52-162/2020

U T T A N R Í K I S - O G M E N T A M Á L A R Á Ð I Ð
Tinghúsvegur 5-7 • Postrúm 3279 • FO-110 Tórshavn
 +298 30 65 00 •  ummr@ummr.fo • www.ummr.fo
Løgtingið
Tinghúsvegur 1-3
Postboks 208
110 Tórshavn
Dagfesting: 21. juni 2021
Tygara ref.:
Máltal.: 21/08502-7
Svar
upp á
skrivligan fyrispurning nr. 52-162/2020 frá Eyðgunn Samuelsen, løgtingskvinnu, til Jenis
av Rana, landsstýrismann, settur eftir § 52 a í Tingskipanini. Um vaksnamannalæra og
trípartasamstarv.
Fyrispurningurin er soljóðandi:
1. Ætlar landsstýrismaðurin at fremja avtalurnar viðvíkjandi yrkisútbúgvingum, ið vóru
gjørdar í trípartasamráðingum í 2019 ?
2. Fer landsstýrismaðurin at taka upp trípartasamráðingar um vaksnamannalæru ?
3. Um ikki, hvørjar ætlanir hevur landsstýrismaðurin viðvíkjandi vaksnamannalæru ?
Svar
Til 1: Avtalurnar, sum vórðu gjørdar í trípartasamráðingunum í 2019 eru umfatandi og umfata
fleiri øki. Síðan eg tók við sum landsstýrismaður havi eg arbeitt støðugt við at menna og tillaga
yrkisútbúgvingarnar, eins og ásett er í samgonguskjalinum. Arbeiðið er grundað á tilmæli um
tillagingar av yrkisútbúgvingarøkinum, sum Yrkisútbúgvingarráðið gjørdi í 2018, og sum
trípartasemjan eisini byggir á. Tað er greitt, at fleiri av málunum krevja at vera lýst nærri, og tað
er eitt arbeiði, sum er í gongd á útbúgvingarøkinum.
Til 2: Eg havi ongar ætlanir um at taka upp samráðingar um vaksnamannalæru í løtuni. Arbeitt
verður longu við vaksnamannaútbúgving á ymsan hátt, og við støði í lógini um førleikameting frá
2014 og kunngerðini frá 2018 er møguligt hjá vaksnum, sum ynskja sær prógv innan yrkið, tey
arbeiða í, at verða førleikamett, og á tann hátt fáa stytt um útbúgvingartíðina. Hetta verður gjørt í
tøttum samstarvi við útbúgvingarstovnar og arbeiðsmarknaðarpartar.
Til 3: Vaksin og tilkomin hava møguleika at taka útbúgving og at førleikamenna seg á vinnu-
og miðnámsskúlunum og á Fróðskaparsetrinum, umframt at fleiri tilboð eru innan
frítíðarundirvísing til dømis við atliti at undirvísing í føroyskum fyri tilflytarum, stakgreinalestri á
miðnámsstigi, skeiðum innan sigling og landbúnað umframt lærugreinum á 10. floksstigi.
Harumframt eru fleiri møguleikar fyri førleikameting, og hetta er eitt øki, sum eg ætli at raðfesta
framyvir í samstarvi við avvarðandi partar.

-- 1 of 2 --

U T T A N R Í K I S - O G M E N T A M Á L A R Á Ð I Ð
Tinghúsvegur 5-7 • Postrúm 3279 • FO-110 Tórshavn
 +298 30 65 00 •  ummr@ummr.fo • www.ummr.fo Page 2 of 2
Vinarliga
Jenis av Rana
landsstýrismaður

-- 2 of 2 --

Skrivligur fyrispurningur
eftir § 52a í Tingskipanini
Spyrjari: Eyðgunn Samuelsen, løgtingsmaður
Svarari: Jenis av Rana, landsstýrismaður
Evni: Vaksnamannalæra og trípartasamstarv
Spurningar:
1. Ætlar landsstýrismaðurin at fremja avtalurnar viðvíkjandi yrkisútbúgvingum,
ið vóru gjørdar í trípartasamráðingum í 2019 ?
2. Fer landsstýrismaðurin at taka upp trípartasamráðingar um vaksnamannalæru ?
3. Um ikki, hvørjar ætlanir hevur landsstýrismaðurin viðvíkjandi
vaksnamannalæru ?
Viðmerkingar:
Tann 24. juni 2019 undirskrivaði táverandi landsstýri eina avtalu um
yrkisútbúgvingarøkið við Føroya Arbeiðsgevarafelag/Føroya Handverksmeistarafelag
og Landsfelag Handverkaranna/Føroya Handverkarafelag/Starvsmannafelagið.
At partarnir á arbeiðsmarknðinum og landsstýrið gjørdu eina tílíka semju var
nýskapandi og slóðbrótandi fyri føroyska arbeiðsmarknaðin. Slík semja um mál av
felags áhuga er við til framhaldandi menning av føroyska arbeiðsmarknaðinum, so hann
kann tillagast broytingum í samfelagnum.
Trípartasemjan millum landsstýrið, arbeiðsgevarar og fakfeløgini fevndi m.a. um
viðurskifti hjá lærlingum, fleiri læru- og praktikkpláss innan tað almenna,
konjunkturjavnandi amboð av landsvegahaldi og umvæling av almennum bygningum,
og um treytir í sambandi við útbjóðing við tí endamáli at útbúgva vinnuna.
Avtalað varð eisini, at farast skuldi undir eina nýggja trípartasamráðing á heysti 2019.
Henda samráðing skuldi snúgva seg um at finna felags stev í samband við
vaksnamannalæru. Landsstýrið fekk í 2018 handað Álit um vaksnamannaútbúgving og
arbeiðsmarknaðardepil við tilmælum um, hvussu vaksnamannalæra kann skipast í
Føroyum. Sambært álitinum er tørvurin á vaksnamannalæru stórur, tí
arbeiðsmarknaðurin og tey krøv, ið verða sett til førleikar hjá tí einstaka, broytast
støðugt.
Kortini má staðfestast, at fleiri av átøkunum í avtaluni tíverri enn ikki hava sæð dagsins
ljós, og at harafturat hoyrist einki um, at eitt nýtt umfar av trípartasamráðingum er tikið
upp um vaksnamannalæru.
Á Løgtingi, 8. juni 2021
Eyðgunn Samuelsen

-- 1 of 1 --