52-094/2020

Síða 1 av 2
Dagf. 16. mars 2021
HMR j. Nr. 21/02720-5
Kaj Leo Holm Johannesen
landsstýrismaður
Svar
upp á
§52a fyrispurning frá tingkvinnu Ingilín D. Strøm løgtingsmál nr.: 52-094/2020, viðvíkjandi
koppsetingarætlanini, ið ikki varð fylgd
Fyrispurningur
1. Í dag, 3. marts 2021, eru 4.190 fólk, ið hava fingið fyrru koppsetingina, meðan 2.523 hava
fingið seinnu koppsetingina. Hvussu nógvar av hesum tilsamans 6.713 koppsetingunum eru
latnar uttan um almennu koppsetingarætlanina?
2. Hvørji fólk er talan um, sum eru koppsett uttan um koppsetingarætlanina, og hvørjar
grundgevingar hava verið fyri at gera hesi frávik frá ætlanini?
Svar
Spurningarnir verða svaraðir undir einum.
Í dag hin 16. mars 2021 eru 8.967 koppsetingar gjørdar í Føroyum. Av hesum hevur Sjúkrahúsverkið
upplýst, at umleið 20 koppsetingar er gjørdar, sum heimild ikki er fyri í kunngerðini um ókeypis
koppseting ímóti COVID-19. Sjúkrahúsverkið harmast um hesi mistøk.
Sum víst hevur verið á alment, hevði Sjúkrahúsverkið nakrar avbjóðingar við koppsetingini í
byrjanini. Millum annað kom tað óvart á, at Sjúkrahúsverkið konsekvent fekk so nógvar skamtar úr
hvørjum hettuglasi, og somuleiðis vóru eisini onkrir dagar, har tað vóru serliga nógv avboð. Haraftrat
hevði Sjúkrahúsverkið ikki fingið til vega fullfíggjað yvirlit yvir tey, ið Sjúkrahúsverkið skuldi
koppseta. Hetta kom tó í rættlag í seinnu hálvu av januar.
Hesi viðurskifti høvdu við sær, at tað lupu skamtir av við dagslok. Koppingarevnið frá
Pfizer/BioNtech er sera viðbrekið, og má nýtast, tá ið tað er tikið fram, og valdi Sjúkrahúsverkið at
kalla fólk inn heldur enn at stoyta koppingarevni burtur. Í einari tíð, har øll heimsins lond mangla
koppingarevni, er tað av alstórum týdningi, at so lítið koppingarevni sum gjørligt fer burtur.

-- 1 of 2 --

Síða 2 av 2
Sjúkrahúsverkið hevur skrásett hesar skamtirnar sum avlopsskamtir. Í tíðarskeiðinum 30. desember
2020 til 2. februar vóru umleið 100 fólk, sum fingu burturav avlopsskamtunum. Sjúkrahúsverkið kann
staðfesta, at umleið 80 av hesum eru starvsfólk, sum kortini skuldu hava koppsetingina sambært
ætlanini. Talan er sostatt um eini 20 fólk, sum ikki áttu at verið koppsett fyri koronu enn sambært
koppsetingarætlanini.
Sjúkrahúsverkið kann ikki upplýsa hvørji fólk, talan er um, tí hetta er fevnt av tagnarskyldu, men
grundgevingarnar eru sum lýstar omanfyri.
Heilsumálaráðið, 16. mars 2021
Kaj Leo Holm Johannesen
landsstýrismaður

-- 2 of 2 --

Ingilín Didriksen Strøm
løgtingsmaður
Fyrispurningur eftir Tingskipanini § 52 a
Fyrispurningur um koppsetingarætlanina, ið ikki varð fylgd, settur landsstýrismanninum við
heilsumálum, Kaj Leo Holm Johannesen (at svara skrivliga eftir TS § 52 a)
1. Í dag, 3. marts 2021, eru 4.190 fólk, ið hava fingið fyrru koppsetingina, meðan 2.523 hava
fingið seinnu koppsetingina. Hvussu nógvar av hesum tilsamans 6.713 koppsetingunum eru
latnar uttan um almennu koppsetingarætlanina?
2. Hvørji fólk er talan um, sum eru koppsett uttan um koppsetingarætlanina, og hvørjar
grundgevingar hava verið fyri at gera hesi frávik frá ætlanini?
Viðmerkingar
Sambært heimasíðuni Corona.fo, sum Heilsumálaráðið og Landslæknin umsita, eru tað í dag, 3.
mars 2021, 4.190 fólk, ið hava fingið fyrru koppseting fyri COVID-19, meðan 2.523 eisini hava
fingið tað seinna prikið. Hetta eru 6.713 koppsetingar tilsamans. Í Degi og Viku í gjárkvøldið varð
staðfest, at privatar fyritøkur og sendifólk Føroya uttanlands eru koppsett uttan um
koppsetingarætlanina, meðan fólk í serligum smittuvanda, herímillum fjølbrekað, framvegis hvørki
eru koppsett ella hava fingið vitan um, nær tey kunnu vænta at verða koppsett.1
Dømini um frávik frá koppsetingarætlanini eru tvey tilvildarlig dømi, sum Kringvarp Føroya hevur
frætt um. Til tess at fáa greiðu á, um tað eru fleiri, sum eru koppsett uttan um koppsetingarætlanina,
hvørji fólk talan er um, (her verður tó ikki hugsað um nøvn, men meira um størv o.a.) og hvørjar
grundgevingar eru fyri at gera frávik, verður hesin fyrispurningurin settur.
Á Løgtingi, 3. mars 2021
Ingilín Didriksen Strøm
1 Kringvarp Føroya, 2. mars 2021, kelda: https://kvf.fo/dv?sid=121058

-- 1 of 1 --