52-012/2020

U T T A N R Í K I S - O G M E N T A M Á L A R Á Ð I Ð
Tinghúsvegur 5-7 • Postrúm 3279 • FO-110 Tórshavn
 +298 30 65 00 •  ummr@ummr.fo • www.ummr.fo
Løgtingið
Tinghúsvegur 3-5
100 Tórshavn
Dagfesting: 11. september 2020
Tygara ref.:
Máltal.: 19/00017-76
Svar
upp á
fyrispurning nr. 12/2020 frá Sirið Stenberg, løgtingskvinnu, eftir Tingskipanini § 52a.
Fyrispurningur um íløgujáttan til Ítróttaháskúlan í Vági, settur landsstýrismanninum við
uttanríkis- og mentamálum Jenis av Rana (at svara skrivliga eftir TS §52 a).
Fyrispurningurin er soljóðandi:
1. Er ætlanin at játta 3 mió. kr. í íløgupeningi til Ítróttaháskúlan, soleiðis at skúlin fær
nøktandi hølisumstøður, og møguleika at taka fleiri næmingar inn?
2. Um ja, nær er ætlanin at játta peningin?
3. Er samskifti millum Uttanríkis- og mentamálaráðið og Ítróttaháskúlan um nýggja
skúlabygningin?
Svar
Til 1: Umboð fyri Ítróttaháskúlan í Suðuroy hava vent sær til Uttanríkis- og mentamálaráðið fyri
at fáa gongd á aftur verkætlanina at gera ætlaða skúlabygningin. Uttanríkis- og mentamálaráðið
hevur í hesum sambandi sett ætlaðu heimildarlógina fyri at veita stuðul til verkætlanina á
løglistan í heyst.
Undir viðgerðini, sum hevur verið av verkætlanini, hevur Landsverk víst á nøkur viðurskifti við
eitt nú kostnaðarmetingini og ætlaðu staðsetingini. Neyðugt er at viðgera hesi viðurskifti nærri,
áðrenn endalig støða verður tikin til, um peningur skal játtast til hesa verkætlan.
Til 2: Øllum er greitt, at Ítróttaháskúlin í Suðuroy hevur tørv á betri hølisumstøðum, og er tað
eisini ynski hjá landsstýrismanninum at tryggja hesum. Í løtuni ber ikki til at siga, nær peningur
verður játtaður, tí sum nevnt verða nærri útgreinandi kanningar gjørdar.
Til 3: Ja, samskifti er við umboð fyri Ítróttaháskúlan um ætlanina at keypa og umbyggja eini
eldri hús, Vaskiskúrin á Gørðunum í Vági. Kontrast hevur gjørt uppskot um umbygging og
innrætting, og byggikøn frá Landsverki gera sum nevnt neyðugar kanningar av verkætlanini.
Vinarliga
Jenis av Rana
landsstýrismaður

-- 1 of 1 --

Sirið Stenberg Nr. 12/2020
løgtingsmaður
Fyrispurningur eftir Tingskipanini § 52a
Fyrispurningur um íløgujáttan til Ítróttaháskúlan í Vági, settur landsstýrismanninum
við uttanríkis- og mentamálum Jenis av Rana (at svara skrivliga eftir TS §52 a)
1. Er ætlanin at játta 3 mió. kr. í íløgupeningi til Ítróttaháskúlan, soleiðis at skúlin fær
nøktandi hølisumstøður, og møguleika at taka fleiri næmingar inn?
2. Um ja, nær er ætlanin at játta peningin?
3. Er samskifti millum uttanríkis- og mentamálaráðið og Ítróttaháskúlan um nýggja
skúlabygningin?
Viðmerkingar:
Ítróttaháskúlin hevur frá fyrsta degi verið ein sólskinssøga. Nógvir ungdómar bæði úr
Føroyum og úr útlondum hava luttikið á skúlaskeiðunum, og ein røð av spennandi og
mennandi størvum eru skapt. Umframt góðu upplivingarnar, næmingarnar fáa, kemur jaliga
ávirkanin, skúlin hevur á nærumhvørvi.
Seinni í ár stendur eftir ætlan eitt nýtt næmingaheim klárt. Hetta gevur grundarlag fyri at taka
enn fleiri næmingar inn, umframt at skúlin hevur nógvar umsóknir. Nú næmingaheimið er við
at vera klárt er tíðin búgvin til at fara í gongd við verkætlanina um at byggja/umbyggja
hóskandi skúlahølir til virksemið. Sum er hevur skúlin ikki egin hølir, men húsast í Stóra
Pakkhúsi.
Sum skilst er lagt upp til, at Ítróttaháskúlin somuleiðis skal útvega 3 mió. kr. til
skúlabygningin. Mín fatan er, at hesin partur av ætlanini er klárur.
Til skúlaskeiðið á vári 2021 er næmingaheim tøkt umframt nokk av umsøkjarum.
Avbjóðingin tá verður skúlahølini. Tí hesir spurningar til landsstýrismannin.
Á Løgtingi, 2. september 2020
Sirið Stenberg

-- 1 of 1 --