52-002/2020

Jóhannis Joensen Nr. 2/2020
løgtingsmaður
Fyrispurningur eftir tingskipanini §52 a
Fyrispurningur um ferðsluviðuskiftir, settur landsstýrismanninum í fíggjarmálum, Jørgeni
Niclasen (at svara skrivliga eftir TS §52 a).
1. Hvørjar ætlanir hevur landsstýrið viðvíkjandi farleiðini til flogvøllin?
2. Hvørjar ætlanir hevur landsstýrið á vegastrekkinum við Leynatunnilin hvat viðvíkur trygd fram
við landsvegi?
3. Hvørjar ætlanir eru í samband við trygd og ferðslu í Vágum? Her verður hugsað um
rundkoyringar o.a.
4. Er samstarv við kommunurnar í Vágum um at tálma ferðsluni og virka fyri tryggum
ferðsluviðurskiftum á vegastrekkinum til og frá flogvøllinum?
5. Hvør er ætlanin við landsvegnum í Sørvági og út til Bø og Gásadals hvat viðvíkur trygd og
ferðslu?
Viðmerkingar
Kommunurnar hava ábyrgdina av kommunalum vegi í bygdum øki. Í Vágum gongur landsvegur av
Fútakletti til Gásadals, tó við kommunalum veganeti í einum parti av Miðvági og Sørvági.
Ferðslan økist alsamt, serliga til flogvøllin, tó at koronafarsóttin náttúrliga hevur minkað um
ferðsluna vegna tað, at nógv minni av flúgving er júst nú.
Vágar og Mykines eru sera náttúruvakrar oyggjar, og tí er eisini nógvur vøkstur av útlendskum
ferðafólki, sum vilja síggja ferðamál í Vágum. Hesi vitja serliga Trøllkonufingur, Trælanípu, Bø,
Múlafoss í Gásadali, Mykines og Tindhólm. Ofta eru tað stórir bussar við vitjandi, og tað krevur
góðan logistik. Hetta er einamest ein lokal kommunal uppgáva, men har veganetið er alment, má
landið eisini vera við. Tí er tað avgerandi, at landið og kommunurnar hava felags átøk at tálma
ferðsluni og tryggja tryggar ferðslukarmar fyri ferðandi og serliga tey, sum búgva í Vágum. Nevnast
kann til dømis, at á vegastrekkjunum við Leynatunnilin er einki hegn fram við vegnum, og tað
hevur við sær, at seyður ofta loypur út á vegin. Eisini skal viðmerkjast, at skúlabyggingin á

-- 1 of 2 --

Giljanesi, sum skjøtil er settur á, er neyvt tengd at eini rundkoyring, sum Landsverk hevur lovað at
gera.
Tørvur er á at fáa nærri at vita, hvørjar ætlanir eru á hesum økjunum. Tí verður hesin
fyrispurningurin settur.
Á Løgtingi, 7. august 2020
Jóhannis Joensen

-- 2 of 2 --

F Í G G J A R M Á L A RÁ Ð I Ð
Ministry of Finance
Tinganes • Box 2039 • FO-110 Tórshavn
 (+298) 35 20 20 •  fmr@fmr.fo • www.fmr.fo
Løgtingið
Tinghúsvegur 1-3
Postboks 208
110 Tórshavn
Tórshavn, tann: 20. august 2020
J. nr.: 20/00363
Viðgjørt: MM
Svar upp á fyrispurning nr. 2/2020 eftir tingskipanini § 52a
Fyrispurningur frá Jóhannis Joensen, løgtingsmanni, settur Jørgen Niclasen, landsstýris-
manni í fíggjarmálum, um ferðsluviðurskiftir í Vágum
Fyrispurningurin er soljóðandi:
1. Hvørjar ætlanir hevur landsstýrið viðvíkjandi farleiðini til flogvøllin?
2. Hvørjar ætlanir hevur landsstýrið á vegastrekkinum við Leynatunnilin hvat viðvíkur
trygd fram við landsvegi?
3. Hvørjar ætlanir eru í samband við trygd og ferðslu í Vágum? Her verður hugsað um
rundkoyringar o.a.
4. Er samstarv við kommunurnar í Vágum um at tálma ferðsluni og virka fyri tryggum
ferðsluviðurskiftum á vegastrekkinum til og frá flogvøllinum?
5. Hvør er ætlanin við landsvegnum í Sørvági og út til Bø og Gásadals hvat viðvíkur trygd
og ferðslu?
Svar:
Spurningur 1:
Strandfaraskip Landsins upplýsir, at í samband við nýggja 7 ára sáttmálan hjá Bygdaleiðum og at
Eysturoyartunnilin verður liðugur, hevur verið umhugsað at umskipa ferðaætlanina, bussar og
bussførarar, herundir økja um tænastuna á leiðunum 300 og 400 og møguliga skapa eina snarleið
til flogvøllin. Harumframt verða ymisk rakstrarmennandi átøk sum nýggj bíleggingarskipan og
prísskipan roynt komandi ár.
Spurningur 2:
Landsverk upplýsir, at í løtuni eru ikki ávísar ætlanir viðvíkjandi vegastrekkinum við
Leynatunnilin.

-- 1 of 2 --

F Í G G J A R M Á L A R Á Ð I Ð
Ministry of Finance
2/2
Spurningur 3:
Ferðslan á landsvegnum við Sørvágsvatn er økt frá 2010 til 2019 við uml. 40% ella uml. 3.200
bilar um samdøgri, men í ár er hon minkað til uml. 2.300 bilar um samdøgri orsakað av COVID-
19, sum millum annað hevur viðført minni ferðslu til flogvøllin.
Í Samferðsluætlanini fyri 2018 – 2030 er greitt frá nøkrum batum á landsvegunum í Vágum, og
umhugsað hevur verið at gera eina rundkoyring við Giljanes. Í løtuni eru tó ikki ávísar ætlanir
hesum viðvíkjandi.
Spurningur 4:
Seinastu 10 árini hava verið gjørd fleiri ferðslutrygdarátøk í Sandavági, Miðvági og Sørvági.
Síðsta verkætlanin var at bøta um skúlavegin millum Sandavág og Nesveg við Giljanes. Hetta er
gjørt í samráð við kommunurnar.
Spurningur 5:
Landsverk upplýsir, at í løtuni eru ikki ávísar ætlanir viðvíkjandi hesum teininum.
Tinganes, 20. august 2020
Jørgen Niclasen
landsstýrismaður í fíggjarmálum

-- 2 of 2 --