52-073/2019

1 / 2
Helgi Abrahamsen
landsstýrismaður
Svar
upp á
Fyrispurning nr. 73/2019 frá Aksel V. Johannesen, løgtingsmanni, viðvíkjandi endurgjaldi til
fyritøkur og feløg, settur landsstýrismanninum í vinnu- og umhvørvismálum Helga Abrahamsen
(at svara skrivliga eftir TS § 52 a)
Spurningur
1) Hvussu ber tað til, at vegleiðingin hjá Umhvørvis- og vinnumálaráðnum ísv. endurgjald til
fyritøkur, orsakað av korona, sigur, at tað verður ikki latin stuðul minni enn 6.000 kr. um
mánaðin, tá Løgtingið samtykti broytingaruppskotið um at strika minstamarkið?
2) Er tað rætt skilt, at landsstýrismaðurin metir, at áhugafeløg við v-tali, sum hava mist ella
koma at missa munandi inntøkur, ikki hava rætt til endurgjald eftir hjálparpakka 2?
Svar:
Til nr. 1
Á heimsíðuni hjá Umhvørvis- og vinnumálaráðnum hevur ikki verið vegleiðing um løgtingslóg um
stuðulsskipan til fyritøkur til fastar útreiðslur orsakað av COVID-19. Á heimsíðuni varð kunnað um
innihaldið uppskotinum, sum varð latið Løgtinginum, løgtingsmál nr. 135/2019, m.a. um
minstamarkið upp á 6.000 kr. Tað varð sum kunnugt strikað undir viðgerðini í Løtinginginum.
Kunningin á heimusíðu Umhvørvis- og vinnumálaráðsins, sum ikki varð rættað samsvarandi
beinanvegin, er seinni rættað.
,
Til nr. 2
Løgtingslóg um stuðulsskipan til fyritøkur til fastar útreiðslur orsakað av COVID-19 heimilar
landsstýrismanninum at seta nærri reglur um stuðulskipanina. Nærri reglur verða ásettar í kunngerð
um stuðulskipanina, sum verður sett í gildi fyrsta dagin.
Endamálið við stuðulslógini er m.a. at forða fyri stórum húsagangi í vinnuni við tí avleiðing, at
størv í vinnuni í stórum tali hvørva. Eftir kunngerðini verða feløg, grunnar o.a. við
almannagagnligum ella góðgerandi endamáli tí ikki fevnd av stuðulsskipanini.
Í kunngerðini verður ein fyritøka allýst sum
a) Ein likamligur persónur, sum fyri egna rokning rekur vinnuligt virksemi, t.e. sjálvstøðugt
vinnurekandi ella einstaklingafyritøka, ella
b) ein løgfrøðiligur persónur, undir hesum parta- og smápartafelag, íognarfelag,
kommandittfelag, lutafelag, og aðrar fyritøkur við avmarkaðari ábyrgd ella deild undir
útlendskum løgfrøðiligum persóni, sum rekur vinnuligt virksemi í Føroyum.
Vinnuligt virksemi verður í kunngerðini allýst soleiðis:
Søla av vørum ella immateriellum rættindum, tænastuveitingum o.l., sum fyritøkan vanliga
móttekur viðurlag fyri ella sølu ella útleigan av fastogn, og har fyritøkan hevur sum endamál at
fremja fíggjarligu áhugamálini hjá eigaranum av fyritøkuni, eigarunum av ella luttakarunum í
felagnum ella fíggjarligu áhugamálini hjá grunninum.

-- 1 of 2 --

2 / 2
Umhvørvis- og vinnumálaráðið, tann 6. mai 2020
Helgi Abrahamsen
landsstýrismaður

-- 2 of 2 --

Aksel V. Johannesen Nr. 73/2019
løgtingsmaður
Fyrispurningur eftir tingskipanini § 52 a
Fyrispurningur viðvíkjandi endurgjaldi til fyritøkur og feløg, settur landsstýrismanninum í
vinnu- og umhvørvismálum Helga Abrahamsen (at svara skrivliga eftir TS § 52 a)
1. Hvussu ber tað til, at vegleiðingin hjá Umhvørvis- og vinnumálaráðnum ísv. endurgjald til
fyritøkur, orsakað av korona, sigur, at tað verður ikki latin stuðul minni enn 6.000 kr. um
mánaðin, tá Løgtingið samtykti broytingaruppskotið um at strika minstamarkið?
2. Er tað rætt skilt, at landsstýrismaðurin metir, at áhugafeløg við v-tali, sum hava mist ella koma
at missa munandi inntøkur, ikki hava rætt til endurgjald eftir hjálparpakka 2?
Viðmerkingar:
Hjálparpakki 2 varð samtyktur í Løgtinginum 6. apríl. Landsstýrismaðurin í vinnumálum vildi áseta
eitt minstamark fyri, hvussu høgar tær føstu útreiðslurnar hjá eini fyritøku skuldu vera fyri at fáa
endurgjald fyri mistar inntøkur orsakað av korona. Talan var um eitt minstamark á kr. 6000. Fleiri
tinglimir, eisini undirritaði, vildu hava hetta markið strikað, so smáar fyritøkur og feløg kring landið
eisini verða loftað av hjálparpakkanum. Fleiri áhugafeløg hava lágar inntøkur og lágar útreiðslur,
men verða hart rakt nú, tá ið inntøkurnar eru mistar, men útreiðslurnar framvegis skulu rindast. Ikki
minst fyritøkurnar og feløgini úti um landið, har føstu útreiðslurnar eitt nú til hølisleigu eru
munandi lægri enn í høvuðsstaðarøkinum. Harafturat tykist tað ógreitt í lógini, hvussu ein fyritøka
verður allýst, um talan bara er um vinnuligar fyritøkur ella um áhugafeløg, sum hava eitt v-tal,
eisini eru fevnd av hjálparpakkanum.
Tað er undrunarvert, at vegleiðingin hjá Umhvørvis- og vinnumálaráðnum sigur, at fyritøkur og
feløg í minsta lagi skulu hava kr. 6000 í útreiðslum fyri at fáa endurgjald, tá Løgtingið hevur
samtykt at strika markið. Tí mugu vit fáa greiðu á, um talan er um ein feil, ella um
landsstýrismaðurin hevur valt at hyggja burtur frá tí, sum Løgtingið hevur samtykt.
Á Løgtingi, 24. apríl 2020
Aksel V. Johannesen

-- 1 of 1 --