52-098/2020

F Í G G J A R M Á L A RÁ Ð I Ð
Ministry of Finance
Tinganes • Box 2039 • FO-110 Tórshavn
 (+298) 35 20 20 •  fmr@fmr.fo • www.fmr.fo
Løgtingið
Tinghúsvegur 1-3
Postboks 208
110 Tórshavn
Tórshavn, 19. mars 2021
J. nr.: 21/00117
Viðgjørt: MM
Svar upp á fyrispurning nr. 52-098/2020 frá Hervør Pálsdóttir, løgtingskvinnu, settur
Jørgeni Niclasen, landsstýrismanni í fíggjarmálum, um Kirkjubøarvegin
Fyrispurningurin er soljóðandi:
1. Nær er ætlanin at dagføra Kirkjubøarvegin
Svar:
Verandi vegur til Kirkjubøar er smalur, einbreytaður og ikki tíðarhóskandi. Vánaligt sýni er í
støðum og tali á víkiplássum er ikki nøktandi. Um summarið vitja nógv ferðafólk bygdina og
ferðslutrýstið er tí stórt hesa tíðina. Nógvir bussar koyra eisini til bygdina í hesum sambandi og
elvir hetta til trupulleikar, um fleiri bussar møtast á vegnum samstundis.
Ætlanin er tí at bøta um trygdina og framkomuleikan á Kirkjubøarvegnum. Í 2021 er ætlanin at
asfaltera strekkið frá íbindingini við Gomlurætt og suður til endan á landsvegnum.
Áðrenn asfaltarbeiðið fer í gongd skal tryggjast, at yvirflatuvatni setur frá í ovara borði. Hetta
verður m.a. gjørt við at reinsa gravir og tryggja, at verandi tvørrennur kunnu taka hóskandi
nøgdir av vatni. Nýggjar tvørrennur verða gjørdar, har tað er neyðugt. Eisini er ætlanin at gera
tveir nýggjar busslummar, ið ger tað lættari hjá bussum at møtast á vegnum.
Landsverk fer væntandi í apríl at kanna styrkina á undirlagnum á vegnum fyri at meta um, hvørja
ávirkan tað vaksandi ferðslutrýstið hevur havt á asfaltið og vegkassan. Í hesum sambandi verða
tiltøk væntandi sett í verk fyri at tryggja, at vegurin ikki fer ov illa.
Tinganes, 19. mars 2021
Jørgen Niclasen
landsstýrismaður í fíggjarmálum

-- 1 of 1 --

Hervør Pálsdóttir
løgtingsmaður
Fyrispurningur eftir Tingskipanini § 52 a
Fyrispurningur um Kirkjubøarvegin, settur landsstýrismanninum við fíggjarmálum, Jørgeni
Niclasen (at svara skrivliga eftir TS § 52 a)
Nær er ætlanin at dagføra Kirkjubøarvegin?
Viðmerkingar:
Kirkjubøarvegurin er í ringum standi, er einbreytaður og hevur ringt sýni í fleiri støðum. Umframt
tey, ið búgva í Kirkjubø, sum brúka vegin hvønn dag, er serliga um summarið nógv ferðsla við
ferðafólkum; heruppií fleiri ferðafólkabussar. Hesin fyrispurningurin verður settur fyri at frætta,
nær arbeiðið við Kirkjubøarvegnum verður sett í verk.
Á Løgtingi, 9. mars 2021
Hervør Pálsdóttir

-- 1 of 1 --