52-141/2020

Dagf. 18. mai 2021
HMR J. nr. 21/07820-3
Kaj Leo Holm Johannesen
landsstýrismaður
Svar
upp á
Fyrispurning nr. 52-141/2020 eftir § 52a í tingskipanini um viðgerð fyri barnloysi, frá Ingilín
Didriksen Strøm, løgtingskvinnu
Fyrispurningurin er soljóðandi:
1. Kann landsstýrismaðurin grundgeva fyri, hví rundskriv nr. 9000 frá 2004 um stevnumið
viðvíkjandi viðgerð móti barnloysi varð sett úr gildi í september í fjør?
2. Kann landsstýrismaðurin greiða frá, hvørjar reglur eru galdandi fyri tey, ið ynskja at sleppa í
viðgerð fyri barnloysi?
Til spurning 1 og 2
Í dag eru ongar formligar leiðreglur galdandi, tá ið tað viðvíkur viðgerð móti barnloysi. Talan er um
eina viðgerð í sjúkrahúsverkinum og tí kann vísast til galdandi sjúkrahúslóg.
Umfarsskrivið, sum viðvíkti viðgerð móti barnloysi, var sett í gildi tann 1. mai 2003, men var sett úr
gildi aftur á heysti 2006 av tásitandi landsstýrismanni. Av misgáum er umfarsskrivið síðani lagt á
heimasíðuni logir.fo. Feilurin varð rættaður í september í fjør. Orsøkin, til at umfarsskrivið varð sett
úr gildi í 2006, var, at tað løgfrøðiliga ikki var mett rætt at nýta eitt umfarsskriv sum grundarlag fyri
avgerðum, um hvør hevði rætt til viðgerð móti barnloysi, men at hetta í staðin skuldi ásetast við lóg.
Síðani tá er tað politiskt ikki lagt nakað lógaruppskot fyri Løgtingið, men sjúkrahúsverkið hevur
umsitið økið sambært praksis á økinum, og hevur fíggjað upp til tvey felags børn fyri barnleys pør.
Landsstýrismaðurin hevur ætlanir um at fara í Løgtingið komandi tingsetu við einum lógaruppskoti,
sum viðvíkur viðgerð móti barnloysi.
Heilsumálaráðið, 18. mai 2021
Kaj Leo Holm Johannesen
landsstýrismaður

-- 1 of 1 --

Skrivligur fyrispurningur
eftir § 52a í Tingskipanini
Spyrjari: Ingilín Didriksen Strøm, løgtingsmaður
Svarari: Kaj Leo Holm Johannesen, landsstýrismaður í heilsumálum
Evni: Viðgerð fyri barnloysi
Spurningar:
1. Kann landsstýrismaðurin grundgeva fyri, hví rundskriv nr. 9000 frá 2004 um
stevnumið viðvíkjandi viðgerð móti barnloysi varð sett úr gildi í september í
fjør?
2. Kann landsstýrismaðurin greiða frá, hvørjar reglur eru galdandi fyri tey, ið
ynskja at sleppa í viðgerð fyri barnloysi?
Viðmerkingar:
Fleiri menn og kvinnur kunnu koma út fyri, at tað er trupult at gerast við barn. Tíbetur
finst viðgerð fyri barnloysi, og fleiri uppliva at gerast við barn eftir at hava verið í
viðgerð eina tíð. Hetta er eitt nógv umrøtt evni í londunum rundan um okkum, tí talan
er um eina heldur dýra viðgerð, har fólk í summum førum sjálvi noyðast at standa fyri
rokningini.
Av tilvild gjørdist undirritaða varug við, at rundskriv nr. 9000 frá 4. februar 2004 um
viðgerð móti barnloysi varð sett úr gildi í september í fjør.1 Rundskrivið staðfesti
millum annað, at tað almenna fíggjar viðgerðina fyri upp til felags tvey børn fyri
barnleys pør. Harafturat er eisini sett sum treyt, at einans hjún kunnu fáa viðgerð fyri
barnloysi.
Fyri at fáa greiðu á, hvørjar reglur eru galdandi fyri viðgerð fyri barnloysi í dag,
verður hesin fyrispurningur settur.
Á Løgtingi, 5. mai 2021
Ingilín Didriksen Strøm
1 https://logir.fo/Rundskriv/9000-fra-04-02-2004-um-stevnumid-vidvikjandi-vidgerd-moti-barnloysi

-- 1 of 1 --