52-062/2020

F Í G G J A R M Á L A RÁ Ð I Ð
Ministry of Finance
Tinganes • Box 2039 • FO-110 Tórshavn
 (+298) 35 20 20 •  fmr@fmr.fo • www.fmr.fo
Løgtingið
Tinghúsvegur 1-3
Postboks 208
110 Tórshavn
Tórshavn, tann: 13. januar 2021
J. nr.: 20/00596-2
Svar til skrivligan fyrispurning nr. 62/2020 frá Heðini Mortensen, løgtingsmanni, um
inntøkur landskassans frá vektgjaldi, skrásetingargjaldi og øðrum gjøldum á skrásettum
akførum, settur landsstýrismanninum í fíggjarmálum, Jørgeni Niclasen
Fyrispurningurin er soljóðandi:
1. Hvussu stórar inntøkur hevur landskassin árliga av vektgjaldi og skrásetingargjaldi á akfør,
tolli og øðrum í sambandi við innflutning av akførum og avgjaldi á brennievni til akfør?
2. Hvussu stórur partur av hesum inntøkum fer til at bøta um og dagføra landsveganetið í
Føroyum?
3. Heldur landsstýrismaðurin tað vera rætt og rímiligt, at ikki øll henda inntøka landskassans
verður brúkt til landsveganetið?
4. Hevur landsstýrismaðurin í kvittanum at taka neyðug stig, so samsvar fæst millum tær
inntøkur og útreiðslur, ið tað almenna hevur av skrásettum akførum?
Svar til fyrispurning nr. 1
Í talvu 1 niðanfyri eru vístar inntøkurnar hjá landskassanum av vektgjaldi og skrásetingargjaldi á
akfør, tolli og øðrum í sambandi við innflutning av akførum og avgjaldi á brennievni til akfør.
TALVA 1 2020 (meting) 2021 (játtan)
Vegskattur (vektgjald) 139 mió. kr. 139 mió. kr.
Skrásetingargjald á akfør 178 mió. kr. 180 mió. kr.
Meirvirðisgjald (innflutningur av akførum) Um 130 mió. kr. -
Tollur (innflutningur av akførum) Um 10 mió. kr. -
Punktgjald og brennioljugjald á bensin og diesel Um 75-80 mió. kr. -
Meting av inntøkunum tilsamans Um 500-550 mió. kr. árliga
Leggjast kann aftrat, at inntøkurnar, sum almennu tunnilsfeløgini hava av brúkaragjøldunum í
undirsjóvartunlunum eru ikki vístar í talvu 1. Tær inntøkurnar vera væntandi 200-250 mió. kr. árliga
íroknað Eysturoyar- og Sandoyartunnilin.

-- 1 of 2 --

F Í G G J A R M Á L A RÁ Ð I Ð
Ministry of Finance
2/2
Svar til fyrispurning nr. 2
Í talvu 2 niðanfyri eru vístar útreiðslurnar hjá landinum av at bøta um og dagføra landsveganetið í
Føroyum (rakstur og løgur).
TALVA 2 2020 2021
Játtan til hald av landsvegum, netto (rakstur) 44,6 mió. kr. 45 mió. kr.
Játtan til nýgerð av vegum og tunlum (løga) 284 mió. kr. 183 mió. kr.
Meting av játtanum/nýtslu tilsamans Um 230-350 mió. kr. árliga
Leggjast kann aftrat, at beinleiðis játtanin til almenna felagið P/F Eystur- og Sandoyartunlar ikki er
víst í talvu 2 omanfyri. Tann játtanin er 50 mió. kr. í 2020 og 2021. Leggjast kann eisini aftrat, at
felagið P/F Eystur- og Sandoyartunlar í løtuni byggir undirsjóvartunlar fyri um 350 mió. kr. árliga,
sum heldur ikki er nevnt í talvu 2 omanfyri.
Í talvu 2 omanfyri eru játtanirnar til dagføring av tunlum og brúm og til trygdartiltøk íroknaða í
játtanina til nýgerð av vegum og tunlum (løga).
Svar til fyrispurning nr. 3 og nr. 4
Líka síðani byrjanina av nítiárunum hevur verið játtað ov lítið til viðlíkahald av landsvegum, tunlum
og brúm. Hetta hevur havt við sær, at fleiri vegastrekki í landinum eru í ringum standi, og stórt
eftirsleip er á viðlíkahaldi á landsvegunum. Landsverk metti samlaða eftirsleipið á viðlíkahaldi av
landsvegakervinum til um 375 mió. kr. í 2019. Landsverk lýsir støðuna á vegakervinum soleiðis, at so
at siga øll øki hava ein átrokandi tørv á ábótum.
Landsstýrið ætlar, at játtanin til viðlíkahald av landsvegunum hækkar stigvíst næstu árini. Á hendan
hátt ber til at fáa eftirsleipið á viðlíkahaldi aftur eftir eitt ávíst tíðarskeið. Ætlanin er, at hetta verður
játtað á vanligan hátt við játtan á løgtingsfíggjarlógini eins og annað vanligt virksemi hjá landinum.
Sitandi landsstýrið hevur hækkað játtanirnar til dagføring av tunlum og brúm í 2020 og aftur í 2021.
Játtanin til endamálið var 5,5 mió. kr. í 2019. Játtanin er hækkað til 8 mió. kr. í 2020 og til 13 mió. kr.
í 2021. Játtanin er sostatt hækkað 7,5 mió. kr. frá 2019 til 2021.
Landsstýrið hevur eisini hækkað játtanina til trygdartiltøk, sum verður brúkt til at bøta um verandi
samferðslukervi, soleiðis at trygdin verður betri á landsvegunum. Í 2020 vórðu 7,6 mió. kr. játtaðar
til endamálið, og játtanin hækkaði tá 2,6 mió. kr. Í 2021 eru 13,6 mió. kr. játtaðar til endamálið.
Játtanin til trygdartiltøk er sostatt hákkað útvið 9 mió. kr. frá 2019 til 2021.
Tinganes, 13. januar 2021
Jørgen Niclasen
Landsstýrismaður í fíggjarmálum

-- 2 of 2 --

Heðin Mortensen
løgtingsmaður
Fyrispurningur eftir Tingskipanini § 52 a
Fyrispurningur um inntøkur landskassans frá vektgjaldi, skrásetingargjaldi og øðrum
gjøldum á skrásettum akførum, settur landsstýrismanninum í fíggjarmálum, Jørgeni
Niclasen, (at svara skrivliga eftir TS § 52 a)
1. Hvussu stórar inntøkur hevur landskassin árliga av vektgjaldi og skrásetingargjaldi á akfør,
tolli og øðrum í sambandi við innflutning av akførum og avgjaldi á brennievni til akfør?
2. Hvussu stórur partur av hesum inntøkum fer til at bøta um og dagføra landsveganetið í
Føroyum?
3. Heldur landsstýrismaðurin tað vera rætt og rímiligt, at ikki øll henda inntøka landskassans
verður brúkt til landsveganetið?
4. Hevur landsstýrismaðurin í kvittanum at taka neyðug stig, so samsvar fæst millum tær
inntøkur og útreiðslur, ið tað almenna hevur av skrásettum akførum?
Viðmerkingar:
Javnan hoyrist, at ov lítil játtan er til viðlíkahald av og ábøtur á vegakervið í Føroyum, og tí eru
vegir niðurslitnir og vegateinar óhóskandi til ta ferðslu, sum er nú. Vegir, sum eru gjørdir í eini
aðrari tíð og undir øðrum umstøðum, hóska ikki til bilferðsluna, sum hon er vorðin. Dagføringar
tróta nógvastaðni, og regluliga asfaltering av landsvegunum kring landið sæst lítið til.
Samstundis hoyrist, at landskassin hevur stórar inntøkur av “bilparkini” í landinum, tí allir
bileigarar tvær ferðir um árið skulu rinda vektgjald – ella vegskatt, sum tað enn eitur á mannamunni
– umframt at allir bilar einaferð eru fluttir til landið og skrásettir, so har hevur landskassin havt bæði
inntøkur av innflutninginum og skrásetingini. Haraftrat rinda bileigarar avgjald fyri hvønn litur av
brennievni, teir brúka.
Stórar íløgur í innkomuvegir standa fyri framman og talan er um, at landið skal yvirtaka raksturin
av Vága- og Norðoyatunlunum, tí tunnilsgjaldið skal burtur, umframt at nóg ringt er hjá Landsverki
frammanundan at fáa neyðugu játtanina til landsvegirnar, og samstundis økist talið á bilum støðugt,
so trýstið á samlaða landsveganetið økist stórliga.
Vónandi kann landsstýrismaðurin taka neyðug stig til at fáa javnvág millum inntøkur og útreiðslur
landskassans av bilferðsluni, tí annars er vandi fyri, at mismunur verður gjørdur á teimum
borgarum, ið hava bil, og teimum borgarum, ið ikki hava bil. Tí verður hesin fyrispurningur settur.
Á Løgtingi, 28. desember 2020
Heðin Mortensen

-- 1 of 1 --