52-081/2019

Dagf. 20. mai 2020
HMR J. nr. 20/00465-5
Kaj Leo Holm Johannesen
landsstýrismaður
Svar
upp á
fyrispurning nr. 81/2019 eftir § 52a í tingskipanini viðvíkjandi bíðitíðum í psykiatriini frá
Jóhannis Joensen, løgtingsmanni
Spurningurin var soljóðandi:
1. Hvussu er aktuella støðan viðvíkjandi bíðitíðum í psykiatriini?
2. Hvussu er aktuella støðan viðvíkjandi bíðitíðum til útgreinan fyri ADHD og autismu?
3. Kunnu vit vænta, at serligu umstøðurnar í.s.v. Koronusmittuna ávirka bíðitíðirnar í psykitatriini?
4. Og um so er, hvussu nógv kunnu fólk vænta, at bíðitíðirnar verða longdar?
Svar:
Til spurning 1, 2, 3 og 4
Løgtingsmaðurin nágreinar í viðmerkingunum, at talan er um bíðitíðirnar hjá børnum, sum skulu
útgreinast fyri serligar avbjóðingar so sum ADHD og ella autismu. Tað er við støði í hesum, at
svarað verður.
Samanumtikið hevur hetta tíðarskeiðið við koronu ávirkað og seinkað møguleikarnar at koma til
útgreiningar, og tí eru bíðitíðirnar nakað longri í dag enn áðrenn Grækarismessu.
Tað hevur ávirkan á bíðitíðina, um talan ávikavist er um planlagt virksemi, ella í hvønn mun talan
er um bráðfeingis støður. Tílíkar avgerðir byggja altíð á eina læknafakliga meting.
Í løtuni er vanliga planlagda bíðitíðin at koma til útgreiningar fyri ADHD og autismu umleið 4-5
mánaðir. Tað merkir, at bíðitíðin er longd 1-2 mánaðir hetta tíðarskeiðið, meðan avmarkingar hava
verið í teimum ambulantu viðgerðunum orsakað av koronastøðuni.
Landssjúkrahúsið hevur upplýst fyri Heilsumálaráðnum, at Barna- og ungdómspsykiatriin fekk
sjáldsama nógvar ávísingar í februar og mars 2020, sum eisini ávirkaði bíðitíðina, men henda gongd
hasaði av, tá koronasmittan fór at gera um seg, og avmarkingar vóru gjørdar í teimum ambulantu
viðgerðunum.

-- 1 of 2 --

Barna- og ungdómspsykiatriin arbeiðir sjálvsagt við at minka um bíðitíðina mest møguligt og
skjótast gjørligt, men tað er sera torført at meta um, hvussu tað fer at gangast við at minka aftur um
bíðitíðina fyri tær viðgerðir, sum ikki eru bráðfeingis. Hetta er tengt at, hvussu gongdin verður við
ávísingum til Barna- og ungdómspsykiatriina, nú gerandisdagurin aftur verður meira vanligur í
kommunulæknaviðtaluni og á Sernámi.
Samgongan hevur sum flestum kunnugt sett sær sum mál at fáa viðgerðartrygd sett í verk í
sjúkrahúsverkinum. Fyri jól handaði ein arbeiðsbólkur landsstýrismanninum tilmæli um, hvussu
farast kann fram í arbeiðinum at skipa viðgerðartrygd í Føroyum. Hetta arbeiðið er eisini nakað
seinkað av koronastøðuni, men verður tikið uppaftur. Talan er um eitt arbeiði, sum
landsstýrismaðurin raðfestur høgt.
Heilsumálaráðið, 20. mai 2020
Kaj Leo Holm Johannesen
landsstýrismaður

-- 2 of 2 --

Nr. 81/2019
Jóhannis Joensen
løgtingsmaður
Fyrispurningur eftir Tingskipanini § 52a
Fyrispurningur viðvíkjandi bíðitíðum í psykiatriini, settur landsstýrismanninum
í heilsumálum, Kaj Leo Holm Johannesen (at svara skrivliga eftir TS § 52a)
1. Hvussu er aktuella støðan viðvíkjandi bíðitíðum í psykiatriini?
2. Hvussu er aktuella støðan viðvíkjandi bíðitíðum til útgreinan fyri ADHD og
autismu?
3. Kunnu vit vænta, at serligu umstøðurnar í.s.v. Koronusmittuna ávirka
bíðitíðirnar í psykitatriini?
4. Og um so er, hvussu nógv kunnu fólk vænta, at bíðitíðirnar verða longdar?
Viðmerkingar:
Við Koronusmittuni varð gerandisdagurin hjá flestu okkara kollveltur. Hetta hevur
ávirkað stórar partar av samfelagnum, og nógv okkara liva í óvissu um framtíðina. Bæði
í heilsu- og almannaverkinum hava vit seinastu árini havt avbjóðingar við longum
bíðilistum. Nú henda serliga støðan er íkomin, eru tað fleiri, sum stúra fyri, at
bíðitíðirnar gerast enn longri. Hetta er til dømis galdandi fyri foreldur at børnum, sum
skulu útgreinast fyri serligar avbjóðar so sum ADHD og/ella autismu.
Ynskiligt er, at landsstýrismaðurin greiðir frá, hvussu serliga støðan ávirkar hesi
viðurskifti. Tí verður hesin fyrispurningurin settur.
Á Løgtingi, 7. mai 2020
Jóhannis Joensen

-- 1 of 1 --