52-150/2020

U T T A N R Í K I S - O G M E N T A M Á L A R Á Ð I Ð
Tinghúsvegur 5-7 • Postrúm 3279 • FO-110 Tórshavn
 +298 30 65 00 •  ummr@ummr.fo • www.ummr.fo
Løgtingið
Tinghúsvegur 1-3
Postboks 208
110 Tórshavn
Dagfesting: 30. mai 2021
Tygara ref.:
Máltal.: 21/08502-2
Svar
upp á
skrivligan fyrispurning nr. 52-150/2020 frá Anniku Olsen, løgtingskvinnu, um ognirnar í
Hoydølum og søla/makaskifti av Venjingarskúlanum, settur Jenis av Rana,
landsstýrismanni í uttanríkis- og mentamálum (eftir § 52a í Tingskipanini)
Fyrispurningurin er soljóðandi:
1. Eru framvegis samráðingar millum Uttanríkis- og mentamálaráðið og Tórshavnar
kommunu um ognirnar í Hoydølum?
2. Um ja, hvat ítøkiliga er ætlanin, at Hoydalar skulu brúkast til?
3. Er landsstýrið áhugað í at keypa tey 40% av Venjingarskúlanum frá kommununi til
Fróðskaparsetrið?
4. Um ikki, kundi eitt makaskifti so ístaðin komið upp á tal fyri jørð við Stórutjørn?
Svar
Til 1: Ja, samráðingar eru enn millum Tórshavnar kommunu og Uttanríkis- og mentamálaráðið
um ognirnar í Hoydølum.
Til 2: Landsstýrið hevur ikki ítøkiligar ætlanir fyri Hoydalar annað enn tað virksemi, ið er har nú.
Hvørjar ætlanir kommunan hevur, er ein spurningur, ið kommunustýrið í Tórshavn má svara.
Til 3: Ja. Ognirnar á Frælsinum hava verið og verða framvegis nýttar til partar av virkseminum
hjá Fróðskaparsetri Føroya. Sambært kampusætlanini skal nýtt kampus til Fróðskaparsetur Føroya
byggjast á Frælsinum.
Til 4: Tíðliga í tilgongdini var ætlanin at gera eitt makaskifti við kommununa. Ætlanin var tá, at
kommunan læt landinum sín part av ognunum á Frælsinum og afturfyri fekk ein part av lendinum
við Stórutjørn. Ráðið ráðførdi seg við Búnaðarstovuna, ið umsitur landsjørðina, og har vóru boðini,
at eitt tílíkt makaskifti ikki var gjørligt, tí at tað var í stríð við galdandi løgtingslóg um landsjørð.
Henda ætlan um makaskifti varð tí slept.
Vinarliga
Jenis av Rana
landsstýrismaður

-- 1 of 1 --

Skrivligur fyrispurningur
eftir § 52a í Tingskipanini
Spyrjari: Annika Olsen, løgtingsmaður
Svarari: Jenis av Rana, landsstýrismaður í uttanríkis- og mentamálum
Evni: Ognirnar í Hoydølum og søla/makaskifti av Venjingarskúlanum
Spurningar:
1. Eru framvegis samráðingar millum Uttanríkis- og mentamálaráðið og Tórshavnar kommunu
um ognirnar í Hoydølum?
2. Um ja, hvat ítøkiliga er ætlanin, at Hoydalar skulu brúkast til?
3. Er landsstýrið áhugað í at keypa tey 40% av Venjingarskúlanum frá kommununi til
Fróðskaparsetrið?
4. Um ikki, kundi eitt makaskifti so ístaðin komið upp á tal fyri jørð við Stórutjørn?
Viðmerkingar:
Sitandi býráðsmeiriluti í Havn hevur verið frammi við eini ætlan um at byggja íbúðir í Hoydølum.
Samskifti hevur verið millum kommununa og Uttanríkis- og mentamálaráðið um eitt makaskifti, har
kommunan skuldi lata Venjingarskúlan til landið afturfyri bygningarnar í Hoydølum. Borgarstjórin
var frammi í miðlunum um, at fyrst í februar skuldi arbeiðsbólkurin vera komin til eina niðurstøðu
um, at Hoydalar skuldu vera bústaðarøki. Enn er ongin almenn niðurstøða komin, og áhugavert er tí
at vita, um hendan ætlanin er slept.
Hoydalar eru størsta frílendisøki í landinum, og longu í 1996 varð økið friðað sambært serstakari
byggisamtykt, tí økið er serligt í náttúruhøpi, siðsøguligt og ikki minst fornfrøðiliga áhugavert. Í
2010 varð semja gjørd millum land og kommunu um, at Hoydalar skuldu gerast frílendi eftir eini
serligari frílendisætlan. Økið hevur tí ongantíð verið ætlað til bústaðir til nøkur fá, men heldur til
eitt øki, ið allir borgarar frítt kunnu njóta. Landið eigur bygningarnar í Hoydølum, og hevur tískil
eisini ábyrgd av, at hesir verða víðlíkahildnir.
Tórshavnar kommuna eigur 40% av Venjingarskúlanum og eru tað hesi 40%, sum kommunan ætlar
at lata Uttanríkis- og mentamálaráðnum fyri bygningarnar í Hoydølum. At Uttanríkis- og
mentamálaráðið fær tey 40 % av Venjingarskúlanum kann tykjast upplagt, tí økið kring
Venjingarskúlan er ætlað til nýtt kampus. Har er longu semja undirritað millum kommununa og
Uttanríkis- og mentamálaráðið.
Heldur enn at gera gera eitt makaskifti við Hoydalar, kundi landið keypt kommununar part av
Venjingarskúlanum, har kommunan so t.d. kundi ognað sær lendið við Stórutjórn fyri pengarnar.
Umfatandi heildarætlan og arkitektakapping er gjørd fyri Stórutjórn, har ein fullfíggjað íbúðarætlan
fyriliggur til eini 1.500-1.800 borgarar. Har kann býráðið, um tað vil, fara í gongd beinanvegin við
at fáa til vegar íbúðir og grundstykkir til tey, sum mangla bústaðir.

-- 1 of 2 --

Á Løgtingi, 19. mai 2021
Annika Olsen

-- 2 of 2 --