52-040/2019

Helgi Abramhamsen
landsstýrismaður
Svar
upp á
fyrispurning nr. 40/2019 frá Johan Dahl, løgtingsmanni um matrikulering og útskifting av jørð,
settur landsstýrismanninum í umhvørvismálum, Helga Abrahamsen (at svara skrivliga eftir TS
§ 52a)
Spurningurin var soljóðandi:
1. Hvussu long er veruliga málsviðgerðartíðin í sambandi við matrikulering og útskifting av jørð -
býtt upp á høvuðssløg av málum?
2. Hvussu nógv mál um matrikulering og útskifting eru innkomin til málsviðgerð í 2017, 2018 og
2019 - býtt uppá høvuðssløg av málum?
3. Hvussu nógv mál um matrikulering og útskifting eru avgreidd í 2017, 2018 og 2019 - býtt uppá
høvuðssløg av málum?
4. Hvørjar ítøkiligar ætlanir hevur landsstýrismaðurin um at stytta um málsviðgerðartíðina?
5. Eru meira orka og peningur sett av til málsviðgerð av matrikulering og útskifting í 2020?
Svar:
Til spurning 1
Matrikuler málsviðgerð er sera ymisk og fjøltáttað. Ásett er í § 20, sbr. § 17, í matrikullógini, at øll
matrikuler mál skulu til hoyringar hjá avvarðandi kommunu. Hartil kunnu aðrir hoyringarpartar vera
inni í myndini, t.d. Búnaðarstovan, Landsverk, friðingarmyndugleikin o.s.fr. Hoyringartilgongdin
tekur í minsta lagi tveir mánaðir, men kann eisini vera drúgvari. Í sambandi við útstykkingar kemur
eisini ofta fyri, at grundstykkini verða seld eins skjótt, sum tey eru projekterað, men
matrikulmyndugleikin kann ikki gera uppmátingar og seta stykkini av, fyrr enn útstykkingin er liðug
við vegum og øllum installatiónum. Hesum veit borgarin ikki av, og tí fær matrikulmyndugleikin ofta
ábyrgdina av eini seinking, har tað í veruleikanum snýr seg um, at grundstykkini eru seld ov tíðliga.
Sostatt kann tað verða sera stórur munur á brutto-málsviðgerðartíðini og netto-málsviðgerðartíðini,
tað vil siga tíðin, síðan søkt verður, roknað í mun til tíðina, har arbeiðast kann við málinum.
Harumframt kunnu tað vera ymsar byrðar á ognunum, arbeitt verður við, sum skulu avlýsast, áðrenn
málini kunnu avgreiðast. Slíkar kunnu t.d. vera ymiskir servituttar (t.d. traðarservituttar), friðingar,
veðrættir o.a.
Hesi seinastu 2-3 árini hevur stórt trýst verið á matriklinum. Neyðugt hevur tí verið at raðfesta málini
soleiðis, at tey sum høvdu størsta skund, hava verið avgreidd fyrst. Hetta eru útstykkingar ella gerð
av grundstykkjum, mál um eigaraíbúðir, vinnustykki og mál av stórum fíggjarligum týdningi.
Møguligt er ikki at svara spurningi 1 nágreiniliga, tí journalskipanin hjá Umhvørvisstovuni skrásetur
einans brutto-málsviðgerðartíðir og ikki netto-málsviðgerðartíðir. Hagtølini í skipanini gerast
misvísandi orsakað av, at tíðin, har Umhvørvisstovan t.d. bíðar eftir einum øðrum myndugleika ella

-- 1 of 3 --

supplerandi upplýsingum frá umsøkjaranum, telur sum málsviðgerðartíð, hóast matrikulera málið
liggur stilt.
Verður hugt at brutto-málsviðgerðartíðunum sæst, at mál um sundurbýti taka í minsta lagi 3 mánaðir
at gera. Tað kemur tó rættiliga ofta fyri, at ein byggiharri ger broytingar í projektunum, at kommunan
ikki hevur góðkent útstykkingarætlanina ella krevur broytingar í henni, eins og aðrar seinkingar
kunnu vera. Tí kann málsviðgerðin gerast longri, so slík mál taka millum 3 og 12 mánaðir at avgreiða.
Onkur dømi eru tó um líknandi mál, sum av ítøkiligum orsøkum hava tikið longri tíð at avgreiða. Mál
um eigaraíbúðir hava somuleiðis høga raðfesting og taka vanliga uml. 6 mánaðir at avgreiða.
Innangarðs útskiftingar eru størri verkætlanir, sum ganga yvir fleiri ár. Hesar kunnu ikki samanberast
við matrikuler mál og eru tí ikki tikin við í hagtølini. Uttangarðs útskiftingar fylla ikki eins nógv, men
hesar verða ofta seinkaðar orsakað av serstøkum viðurskiftum á staðnum.
Til spurning 2
Innkomnar matrikulerar umsóknir 2017-19, bólkaðar í høvuðsmálssløg
Sundurbýti Sundurbýti til
samanlegging
Marknaumskipan Marknaumskipan
til veg
Eigaraíbúðir
2017 89 24 76 9 4
2018 102 28 84 23 3
2019 66 20 54 10 1
Viðvíkjandi spurninginum um útskiftingar verður víst til svar 1 omanfyri.
Til spurning 3
Avgreidd matrikuler mál 2017-19, bólkað í høvuðsmálssløg
Sundurbýti Sundurbýti til
samanlegging
Marknaumskipan Marknaumskipan
til veg
Eigaraíbúðir
2017 78 20 63 6 1
2018 76 24 78 10 4
2019 76 19 54 15 2
Viðmerkjast skal, at tølini fyri avgreidd mál í 2018 eru ávirkað av, at tvey starvsfólk í 6 mánaðir
vórðu tikin úr málsviðgerðini og sett til at fyrireika talgildingina av matrikularkivinum.
Viðvíkjandi spurninginum um útskiftingar verður víst til svar 1 omanfyri.
Til spurning 4
Umhvørvisstovan hevur í longri tíð arbeitt við at endurskoða fyrisitingarligu mannagongdirnar
soleiðis, at málsviðgerðartíðin kann styttast. Hetta kann gerast við eina kunngerð um matrikulert
arbeiði við tilhoyrandi vegleiðingum. Eisini hevði ein sokallað planskrá, sum skal innihalda allar
galdandi byggisamtyktir, lætt munandi um arbeiðið.

-- 2 of 3 --

Til spurning 5
Ætlanin er at fáa arbeiðið við kunngerð um matrikulert arbeiði við tilhoyrandi vegleiðingum
avgreitt so skjótt sum til ber.
Ein hægri játtan til Matrikulin hevði ikki sæst aftur beinanvegin í lækkandi málsviðgerðartíðum.
Málsøkið er serstakt, og tað tekur eini 2-3 ár at læra fólk upp, so tey kunnu arbeiða sjálvstøðugt.
Einans útbúnir landinspektørar ella landmátarar hava fakligan førleika til at taka sær av
matrikulerari málsviðgerð beinanvegin, tey verða sett í starv. Seinastu 10 árini er tað einans ein
føroyingur, sum hevur lokið útbúgvingina.
Umhvørvisstovan hevur seinastu tvey árini roynt at vekja áhuga fyri fakøkinum við at bjóða nýliga
útbúnum miðnámsskúlanæmingum tíðaravmarkað starv sum starvslesandi. Vónin er, at hetta sum
frálíður fer at geva úrslit, so fleiri føroyingar velja hesa útbúgvingarleiðina.
Umhvørvis- og vinnumálaráðið, 21. januar 2020
Helgi Abrahamsen
landsstýrismaður

-- 3 of 3 --

Nr. 40/2019
Johan Dahl
løgtingsmaður
Fyrispurningur eftir Tingskipanini § 52a
Fyrispurningur um matrikulering og útskifting av jørð, settur landsstýris-
manninum í umhvørvis- og vinnumálum, Helga Abrahamsen (at svara skrivliga
eftir TS § 52a)
1. Hvussu long er veruliga málsviðgerðartíðin í sambandi við matrikulering og
útskifting av jørð - býtt upp á høvuðssløg av málum?
2. Hvussu nógv mál um matrikulering og útskifting eru innkomin til málsviðgerð í
2017, 2018 og 2019 - býtt uppá høvuðssløg av málum?
3. Hvussu nógv mál um matrikulering og útskifting eru avgreidd í 2017, 2018 og
2019 - býtt uppá høvuðssløg av málum?
4. Hvørjar ítøkiligar ætlanir hevur landsstýrismaðurin um at stytta um
málsviðgerðartíðina?
5. Eru meira orka og peningur sett av til málsviðgerð av matrikulering og útskifting í
2020?
Viðmerkingar:
Uppgávurnar hjá Matrikuldeildini á Umhvørvisstovuni eru m.a. at umsita matrikulmál
og útskifting av jørð innangarðs og uttangarðs.
Støðan í løtuni er tann, at fólk t.d. bíða í fleiri mánaðir eftir at fáa eitt jarðarstykki
matrikulerað; onkur hevur enntá bíðað í 1-2 ár eftir málsviðgerð og avgreiðslu frá
Umhvørvisstovuni.
Tosað verður nógv um bústaðarneyð, men tað er trupult at gera nakað við tað, tá
málviðgerðin er so langt afturút, og málini bara hópa seg upp.
Upplýst verður á heimasíðuni hjá Umhvørvisstovuni, at málsviðgerðartíðin kann vera
ymisk, alt eftir teim ítøkiligu umstøðunum í málinum. Ein vegleiðandi
málsviðgerðartíð er ímillum 6 og 12 mánaðir.
Henda langa viðgerðar- og bíðitíðin er ikki nøktandi. Tí verður hesin fyrispurningur
settur.
Á Løgtingi, 9. januar 2020
Johan Dahl

-- 1 of 1 --