52-102/2020

Páll á Reynatúgvu
løgtingsmaður
Fyrispurningur eftir Tingskipanini § 52 a
Fyrispurningur um hækkan av ferðagjøldum á Sandoyarleiðini, settur landsstýrismanninum í
fíggjarmálum, Jørgeni Niclasen (at svara skrivliga eftir TS § 52 a)
1. Er ætlanin hjá samgonguni at hækka farmagjøldini á Sandoyarleiðini?
2. Er ætlanin hjá samgonguni at hækka ferðafólkagjøldini á Sandoyarleiðini?
3. Er tað ein fyrisitingarlig ella politisk avgerð at boða frá hækkaðum gjøldum á
Sandoyarleiðini?
4. Hvør er orsøkin til hesa almennu fráboðan um prísbroytingar?
5. Er nóg stór játtan til siglingina hjá Hasfjord um Skopunarfjørð?
6. Lýkur Hasfjord øll trygdar- og manningarkrøv fyri at røkja siglingina um Skopunarfjørð?
7. Er tað vanligt, at SSL áleggur vinnu og ferðafólki hægri gjøld, um atløgukommunan krevur
legugjald fyri skip hjá SSL?
Viðmerkingar
Nú tað frættist í miðlunum, at tað aftur skal skapast órógv um ferða- og farmaprísir á
Sandoyarleiðini, er hóskandi at fáa landsstýrismannin at greiða frá støðuni.
Undanfarna samgonga byrjaði arbeiðið uppá Sandoyartunnilin, og sitandi samgonga heldur fram við
arbeiðinum. Tað er gleðiligt at arbeiðið gongur væl. Kortini er neyðugt at tryggja støðug viðurskifti
fyri vinnulív og fólk við siglandi farleiðini til koyrandi verður.
Fyrst stóð vaktarskipanin umborð á Teistanum fyri skotum, men tíbetur varð bakkað í hesum máli;
og nú verður skaptur ófriður uppundir summarhálvuna við fráboðan um hækkandi gjøld á leiðini.
Fyri brúkarar av Sandoyarleiðini kann hetta vera sera ørkymlandi, og tí verður hesin fyrispurningur
settur landsstýrismanninum.
Á Løgtingi, 15. mars 2021
Páll á Reynatúgvu

-- 1 of 1 --

F Í G G J A R M Á L A RÁ Ð I Ð
Ministry of Finance
Tinganes • Box 2039 • FO-110 Tórshavn
 (+298) 35 20 20 •  fmr@fmr.fo • www.fmr.fo
Løgtingið
Tinghúsvegur 1-3
Postboks 208
110 Tórshavn
Tórshavn, tann: 24. mars 2021
J. nr.: 21/00131
Viðgjørt: AE
Svar til fyrispurning nr. 52-102/2020 frá Páll á Reynatúgvu, løgtingsmanni, settur
landsstýrismanninum í fíggjarmálum, Jørgeni Niclasen, um hækkan av ferðagjøldum á
Sandoyarleiðini
Fyrispurningurin er soljóðandi:
1. Er ætlanin hjá samgonguni at hækka farmagjøldini á Sandoyarleiðini?
2. Er ætlanin hjá samgonguni at hækka ferðafólkagjøldini á Sandoyarleiðini?
3. Er tað ein fyrisitingarlig ella politisk avgerð at boða frá hækkaðum gjøldum á
Sandoyarleiðini?
4. Hvør er orsøkin til hesa almennu fráboðan um prísbroytingar?
5. Er nóg stór játtan til siglingina hjá Hasfjord um Skopunarfjørð?
6. Lýkur Hasfjord øll trygdar- og manningarkrøv fyri at røkja siglingina um Skopunarfjørð?
7. Er tað vanligt, at SSL áleggur vinnu og ferðafólki hægri gjøld, um atløgukommunan krevur
legugjald fyri skip hjá SSL?
Svar til fyrispurning nr. 1, 2, 3 og 4
Tá Landsstýrið tók við varð beinanvegin farið undir at útvega enn eitt skip til siglingina um
Skopunarfjørð. Strandfaraskip Landsins tørvaði serliga eitt skip til at sigla tungan farm til og frá
Sandoynni. Leitað var víða um og at enda varð Hasfjord keyptur til endamálið. Farmaflutningurin
er betri skipaður á henda hátt. Tað gagnar vinnulívinum á Sandoynni, og ger tað høgligari hjá
ferðafólki at sigla.
Tað hevur higartil kostað eini 9 mió kr. at keypa og umvæla Hasfjord, fyri at lúka tey krøv, sum
Skipaeftirlitið setur. Hasfjord hevur eisini ferðafólkaloyvið til 12 ferðandi, og er skrásettur sum
farmaskip.

-- 1 of 2 --

F Í G G J A R M Á L A R Á Ð I Ð
Ministry of Finance
2/2
Landið eigur, rekur og fíggjar ferjuleguna í Skopun. Havnin er annars kommunal, men hevur
landið í nógv ár fíggjað meginpartin av øllum umbyggingum og útbyggingum av Skopunar havn.
Eisini hevur landið goldið umvælingar, so sum javnan rudda grót í innsiglingini.
Nú Skopunar kommuna hevur boðað frá, at havnargjaldið hækkar við 336 tús. kr. um árið, sum er
ein tvífalding, nú Hasfjord er sett í sigling, ger Strandferðslan neyðugar prístillagingar fyri at fíggja
meirkostnaðin. Hækkingin verður einans á akfør sum eru 9 metrar og longri. Hækkingin verður
175 kr. fyri hvørt akfar.
Strandfaraskip Landsins hevur avgjørt at hækka prísirnar og landsstýrismaðurin hevur ikki havt
viðmerkingar til tað, men vónar inniliga at borgarstjórin í Skopunar kommunu vísir
samfelagssinni, og velur ikki at hækka havnagjøldini, og á tann hátt at leggja ein meirkostnað á
farmaflutningin.
Tað tykist heldur ikki rætt og rímiligt, at Strandferðslan, sum betrar flutningin um Skopunarfjørð,
skal fáa eina eykarokning frá Skopunar kommunu fyri tað.
Svar til fyrispurning nr. 5
Í 2021 er játtanin 2,5 mió krónur til lønir til framhaldandi 45,5 tíma sigling um vikuna hjá Hasfjord.
Annar rakstur verður fíggjaður av inntøkum frá farmagjaldi. Nú eykarokning er komin frá
Skopunar kommunu er tessvegna neyðugt at hækka prísin á farmi.
Svar til fyrispurning nr. 6
Hasfjord lýkur øll myndugleikakrøv, sum verða sett til fólkaflutning og farmaflutning, herímillum
trygdarkrøv og manningarkrøv.
Svar til fyrispurning nr. 7
Havna,- brúgva og vørugjøld hjá kommununum hava verið rættiliga støðug í nógv ár. Verður tað
soleiðis at kommunur hækka gjøldini, so noyðist strandferðslan at hækka prísin samsvarandi, fyri
at fíggja meirkostnaðin.
Tinganes, 24. mars 2021
Jørgen Niclasen
Landsstýrismaður í fíggjarmálum

-- 2 of 2 --