52-104/2020

F Í G G J A R M Á L A RÁ Ð I Ð
Ministry of Finance
Tinganes • Box 2039 • FO-110 Tórshavn
 (+298) 35 20 20 •  fmr@fmr.fo • www.fmr.fo
Løgtingið
Tinghúsvegur 1-3
Postboks 208
110 Tórshavn
Tórshavn, tann: 26. mars 2021
J. nr.: 21/00134
Viðgjørt: AP
Svar upp á fyrispurning nr. 52-104/2020 frá Branduri Sandoy, løgtingsmanni, settur
Jørgeni Niclasen, landsstýrismanni í fíggjarmálum, um koyrikort.
Fyrispurningurin er soljóðandi:
1. Hví missa fólk, sum hava fingið rættindini at koyra bil til tey eru 70 ár, hesi rættindi,
sjálvt um tey ikki hava brotið lógina?
2. Er talan um ivamál í tulkingum av lógarteksti, ella er lógin púra greið hesum viðvíkjandi?
3. Hevur landsstýrismaðurin ætlanir um at broyta lógina ella Akstovan fyrisitingarpraksis,
soleiðis at tey, sum hava vunnið sær rættindi at hava koyrikort til tey eru fylt 70 ár, ikki
missa hesi rættindi, um so er, at tey ikki forbróta seg ímóti ferðslulógini?
Svar til fyrispurning nr. 1
Í 2013 bleiv ES-fyriskipanin um koyrikort (2006/126/EF) sett í gildi fyri øll limalond í ES. Hetta
hevði við sær, at m.a. gildistíðin hjá koyrikortum varð stytt. Um føroyska koyrikortið framhaldandi
skal lúka altjóða treytir, er neyðugt, at lógir og kunngerðir á ferðsluøkinum javnan verða dagførdar.
Hetta var eisini orsøkin til, at broytingarnar um m.a. gildistíð hjá koyrikortum, blivu framdar í
ferðslulógini í 2014.
Talan er um eina fyrisitingarliga endurnýggjan av koyrikortinum, tá tað kemur til bólk A, B og
B/E. Hetta merkir, at umsøkjarin skal lata inn umsókn og mynd til Akstovuna. Myndin skal vera
tíðarbær. Talan er ikki um endurnýggjan av koyrirættinum ella líknandi. Umsøkjarin varðveitir
sostatt koyrirættin til koyrikortbólk A, B ella B/E, eins og áður broytingina í ferðslulógini í 2017,
tvs. til viðkomandi er fyltur 75 ár.
Endamálið við at seta ásetingarnar í gildi var at avmarka vandan fyri skjalafalsan av koyrikortinum,
tí koyrikortið er eitt alment samleikaprógv.
ES-fyriskipanin mælti til, at gildistíðin fyri koyrikortbólkarnar A, B og B/E varð 10 ár, men at
limalondini sjálvi kunnu velja at áseta eina gildistíð á 15 ár. Danmark valdi at áseta eina 15 ára
gildistíð, og tí varð eisini mælt til, at Føroyar fylgdi hesum leisti.
Gildistíðin fyri koyrikort til bólkarnar C, D og E bleiv við lógarbroytingini í 2014, orsakað av ES-
fyriskipanini, broytt til 5 ár. Mælt varð til, at Føroyar fylgdi hesum eins og tað varð gjørt í sambandi

-- 1 of 2 --

F Í G G J A R M Á L A R Á Ð I Ð
Ministry of Finance
2/2
við gildistíðina fyri koyrikortbólkarnar A, B og B/E. Fyri at endurnýggja koyrikortið til
koyrikortbólkar C, D og E krevst ein læknaváttan, sum skjalprógvar, at umsøkjarin framvegis lýkur
tey heilsukrøv, sum verða sett til hesar bólkar. Harumframt skal umsøkjarin lata inn eina tíðarbæra
mynd saman við umsóknini.
Fólk missa sostatt ikki koyrirættin fyri koyrikortbólkarnar A, B og B/E, men varðveita hann til 75
ára aldur. Einasta kravið er at ein umsókn verður latin Akstovuni saman við einari tíðarbærari
mynd. Tað sama er galdandi fyri koyrikortbólkarnar C, D og E, men her er koyrirætturin galdandi
til 70 ára aldur. Kravið er, at ein nýggj læknaváttan og ein tíðarbær mynd verður latin Akstovuni
5 hvørt ár.
Svar til fyrispurning nr. 2
Løgtingslóg um ferðslu og kunngerð um koyrikort og koyrifrálæru eru greiðar hesum viðvíkjandi.
Svar til fyrispurning nr. 3
Talan er ikki um at missa rættin at koyra, men ásetingarnar merkja bert, at umsøkjari viðvíkjandi
koyrikortbólkunum A, B og B/E við fimtan ára millumbili letur akstovuni umsókn saman við eini
tíðarbærari mynd og við fimm ára millumbili viðvíkjandi koyrikortbólkarnar C, D og E letur
Akstovuni umsókn við tíðarbærari mynd og læknaváttan. So verður koyrikortið endurnýggja.
Hesar ásetingar eru neyðugar, um føroyska koyrikortið framhaldandi skal lúka altjóða treytir. Tí
metur landsstýrismaðurin tað ikki verða skilagott at broyta lógina ella at biðja Akstovuna um at
broyta fyrisitingarpraksis. Landsstýrismanninum kunnugt umsitur Akstovan økið eftir galdandi
lógum og reglum.
Tinganes, 26. mars 2021
Jørgen Niclasen
Landsstýrismaður í fíggjarmálum

-- 2 of 2 --

Brandur Sandoy
løgtingsmaður
Fyrispurningur eftir Tingskipanini § 52 a
Fyrispurningur um koyrikort, settur Jørgeni Niclasen, landsstýrismanni við
fíggjarmálum (at svara skrivliga eftir TS § 52 a)
1. Hví missa fólk, sum hava fingið rættindini at koyra bil til tey eru 70 ár, hesi rættindi,
sjálvt um tey ikki hava brotið lógina?
2. Er talan um ivamál í tulkingum av lógarteksti, ella er lógin púra greið hesum
viðvíkjandi?
3. Hevur landsstýrismaðurin ætlanir um at broyta lógina ella Akstovan
fyrisitingarpraksis, soleiðis at tey, sum hava vunnið sær rættindi at hava koyrikort til
tey eru fylt 70 ár, ikki missa hesi rættindi, um so er, at tey ikki forbróta seg ímóti
ferðslulógini?
Viðmerkingar:
Tað frættist frá fólki, at rætturin tey hava fingið at koyra bil til tey eru vorðin 70 ár fellur
burtur, um so er, at man av ávísum ávum er noyddur at endurnýggja sær plastkoyrikortið.
Um koyrikortið er slitið, tvs. mynd og tekstur eru vorðin ov kám, ella um tú hevur broytt
navn eitt nú við giftu, og løgreglan heitir á teg um at fara til Akstovuna at skifta tær
plastkoyrikortið út, so er nýggja kortið bara galdandi í 15 ár fyri persónbil og 5 ár fyri lastbil.
Nýggj lóg er komin í gildi fyri fáum árum síðan, og er tað tulkingin av hesum lógarteksti sum
ger, at lógin verður praktiserað á hendan hátt. Neyvan hevur hetta verið ætlanin við nýggju
lógini, hetta at rætturin at koyra bil verður skerdur, sjálvt um viðkomandi als ikki hevur
forbrotið seg ímóti lógini.
Hetta, at fólk sum sambært tá galdandi lóg hava vunnið sær ein rætt, í tíð og ótíð skulu gjalda
fyri at fáa hendan rætt endurnýggjaðan, tykist órímiligt, og spurningurin er, um tað er fult
lógligt at taka vunnin rættindi aftur frá fólki við einum pennastroki.
Tí verður hesin fyrispurningur settur landsstýrismanninum.
Á Løgtingi, 16. mars 2021
Brandur Sandoy

-- 1 of 1 --