52-045/2020

Ingilín Didriksen Strøm
løgtingsmaður
Fyrispurningur eftir Tingskipanini § 52 a
Fyrispurningur um lønarviðurskifti í sjúkrahúsverkinum, settur landsstýrismanninum
við heilsumálum, Kaj Leo Holm Johannesen, (at svara skrivliga eftir TS § 52 a)
1. Hvørjar grundgevingar eru fyri, at vaskifólkini á Landssjúkrahúsinum fáa lægri
byrjanarløn enn vaskifólkini á hinum báðum sjúkrahúsunum?
2. Hevur landsstýrismaðurin ætlanir um at gera batar á hesum økinum?
Viðmerkingar:
Í Degi og Viku í gjárkvøldið, 19. novembur 2020, kom fram, at vaskifólkini á
Landssjúkahúsinum fáa lægri løn enn vaskifólkini á hinum sjúkrahúsunum báðum. Meðan
vaskifólkini á Landssjúkrahúsinum fáa eina byrjanarløn á kr. 119 um tíman og eina endaløn á
kr. 130, so byrja vaskifólkini á eini løn á kr. 130 á hinum sjúkrahúsunum. Eisini varð sagt, at
tímalønin sum vaskifólk á sjúkahúsinum sum heild er munandi lægri enn aðrastaðni.
Í innslagnum varð eisini víst á, at hóast reinføri hevur staðið ovarlaga á skránni í ár við
koronusmittuni, so kenna vaskifólkini seg ikki vird. Lønin hjá vaskifólkunum er so mikið lág,
at fleiri liva undir fátækramarkinum. Tí verður hesin fyrispurningurin settur.
Á Løgtingi 20. novembur 2020
Ingilín Didriksen Strøm

-- 1 of 1 --

Dagf. 1. desember 2020
HMR J. nr. 20/00940-6
Kaj Leo Holm Johannesen
landsstýrismaður
Svar
upp á
fyrispurning nr. 45/2020 eftir § 52a í tingskipanini um lønarviðurskifti í sjúkrahúsverkinum,
frá Ingilín D. Strøm, løgtingskvinnu (at svara skrivliga eftir TS § 52 a)
Spurningurin var soljóðandi:
1. Hvørjar grundgevingar eru fyri, at vaskifólkini á Landssjúkrahúsinum fáa lægri byrjanarløn
enn vaskifólkini á hinum báðum sjúkrahúsunum?
2. Hevur landsstýrismaðurin ætlanir um at gera batar á hesum økinum?
Til spurning 1
Orsøkin er, at vaskifólkini á teimum trimum sjúkrahúsunum ikki hava somu setanarviðurskifti.
Vaskifólkini á Klaksvíkar sjúkrahúsi og á Suðuroyar sjúkrahúsi eru tímalønt. Í Klaksvík eru
vaskifólkini sett sambært sáttmála millum Klaksvíkar Arbeiðsmanna- og kvinnufelag og Føroya
Arbeiðsgevarafelag, og á Tvøroyri eru vaskifólkini sett sambært sáttmála millum Føroya
Arbeiðarafelag og Føroya Arbeiðsgevarafelag. Á Landssjúkrahúsinum eru vaskifólkini sett í starv
eftir sáttmálanum millum Fíggjarmálaráðið og Havnar Arbeiðskvinnufelag. Góður helmingurin av
vaskifólkunum á Landssjúkrahúsinum eru í føstum starvi, sum hevur nøkur rættindi við sær og
gevur eina hægri eftirløn.
Til spurning 2
Undir fyrireikingini hjá Fíggjarmálaráðnum til sáttmálasamráðingarnar, hevur Sjúkrahúsverkið gjørt
vart við, at tørvur er á at gera broytingar í sáttmálanum við Havnar Arbeiðskvinnufelag, so lønin til
vaskifólk verður meira kappingarfør.
Í løtuni hevur Landssjúkrahúsið sera ilt við at fáa mannað leysu størvini í reingerðini, og til ber ikki
at leggja vaktarætlan fleiri vikur fram. Reingerð er eitt kjarnuøki á sjúkrahúsunum, og megnar
Landssjúkrahúsið ikki at fáa skikkaði starvsfólk til uppgávuna, kunnu tey verða noydd at biðja
onnur, t.d. privatar fyritøkur, átaka sær uppgávuna. Orsøkin er einfalt tann, at lønin er lægri enn á
privata arbeiðsmarknaðinum og eisini lægri enn aðrastaðnis í tí almenna.
Heilsumálaráðið, 1. desember 2020
Kaj Leo Holm Johannesen
landsstýrismaður

-- 1 of 1 --