52-123/2020

Dagf. 4. mai 2021
HMR J. nr. 21/06637-9
Kaj Leo Holm Johannesen
landsstýrismaður
Svar
upp á
Fyrispurning nr. 52-123/2020 eftir § 52a í tingskipanini um koronupass, frá Bjarna Kárason
Petersen, løgtingsmanni
Fyrispurningurin er soljóðandi:
1. Hvussu fer talgilda koppsetingarkvittanin / koronupassið at rigga?
2. Fer talgilda koppsetingarkvittanin / koronupassið at vera grundarlag fyri, hvat borgarar í
landinum hava atgongd til í mun til almenn og privat frítíðar- og mentanartilboð, vørur og
tænastur annars?
3. Kunnu fólk uttan koppsetingarkvittan / koronupass verða noktaði atgongd til ávís tilboð,
vørur ella tænastur?
Til spurning 1:
Føroysku stjórnarráðini hava seinnu tíðina verið í samskifti við bæði danskar myndugleikar og fólk
úr ES-kervinum um møguleikarnar fyri at fáa eitt altjóða góðkent koronupass til føroyingar. Eitt
slíkt koronupass skal lúka nakrar treytir og standardir, sum ES-londini seta, og okkum kunnugt
verður talan um eina skipan við nationalum loysnum við sínámillum góðkenning.
Sjúkrahúsverkið hevur í hesum sambandi víst á teir møguleikar, sum eru í bókingarskipanini, sum
flutningsfyritøkan Smyril Line hevur ment saman við Sjúkrahúsverkinum, til at skipa
koppsetingarnar í Føroyum. Bókingarskipanin hevur eina loysn innbygda, sum gevur møguleika at
skriva út kvittan til fólk, tá tey eru liðugt koppsett.
Heilsumálaráðið hevur heitt á Sjúkrahúsverkið um at kanna, hvørji krøv verða sett í Danmark, fyri
at ein kvittan, ið vísur, at ein er liðugt koppsettur fyri korona, passar inn í danska
koronukoppsetingarpassið. Hetta arbeiðið er tikið upp við danska Digitaliseringsstyrelsen.

-- 1 of 2 --

Til spurning 2 og 3:
Ongar ætlanir eru um, at ein talgild koppsetingarkvittan ella eitt korunupass skal vera grundarlag
fyri, hvat borgarar í landinum hava atgongd til í mun til almenn og privat frítíðar- og
mentanartilboð, vørur og tænastur annars, ella skulu verða noktaði atgongd til tilboð.
Heilsumálaráðið, 4. mai 2021
Kaj Leo Holm Johannesen
landsstýrismaður

-- 2 of 2 --

Skrivligur fyrispurningur
eftir § 52a í Tingskipanini
Spyrjari: Bjarni Kárason Petersen, løgtingsmaður
Svarari: Kaj Leo Holm Johannesen, landsstýrismaður í heilsumálum
Evni: Koronupass
Spurningar:
1. Hvussu fer talgilda koppsetingarkvittanin / koronupassið at rigga?
2. Fer talgilda koppsetingarkvittanin / koronupassið at vera grundarlag fyri, hvat
borgarar í landinum hava atgongd til í mun til almenn og privat frítíðar- og
mentanartilboð, vørur og tænastur annars?
3. Kunnu fólk uttan koppsetingarkvittan / koronupass verða noktaði atgongd til
ávís tilboð, vørur ella tænastur?
Viðmerkingar:
Danskir myndugleikar hava ment eitt koronupass, sum er eitt skjalprógv fyri, at fólk
eru liðugt koppsett ella eru kannaði fyri COVID-19. Koronupassið gevur fólki
atgongd til kaffistovur, matstovur og mentanartilboð. Passið skal m.a. nýtast, um
mann skal til frisør, uttanlandsferðir ella vitjanir á forngripa-, lista- og bókasøvnum.
Heldur mann ikki reglurnar um koronupass, kann mann fáa bót.
Landsstýrismaðurin hevur boðað frá, at heilsuverkið eisini arbeiðir við eini líknandi
skipan, men enn er ikki greitt, hvørjar eginleikar koronupassið fer at hava, og hvørjar
prinsippiellar avleiðingar tað fær fyri viðurskiftini millum borgaran og breiðara
samfelagið. Tað er ikki nágreinað, um koronupassið eitt nú bert skal brúkast í
sambandi við ferðing uttanlands, ella um tað eisini verður grundarlag fyri, hvat
virksemi og hvørjar tænastur borgarin hevur atgongd til í samfelagnum. Heldur ikki er
greitt, hvørjar avleiðingar tað fær fyri borgarar, ið ikki lata seg koppseta, ella av aðrari
orsøk ikki útvega sær koronupass.
Á Løgtingi, 21. apríl 2021
Bjarni Kárason Petersen

-- 1 of 1 --