunum er rættiliga ymiskt í skúlunum kring landið. Hetta er
í stóran mun tengt at búsetingarmynstrinum og eisini, um skúli hevur eina skipan við
samanløgdum flokkum. Sostatt skiftir næmingatalið frá einum næmingi í tveimum fólkaskúlum
til 53 næmingar í skúla við samanløgdum flokkum.
Í § 20 í fólkaskúlalógini er ásett, at við skúlaársbyrjan eigur næmingatalið vanliga ikki at fara
upp um 24 næmingar. Miðað verður ímóti at halda seg til hesa meginreglu. Í játtanarskipanini til
fólkaskúlan verður fult tímatal játtað til tveir flokkar, tá ið næmingatalið er 27 næmingar, tó
verða eyka tímar játtaðir, tá ið næmingatalið í einum flokki í 3. – 7. flokki er 25 ella 26
næmingar.
Í verandi skúlaári eru tað 159 flokkar, sum hava 20 næmingar ella fleiri, og er býtið millum hesar
flokkar, at tað eru :
87 flokkar, sum hava 20 – 23 næmingar og
72 flokkar, sum hava 24 – næmingar ella fleiri
Tað kann verða torført at røkka einstaka næminginum, tá ið næmingatalið er høgt í einum flokki.
Vit hava skyldu til at taka atlit at tí einstaka, so at allir næmingar bæði læra og trívast í
fólkaskúlanum. Eg fari at eftirmeta skipanina eisini við atlit at, at næmigatalið er rættiliga høgt í
nógvum flokkum, serliga í skúlum, har stór næmingatilgongd er.

-- 1 of 2 --

U T T A N R Í K I S - O G M E N T A M Á L A R Á Ð I Ð
Tinghúsvegur 5-7 • Postrúm 3279 • FO-110 Tórshavn
 +298 30 65 00 •  ummr@ummr.fo • www.ummr.fo Page 2 of 2
Til 2: Eg fari at eftirkanna skipanina bæði lógarásetingar og játtanarmannagongd. Áðrenn hetta
er gjørt, er valla rætt einvíst at svara ja ella nei. Trivnaður og læring veldst eisini um
samansetingina í flokkinum, førleikarnar hjá tí einstaka næminginum, og um játtaðir eru eyka
tímar til næmingar við serligum avbjóðingum, ella talan er um byrjanarundirvísing, har partvís
tvílæraraskipan verður sett í verk, tá ið næmingatalið er 19 næmingar og fleiri.
Til 3: Samgongan hevur m.a. sett sær fyri, at tillagingar og dygdargóðar broytingar verða
gjørdar í fólkaskúlalógini í sambandi við m. a. floksstødd.
Eg havi sett sjøtul á hetta arbeiðið, har floksstødd verður eitt evni. Harumframt verður
dentur lagdur á at dagføra tíma- og lærugreinabýtið og viðurskifti, sum eru tengd at hesum sum
kravdar lærugreinir, vallærugreinir, býtið millum tær hugvísindaligu og náttúruvísindaligu
lærugreinarnar, og um tær handaligu og skapandi lærugreinarnar hava nóg stóra rúmd í
fólkaskúlanum. Flokslæraraarbeiðið verður eisini raðfest sum partur av trivnaðararbeiðinum og
læringini í einstaka flokkinum, og sum partur av samskiftinum millum heim og skúla og
samskipanini í læraratoymunum.
Vinarliga
Jenis av Rana
landsstýrismaður

-- 2 of 2 --

Skrivligur fyrispurningur
eftir § 52a í Tingskipanini
Spyrjari: Sirið Stenberg, løgtingsmaður
Svarari: Jenis av Rana, landsstýrismaður í uttanríkis- og mentamálum
Evni: Næmingatalið í fólkaskúlaflokkunum
Spurningar:
1. Metir landsstýrismaðurin, at næmingatalið í fólkaskúlaflokkunum er ov høgt?
2. Um ja, eru nakrar ætlanir at minka um næmingatalið í flokkunum og nær?
3. Um nei, eru aðrar broytingar á fólkaskúlaøkinum á veg? Um ja, hvørjar?
Viðmerkingar:
Tað er onki at taka seg aftur í, at fólkaskúlin er ein av grundsúlunum í samfelagnum.
Ein góður fólkaskúli er fortreyt fyri framtíðini hjá okkara børnum og harvið
samfelagnum øllum, og øll ynskja vit ein góðan fólkaskúla.
Samfelagsgongdin seinnu árini hevur havt við sær, at nakrir av smáu skúlunum ikki
eru virknir longur, og vit síggja eisini at nýggju skúlabyggingarnar rúma størri og
størri eindum. Og tíbetur er barnatalið hækkað seinnu árini. Hinvegin frætta vit um
ein sperdan fólkaskúla, at tað er trupult at fáa tillutað tørvsmetta
serundirvísingartímatalið, at skúlaaftran er ein veruleiki, og at tað eru børn, sum hava
trupult við at trívast, og harvið eisini kunnu verða darvað í teirra menning. Tí er
spurningurin, um ein loysn hevði verið, at færri børn vóru í hvørjum flokki, so tað var
betri tíð til einstaka barnið. Hetta hevði uttan iva tænt øllum pørtum, barni, lærara og
samfelagnum øllum. Eitt lægri næmingatal í hvørjum flokki kundi kanska eisini virka
fyribyrgjandi og minka um tørvin á øðrum sertænastum.
Á Løgtingi, 8. juni 2021
Sirið Stenberg

-- 1 of 1 --