52-046/2019

F Í G G J A R M Á L A RÁ Ð I Ð
Ministry of Finance
Tinganes • Box 2039 • FO-110 Tórshavn
 (+298) 35 20 20 •  fmr@fmr.fo • www.fmr.fo
Løgtingið
Tinghúsvegur 1-3
Postboks 208
110 Tórshavn
Tórshavn, tann: 28. januar 2020
J. nr.: 20/00035
Svar uppá spurning nr. 46/2019 eftir § 52a í tingskipanini
Spurningur frá Brandi Sandoy, løgtingsmanni, settur Jørgen Niclasen, landsstýrismanni í
fíggjarmálum, um grótkastið í Skopun.
Spurningurin er soljóðandi:
1. Nær verður grótið í innsiglingini til Skopunar havn ruddað burtur?
2. Hevur landsstýrismaðurin ætlanir um at gera neyðugu umvælingarnar á grótkastið í
Skopun, og nær fer hetta arbeiðið í gongd?
Svar:
Landsverk upplýsir, at grótið, sum kemur í innsiglingina í Skopun, er restin av tí brimverju, sum
bleiv løgd uttanfyri pierin á Bergi fyrst í 1990’unum. Av tí at verkætlanin ongantíð varð
liðugtgjørd, er grótið farið við briminum og nakað er endað í innsiglingini. Økið um endan á
pierinum er ruddað, soleiðis at trygt er hjá Teistanum at sigla í ávísari frástøðu. Í 2015 og 2017
varð nógv grót tikið burtur. Síðan hevur Landsverk gjørt árligar uppmátingar av botninum. Í
2019 varð mett neyðugt at taka nakrar fáar steinar upp afturat, tí hesir minkaðu nakað um dýpið í
innsiglingini, og hetta arbeiðið varð gjørt. Landsverk fer um mánaðarskiftið apríl/mei at gera
árligu uppmátingina fyri at vita um viðurskiftini eru broytt í vetur og um tørvur verður at gera
meira. Landsverk leggur afturat, at høvuðsorsøkin til, at tað er meira ókyrt í innsiglingini nú, er
at grótkastið uttanfyri pierin á Bergi ikki longur dempar alduna, tí tað er nærum burtur.
Stóra grótkastið á Símunarbukt hevur nøkur sár, sum Landsverk heldur eyga við. Talan er um
tvey ymisk viðurskifti. Tað, sum sæst sum sár út móti havinum við sjóvarmálan, er nakað sum
roknað er við. Grótkastið er gjørt soleiðis, at uttasti parturin skal leggja seg við tíðini og tí er
hesin parturin so breiður. Landsverk upplýsir, at so leingi henda máan ikki nærkast sjálvari
krúnuni, er eingin vandi á ferð.
Sárini, sum eru uppi á krúnuni, áttu at verið umvæld, og er hetta nakað, sum Landsverk hevur
gjørt Skopunar kommunu varuga við. Eftirsum talan er um kommunala havn, er grótkastið ikki
rakstrarøki hjá Landsverk. Síðsta summar hampaði Landsverk tó uppá innsíðuna á grótkastinum.
Tinganes, 29. januar 2020
Jørgen Niclasen
Landsstýrismaður í fíggjarmálum

-- 1 of 1 --

Nr. 46/2019
Brandur Sandoy
løgtingsmaður
Fyrispurningur eftir Tingskipanini § 52a
Fyrispurningur um grótkastið í Skopun, settur landsstýrismanninum í
fíggjarmálum, Jørgen Niclasen (at svara skrivliga eftir TS § 52a)
1. Nær verður grótið í innsiglingini til Skopunar Havn ruddað burtur?
2. Hevur landsstýrismaðurin ætlanir um at gera neyðugu umvælingarnar á grótkastið í
Skopun, og nær fer hetta arbeiðið í gongd?
Viðmerkingar:
Aftur í vetur uppliva tey, sum hava Teistan sum sín farveg til og frá arbeiði, at nógvar
avlýsingar eru á leiðini.
Ein stórur partur av hesum avlýsingum er orsakað av, at nógv grót er í innsiglingini til
Skopunar Havn, sum ger, at tað gerst ókyrrari og ótryggari at sigla inn. Harav fleiri
avlýsingar.
Grótið, sum legst fyri innsiglingina, er grót, sum kemur úr grótkastinum, ið landið
eigur. Grótkastið er seinastu árini byrjað at detta sundur, og nógv sjónlig sár eru í
grótkastinum.
Hendan burturmáan er í støðum nú komin so langt, at komið er inn á smærru
steinarnar í grótkastinum, sum dekkgrótið skuldi verja. Tað sigur seg sjálvt, at tá hetta
er veruleiki, er bara spurningur um tíð, nær grótkastið fær sera stóran skaða.
Spyrjaranum kunnugt, hevur Landsverk lagt úr hondum støðulýsing av grótkastinum,
sum eigur at vera til taks hjá landsstýrismanninum.
Vetrartíð er ikki tíð at arbeiða við hesum, men um fáar mánaðir verður summarið
aftur, og tí verður hervið gjørt vart við hesi vandaviðurskifti í góðari tíð, so at
landsstýrið kann taka hædd fyri hesum alneyðuga spurningi fyri at tryggja landsins
ognir og tryggja eitt nøktandi samband til Sandoynna inntil koyrandi er í
Sandoyartunlinum.
Á Løgtingi, 17. januar 2020
Brandur Sandoy

-- 1 of 1 --