52-152/2020

-- 1 of 1 --

Skrivligur fyrispurningur
eftir § 52a í Tingskipanini
Spyrjari: Aksel V. Johannesen, løgtingsmaður
Svarari: Bárður á Steig Nielsen, løgmaður
Evni: Koppseting
Spurningar:
1. Heldur løgmaður, at tað ber til at hava ein landsstýrismann, sum gongur ímóti
tilmælunum frá heilsumyndugleikanum og landsstýrinum um at lata seg
koppseta?
2. Heldur løgmaður, at útmeldingin hjá landsstýrismanninum, Jenisi av Rana,
kann fáa óhepnar fylgjur fyri koppsetingartilgongdina?
Viðmerkingar:
Jenis av Rana, landsstýrismaður, segði við Vágaportalin í gjár, at hann fer ikki at lata
seg koppseta fyri koronu. Óvissurnar eru ov nógvar, og hann kennir seg ikki nóg
tryggan, sigur hann.
Hesin sami landsstýrismaður hevur sjálvur staðið á beinleiðis sjónvarpaðum
tíðindafundum, har landsstýrið hevur stongt Føroyar fyri at verja fólkið móti koronu.
Hetta hevur verið dýrt peningaliga og menniskjaliga – ikki minst fyri tey mongu
eldru, sum hava sitið avbyrgd í langa tíð.
Tilmælini frá heilsumyndugleikunum eru greið. Skulu vit basa koronu og fáa okkara
frælsi aftur er neyðugt, at vit koppseta okkum, so vit sum samfelag fáa
floksimmunitet.
Sambært serfrøðini er altíð ein váði við koppsetingum, men váðin er lítil. Og nú tá tey
gomlu, sjúku og veiku hava latið seg koppsett og ofrað sítt fyri felagsskapin, so kemur
landsstýrismaðurin sum ketta úr høvdatrog og sigur teimum, at tað, tey hava gjørt, er
so mikið vandamikið, at hann sjálvur ikki ætlar at gera tað sama. Hann hevur ongar
ætlanir um at ofra seg sjálvan fyri felagsskapin.
Sambært okkara heilsumyndugleikum og heimsheilsustovninum WHO er vandin at
doyggja ella verða raktur av langtíðarárinum av koronu nógvar ferðir størri enn ein
teoretiskur møguleiki fyri at fáa álvarsom langtíðarárin av koppseting.
Um fólk gera eins og landsstýrismaðurin ger, høvdu kostirnir verið tvinnir.
Annaðhvørt avbyrging av okkara veikastu og ógvusligum stongsli av samfelagnum í
nógv ár, ella latið koronusmittuna ferðast frítt í samfelagnum við teimum ógvusligu
fylgjum, sum tað nú einaferð hevði havt.

-- 1 of 2 --

Avgerðin hjá landsstýrismanninum – og at hann boðar frá henni alment – ger
sjálvandi, at onnur kunnu fara at aftra seg við koppseting.
Her er ein landsstýrismaður, ið beinleiðis gongur móti tilmælum, sum okkara og
alheimsserfrøðin innan heilsuøkið mælir til. Við síni útmelding gongur
landsstýrismaðurin ímóti tilmælunum hjá bæði serfrøðini og landsstýrinum sjálvum.
Tí hesar spurningar til løgmann.
Á Løgtingi, 20. mai 2021
Aksel V. Johannesen

-- 2 of 2 --