52-073/2020

U T T A N R Í K I S - O G M E N T A M Á L A R Á Ð I Ð
Tinghúsvegur 5-7 • Postrúm 3279 • FO-110 Tórshavn
 +298 30 65 00 •  ummr@ummr.fo • www.ummr.fo
Løgtingið
Tinghúsveg 3
100 Tórshavn
Dagfesting: 1. februar 2021
Tygara ref.:
Máltal.: 19/00017-115
Svar
upp á
fyrispurning nr. 52-073/2021 frá Beintu Løve Jacobsen, løgtingsmanni, eftir Tingskipanini
§ 52 a. Fyrispurningur um ensk tíðindi hjá KVF, settur landsstýrismanninum við
uttanríkis- og mentamálum, Jenisi av Rana (at svara skrivliga eftir TS § 52 a).
Fyrispurningurin er soljóðandi:
1. Hvørjar eru ætlaninar hjá Kringvarpi Føroya við tíðindaflutninginum á enskum?
2. Hvat kostar skipanin við tíðindum á enskum?
Svar
Til 1: Eg havi spurt Kringvarpið um ætlanirnar hjá stovninum við tíðindaflutninginum á enskum,
og eg seti svarið inn her:
”Kringvarp Føroya hevur hildið seg til public service-sáttmálan, har tað stendur, at stovnurin
“skal virka við til at framleiða upplýsandi public service-tilfar, ið vendir sær til tilflytarar, ið ikki
skilja føroyskt ella skandinaviskt”. Hesa tænastuna hevur stovnurin veitt gjøgnum “News in
English” á heimasíðuni kvf.fo.
Public service-sáttmálin fór úr gildi á nýggjárinum, men tað verður framvegis arbeitt sambært
høvuðsleistinum í sáttmálanum, til ein nýggjur kemur í gildi.
Kringvarpið hevur innanhýsis umrøtt, um tað er rætt, at ein stovnur, sum framleiðir føroyskt
tilfar, eisini skal framleiða tilfar á enskum. Í integratiónsarbeiði verður oftast stórur dentur lagdur
á at læra tilflytarar høvuðsmálið í landinum hagar tey flyta. Harnæst kann yvirskipað sigast, at
integratións-uppgávur liggja ikki vanliga hjá public service-miðlunum, men hjá eitt nú
integratiónsstovnum og kommunum. Um komandi public service-sáttmálin eisini leggur upp til,
at Kringvarpið skal framleiða upplýsandi public service-tilfar til tilflytarar, ið ikki skilja føroyskt
ella skandinaviskt, fer Kringvarpið at halda fram við tænastuni “News in English” og at menna
tænastuna, soleiðis at tíðindini í størri mun verða lagað til tilflytararnar.”
Eg kann leggja aftrat, at Kringvarpið og Uttanríkis- og mentamálaráðið í løtuni samskifta um
leistin fyri og innihaldið í einum nýggjum public service-sáttmála. Vit hava eisini í hesum
sambandi umrøtt spurningin um framhald av tíðindum á enskum. Eg haldi, at hetta er ein
týdningarmikil tænasta at veita okkara borgarum, ið ikki skilja føroyskt, so eg vænti ikki, sum er,
at tænastan verður strikað.

-- 1 of 2 --

U T T A N R Í K I S - O G M E N T A M Á L A R Á Ð I Ð
Tinghúsvegur 5-7 • Postrúm 3279 • FO-110 Tórshavn
 +298 30 65 00 •  ummr@ummr.fo • www.ummr.fo
Til 2: Sambært Kringvarpinum er tænastan í stóran mun útveitt. Frá síðst í desember 2019 til
síðst í desember 2020 rindaði Kringvarpið fríyrkisjournalisti 282.800 krónur fyri veitingina.
Hartil kemur nakað av innanhýsis kostnaði, sum liggur undir 50.000 krónur.
Vinarliga
Jenis av Rana
landsstýrismaður

-- 2 of 2 --

Beinta Løve Jacobsen
løgtingsmaður
Fyrispurningur eftir Tingskipanini § 52 a
Fyrispurningur um ensk tíðindi hjá KVF, settur landsstýrismanninum við uttanríkis-
og mentamálum, Jenisi av Rana (at svara skrivliga eftir TS § 52 a)
1. Hvørjar eru ætlaninar hjá Kringvarpi Føroya við tíðindaflutninginum á enskum?
2. Hvat kostar skipanin við tíðindum á enskum?
Viðmerkingar:
Kringvarpið hevur týðandi leiklut í samfelagnum. Tí er eisini umráðandi, at Kringvarpið
røkkur út til so nógv fólk sum til ber. Har hevur tíðindaflutningurin á enskum á heimasíðuni
hjá Kringvarpinum stóran týdning. Tí alsamt fleiri í Føroyum hava annað mál enn føroyskt
sum móðurmál. Fyri at fólk, sum ikki hava føroyskt sum móðirmál, eisini kunnu taka lut í
samfelagnum og fáa vitan um, hvat gongur fyri seg í samfelagnum, er umráðandi, at tey fáa
álítandi og góðan tíðindaflutning á enskum, sum flest allir útlendingar skilja.
Á Løgtingi, 19. januar 2021
Beinta Løve Jacobsen

-- 1 of 1 --