52-133/2020

FISKIMÁLARÁÐIÐ
M i n i s t r y o f F i s h e r i e s
Y v i r i v i ð S t r o n d 1 5 • P . O . B o x 3 4 7 • F O - 1 1 0 T ó r s h a v n • F a r o e I s l a n d s
T e l . ( + 2 9 8 ) 3 5 3 0 3 0 • f i s k @ f i s k . f o • w w w . f i s k . f o
Løgtingið
Tinghúsvegur 1-3
Postboks 208
110 Tórshavn
5. mai 2021
Mál: 21/06913-2
(at tilskila í svari)
Tygara skriv: 133/2020
Svar til § 52a fyrispurning nr. 52-133/2020 frá Eyðgunn Samuelsen, løgtingsmanni,
um troling innan fyri 12 fjórðingar og støðuna í útróðrarflotanum.
Spurningar:
1. Hvat er orsøkin til, at landsstýrismaðurin nú ætlar at loyva trolarum inn um 12
fjórðingar at kappast við útróðurin í eitt munandi longri tíðarskeið enn í dag?
2. Metir landsstýrismaðurin, at hetta er í samsvari við umsitingarætlanina, ið skal
tryggja burðardygga veiðu?
3. Kann landsstýrismaðurin greiða nærri frá, hví royndarverkætlanin millum aktørar í
bólki 4 T, Faroe Islands Sustainable Fishing (FISF) og Havstovuna, ið skuldi vera
3 ár, ikki er grundarlag fyri kunngerðarbroytingini longur?
4. Kann landsstýrismaðurin útgreina, hví kunngerðin skal lýsast við einum
lívfrøðiligum grundarlagi frá Havstovuni 12. januar, tá ið Fiskivinnuráðið, ið
umboðar vinnuna, talar ímóti?
5. Kann landsstýrismaðurin vátta, at Havstovan ynskir hesa kunngerð lýsta?
6. Kann landsstýrismaðurin upplýsa, hvussu nógv hoyringarskriv viðmæla og
mótmæla kunngerðini?
Svar til nr. 1.
Málið er tikið upp, tí Felagið Trolbátar hevur heitt á Fiskimálaráðið um at gera tvær
broytingar í kunngerðini um trolveiði innan fyri 12 fjórðingar, so loyvt verður at trola innan
fyri 12 fjórðingar árið út, samstundis sum ásett verður, hvussu nógvar dagar hvør bátur
kann royna innan fyri 12 fjórðingar.
Svar til nr. 2.
Trolfiskiskapurin innan fyri 12 fjórðingar er ætlaður at leggja til rættis fyri, at tilfeingið av
flatfiski í føroyskum sjógvi verður gagnnýtt. Við umsitingarætlanini, sum hevur verið

-- 1 of 3 --

FISKIMÁLARÁÐIÐ
2/3
umrødd seinastu árini, verður harafturímóti miðað ímóti at skipa fiskiskapin eftir serliga
toski, hýsu og upsa.
Í nýggju kunngerðini um trolfiskiskap innan fyri 12 fjórðingar er ásett, at talið av
fiskidøgum, sum hvør trolbátur sær kann fiska innan fyri 12 fjórðingar, er avmarkað til talið
av døgum, sum bátarnir í miðal hava fiskað innan fyri 12 fjórðingar í 2020. Á hesum
grundarlagnum verður mett, at verandi kunngerð er í samljóði við umsitingarætlanina, sum
fiskidagarnir verða ásettir eftir.
Svar til nr. 3.
Sum skilst verður í hesum spurninginum sipað til eina verkætlan, sum Havstovan stendur
fyri. Verkætlanin er m.a. fíggjað við stuðli frá Fiskivinnuroyndum árini 2021-2024.
Umframt Fiskivinnuroyndir fíggja Havstovan, Felagið Trolbátar og Faroe Islands
Sustainable Fishery (FISF) verkætlanina. Felagið Trolbátar hava í einum hoyringarsvari í
januar 2021 víst til verkætlanina.
Sambært umsóknini og játtanarskrivinum um fígging frá Fiskivinnuroyndum er her talan
um eina verkætlan at økja um vitanina um útbreiðslu, lívfrøði og fiskiskap av reyðsprøku
og tungu undir Føroyum við tí fyri eyga at gera eina stovnsmeting av nevndu fiskasløgum,
sum kann nýtast í eini framtíðar umsókn til MSC góðkenning.
Frá Fiskimálaráðsins síðu hevur ikki verið ætlanin at bíða við at taka stig til hóskandi
broytingar í skipanini av trolfiskiskapinum innan fyri 12 fjórðingar, til úrslitini frá hesi
verkætlan eru gjørd upp og tøk til nýtslu.
Svar til nr. 4.
Uppskotið til broytingar í skipanini fyri trolveiðu innan fyri 12 fjórðingar hevur verið til
hoyringar í trimum umførum.
Í fyrstu og triðju hoyring vóru sjónarmiðini hjá Fiskivinnuráðnum, at fiskiskapurin hjá
trolbátum innan fyri 12 fjórðingar ikki skal økjast, samstundis sum ávísir limir í ráðnum
(Fiskimannafelagið, Meginfelag Útróðrarmanna og feløgini hjá arbeiðsfólki á landi) hava
talað ímóti at gera broytingar í skipanini og mælt til skerjingar av fiskidagatalinum. Tá
hoyringarsvarið hjá Havstovuni frá januar 2021, har mælt varð til at loyva troling innan fyri
12 fjórðingar sum ásett í tí nú lýstu kunngerðini, var til hoyringar (onnur hoyring), segði
Fiskivinnuráðið seg harafturímóti tó ikki hava viðmerkingar til niðurstøðuna hjá
Havstovuni um ásetingarnar um leiðir og tíðarskeið.
Sjónarmiðini hjá Fiskivinnuráðnum undir einum hava sostatt ikki verið greitt fyri ella ímóti,
tó at einstakir limir í ráðnum hava verið greitt ímóti ætlaðu broytingunum.
Av fyrstan tíð var ætlanin at loyva trolbátunum at trola innan fyri 12 fjórðingar alt árið – tó
eitt avmarkað tal av døgum. Ætlanin at loyva fiskiskapi alt árið varð slept til frama fyri
tilmælinum frá Havstovuni, sum síðani er brúkt sum grundarlag undir ásetingunum um
leiðir og tíðarskeið í tí nú lýstu kunngerðini.

-- 2 of 3 --

FISKIMÁLARÁÐIÐ
3/3
Tikið samanum er broytingin sostatt endað við eini miðloysn, grundað á tilmælið frá
Havstovuni, samanborið við politisku ætlanina upprunaliga og sjónarmiðini hjá serliga
útróðrarflotanum um avmarkingar í trolingini á landleiðini.
Eftir mínum tykki er á henda hátt funnin ein loysn, sum tekur hædd fyri ymiskum
sjónarmiðum, har ongin partur tó hevur fingið alt sítt gjøgnumført.
Svar til nr. 5.
Uppskot til broytta kunngerð um troling innan fyri 12 fjórðingar varð sent m.a. Havstovuni
til hoyringar. Í svari sínum í januar skjýtur Havstovan upp tær leiðir og tíðarskeið, sum
seinni eru sett inn í uppskotið. Í hoyringarsvari í apríl vísir Havstovan á, at hon heldur fast
við tilmælið, sum varð givið í januar.
Svar til nr. 6.
Fiskimálaráðið fekk 9 hoyringarskriv, eftir at uppskotið til kunngerð varð sent til hoyringar
26. mars 2021. Harumframt hevur Meginfelag Útróðrarmanna latið egnar viðmerkingar
saman við hoyringarskrivi frá Fiskivinnuráðnum, har felagið mótmælir kunngerðini. Í fýra
av teimum 9 skrivunum verður mótmælt broytingunum í skipanini um troling innan fyri 12
fjórðingar, í tveimum skrivum verður tikið undir við uppskotinum, í øðrum tveimum
verður mælt til ávísar tillagingar, meðan tað í tí eina skrivinum verður viðmerkt, at tað ikki
er rætt, at fiskiskapurin hjá trolbátunum innan fyri 12 fjórðingar økist.
Jacob Vestergaard
landsstýrismaður

-- 3 of 3 --

Skrivligur fyrispurningur
eftir § 52a í Tingskipanini
Spyrjari: Eyðgunn Samuelsen, løgtingsmaður
Svarari: Jacob Vestergaard, landsstýrismaður í fiskivinnumálum
Evni: Troling innanfyri 12 fjórðingar og støðan í útróðrarflotanum
Spurningar:
1. Hvat er orsøkin til, at landsstýrismaðurin nú ætlar at loyva trolarum inn um 12
fjórðingar at kappast við útróðurin í eitt munandi longri tíðarskeið enn í dag?
2. Metir landsstýrismaðurin, at hetta er í samsvari við umsitingarætlanina, ið skal
tryggja burðardygga veiðu?
3. Kann landsstýrismaðurin greiða nærri frá, hví royndarverkætlanin millum
aktørar í bólki 4T, Faroe Island Sustainable Fishing (FISF) og Havstovuna, ið
skuldi vera 3 ár, ikki er grundarlag fyri kunngerðarbroytingini longur ?
4. Kann landsstýrismaðurin útgreina, hví kunngerðin skal lýsast við einum
lívfrøðiligum grundarlag frá Havstovuni 12. januar, tá ið Fiskivinnuráðið, ið
umboðar vinnuna, talar ímóti?
5. Kann landsstýrismaðurin vátta, at Havstovan ynskir hesa kunngerð lýsta?
6. Kann landsstýrismaðurin upplýsa, hvussu nógv hoyringarskriv viðmæla og
mótmæla kunngerðini?
Viðmerkingar:
Meginfelag Útróðrarmanna óttast, at avleiðingin av at loyva trolbátunum inn um 12
fjórðingar fer at troka útróðrarbátarnar burtur og harvið leggja stein oman á byrðu hjá
útróðrarflotanum. Henda ætlan økir um vandan fyri, at útróðurin fer fyri bakka.1
Ein onnur avleiðing er, at veiðitrýstið økist, og smærru útróðrarbátarnir verða trýstir
nærri landi. Hetta kann hava óhepnar avleiðingar fyri ungfiskin. Hetta er ikki í
samsvari við umsistingarætlanina, ið skal tryggja burðardygga veiðu, ið øll skipanin
er samd um.
Viðurskiftini hjá útróðrarflotanum eru alt annað enn góð. Eingin hjálparpakki var til
útróðrarflotan, tá ið fiskaprísirnir fóru í botn orsakað av koronu. Útróðrarflotin kom
heldur ikki upp í part, tá ið makrelurin varð útlutaður.
1 http://kvf.fo/netvarp/uv/2021/04/23/m-trurin-verur-stri-taparin

-- 1 of 2 --

Heldur enn at gera ilt verri hjá útróðrarflotanum, átti samgongan at havt fokus á,
hvussu vit kunnu hjálpa útróðrarflotanum at fóta sær aftur, nú koronukreppan er um at
hæsa av.
Á Løgtingi, 26. apríl
Eyðgunn Samuelsen

-- 2 of 2 --