52-035/2020

ALMANNAMÁLARÁÐIÐ
Eirargarður 2 • FO-100 Tórshavn
Tel: +298 304000 • Fax: +298 304045 • E-mail: amr@amr.fo
Løgtingið
Tinghúsvegur 1-3
110 Tórshavn
11. november 2020
Mál: 20/00896-5
Tygara Skriv:
Viðgjørt: Jeanette E. Blaasvær
Nr. 35/2020
Svar
upp á
§ 52 a fyrispurning nr. 35/2020 eftir Tingskipanini til Elsebeth Mercedis
Gunnleygsdóttur, landsstýrismann í almannamálum frá Beinta Løwe Jacobsen,
løgtingsmann um teknmálstulkar
Fyrispurningurin er soljóðandi:
1. Hvussu nógvir teknsmálstulkar eru í starvi í løtuni?
2. Hvussu nógv er talið á tulkum í starvi minkað, og hví?
3. Fáa deyv ta tænastu, ið tey hava rætt til? (t.d. læknaørindi, skúlaørindi, tiltøk í
vikuskiftum, tiltøk eftir kl.16 o.s.fr.)
4. Hvat verður gjørt fyri at fáa fleiri teknsmálstulkar?
5. Nær ætlar landsstýrismaðurin, at nóg nógvir teknsmálstulkar aftur eru, so deyv fáa tær
tænastur, ið tey hava rætt til?
Svar:
Til 1:
Tað eru í løtuni trý starvsfólk í starvi í Teknmálstulkatænastuni í Almannaverkinum – tveir
tulkar og eitt skrivstovufólk. Eftir ársskiftið kemur eftir ætlan ein tulkur aftur í starv eftir
barsilsfarloyvi, og verða tá tríggir teknmálstulkar og eitt skrivstovufólk.
Afturat hesum hevur Almannaverkið avtalur við tulkar til uppgávur, tá ið á stendur. Hetta eru
teknmálstulkar, sum hava onnur størv, men hjálpa til hjá Almannaverkinum.
Til 2:
Í 2020 eru tveir teknmálstulkar farnir úr starvi og ein nýggjur teknmálstulkur er settur.

-- 1 of 2 --

ALMANNAMÁLARÁÐIÐ
síða 2 av 2
Til 3:
Tað er enn ikki ásett, hvønn rætt deyv hava til tænastuna við teknmálstulkum. Men í nýggju
lógini um almannatrygd og tænastur, sum kemur í gildi 1. januar 2021, verður ásett, at tulkur
verður veittur persóni við ongari ella niðursettari hoyrn, soleiðis at hann kann taka lut í
samfelagslívi og sosialum lívi á jøvnum føti við onnur. Heimild er hjá landsstýrismanninum
at áseta reglur um treytir, tal av tulkatímum, býtislykil og gjald, og verður eftir ætlan
kunngerð lýst, sum ásetir hesi viðurskifti, áðrenn lógin kemur í gildi.
Hóast manglandi lógaráseting higartil, er og hevur tað verið siðvenja, at uppgávur sum
lækna- og skúlaørindi verða raðfest fremst. Hetta hevur við sær, at tá stórur tørvur er á
hesum, er minni orka til aðrar uppgávur, sum t.d. tiltøk í vikuskiftum og eftir kl. 16 vanligar
dagar.
Tørvurin á teknmálstulking er yvirhøvur stórur, og tað er neyðugt at raðfesta tænasturnar. Í
løtuni eru tó ikki nógvar tíðarkrevjandi uppgávur, so sum tulking í sambandi við lesnað, og tí
megnar teknmálstulkatænastan at raðfesta nakað av øðrum uppgávum.
Til 4:
Almannaverkið hevur játtan til at hava fýra teknmálstulkar í starvi, men hóast at lýst hevur
verið eftir teknmálstulkum, er tað trupult at fáa sett fleiri teknmálstulkar.
Almannaverkið hevur gjørt átøk fyri at fáa ung at fara undir lestur til teknmálstulk, og
vónandi verða fleiri teknmálstulkar í framtíðini.
Til 5:
Sum greitt frá omanfyri, er ongin lógarásettur rættur fyri tænastur til deyv, men hetta verður
bøtt um, tá lógin um almannatrygd og tænastur kemur í gildi 1. januar 2021. Tá verður eftir
ætlan eisini kunngerð lýst, ið ásetur neyvari, hvussu nógvar ókeypis tímar og til hvørji tiltøk
persónur við ongari ella niðursettari hoyrn hevur rætt til, soleiðis at hann kann taka lut í
samfelagslívi og sosialum lívi á jøvnum føti við onnur.
Á fíggjarlógini er játtan til at hava fýra teknmálstulkar í starvi í teknmálstulkatænastuni hjá
Almannaverkinum, og hóast at eg hevði ynskt, at tað var nóg mikið, at peningur er játtaður á
fíggjarlógini, til at nøkta tørvin, vísir tað seg tíverri, at tað er trupult at fáa manna størvini í
teknmálstulkatænastuni.
11. november 2020
Elsebeth Mercedis Gunnleygsdóttur
Landsstýrismaður

-- 2 of 2 --

Nr. 35/2020
Beinta Løwe Jacobsen
løgtingsmaður
Fyrispurningur eftir Tingskipanini § 52 a
Fyrispurningur um teknmálstulkar, settur landsstýrismanninum í
almannamálum, Elsebeth Mercedis Gunnleygsdóttur (at svara skrivliga eftir TS
§ 52a)
1. Hvussu nógvir teknsmálstulkar eru í starvi í løtuni?
2. Hvussu nógv er talið á tulkum í starvi minkað, og hví?
3. Fáa deyv ta tænastu, ið tey hava rætt til? (t.d. læknaørindi, skúlaørindi, tiltøk í
vikuskiftum, tiltøk eftir kl.16 o.s.fr.)
4. Hvat verður gjørt fyri at fáa fleiri teknsmálstulkar?
5. Nær ætlar landsstýrismaðurin, at nóg nógvir teknsmálstulkar aftur eru, so deyv
fáa tær tænastur, ið tey hava rætt til?
Viðmerkingar:
At tað ikki eru nóg nógvir teknmálstulkar ávirkar gerandisdagin hjá deyvum. Millum
annað ber ikki til hjá deyvum og tunghoyrdum at fáa sær útbúgving, um
teknsmálstulkar ikki eru. Teknsmálstulkar eru eisini umráðandi fyri deyv og
tunghoyrd, so tey kunnu taka lut í samfelagnum á jøvnum føti við hoyrandi. M.a.
stendur kommunuval fyri durum, og eru ongir teknsmálstulkar er trupult, fyri ikki at
siga ógjørligt, hjá deyvum at fylgja við í samfelagnum.
Fyri at fáa greiðu á hvør støðan er við teknsmálstulkum verður hesin fyrispurningur
settur.
Á Løgtingi, 30. oktober 2020
Beinta Løwe Jacobsen

-- 1 of 1 --