52-034/2019

ALMANNAM ÁL ARÁÐIÐ
Eirargarður 2 • FO-100 Tórshavn
Tel: +298 304000 • Fax: +298 304045 • E-mail: amr@amr.fo
Løgtingið
Tinghúsvegur 1-3
110 Tórshavn
16. desember 2019
Mál: 19/00990-2
Tygara Skriv:
Viðgjørt: JAK
Nr. 34/2019
Svar
uppá
fyrispurning nr. 34/2019 frá Hervør Pálsdóttir, løgtingsmanni. Fyrispurningur um
ábyrgd av heimleysum, settur landsstýrismanninum í almannamálum, Elsebeth Mercedis
Gunnleygsdóttur (at svara skrivliga eftir TS § 52a)
Fyrispurningurin er soljóðandi:
1. Er nøkur ætlan at fáa staðfest við lóg, hvør myndugleiki hevur ábyrgd av heimleysum?
2. Hvat verður gjørt fyri at hjálpa teimum, ið eru heimleys í Føroyum?
3. Hvønn skulu heimleys venda sær til fyri at fáa ta hjálp, teimum tørvar?
4. Hvussu nógv heimleys eru í Føroyum, og hvør telur við sum heimleysur?
Svar
Til nr. 1
Í løtuni er eingin løgtingslóg, ið ásetir, at ein ávísur myndugleiki hevur ábyrgdina av
heimleysum persónum í Føroyum, og sum landsstýriskvinna í bústaðamálum havi eg ongar
ítøkiligar ætlanir um at seta slíka lóg í gildi. Heldur havi eg valt at hugsavna meg um at loysa
yvirskipaða bústaðatrupulleikan.
Til nr. 2
Sum spyrjarin sjálv kemur inn á í spurningi sínum, er “heimloysi” eitt breitt hugtak, ið kann
fevna um nógvar ymiskar støður. Tann mest álvarsama støðan er sjálvsagt hon, tá ið persónar
als ikki hava nakran bústað. Hesin bólkur av persónum stríðist ofta við víðfevndar og
samansettar trupulleikar, og tí er umráðandi, at vit sum samfelag geva teimum alla tað hjálp og
umsorgan, sum vit hava møguleika fyri. Tíbetur hava vit fyriskipanir í Føroyum, ið gera, at
persónar, sum enda í hesari støðuni, altíð hava atgongd til eitt stað at sova, eta og vaska sær.

-- 1 of 2 --

ALMANNAM ÁL ARÁÐIÐ
síða 2 av 2
Herbergið, Gloria og Blákrossheimið fáa sostatt árligan stuðul á fíggjarlógini upp á 6,25 mió.
kr.
Heimloysi fevnir tó eisini um aðrar støður, eitt nú tá ið persónar búgva í einum ótryggum ella
óhóskandi bústaði, ella hava fyribils bústað hjá familju ella vinfólki. Ábendingar eru um, at tað
í dag eru persónar, ið koma undir hesa skilmarkingina, og tað er ikki nøktandi. Hevur støðan
sosialar avleiðingar við sær, hevur Almannaverkið skyldu at veita hjálp, ráð og vegleiðing.
Stakir uppihaldarar hava harafturat møguleika at skriva seg upp á ein bráðtørvslista hjá
Almannaverkinum. Talan er tó bara um fyribils hýsing í upp til 1 ár, har endamálið er at geva
teimum, ið lúka treytirnar fyri at koma á listan, møguleika at fáa eitt stað at búgva, meðan leitað
verður eftir einum føstum bústaði.
Omanfyri nevndu viðurskifti eru orsøkin til, at tað er settur ein skjótt arbeiðandi arbeiðsbólkur
– við breiðari umboðan úr almenna og privata geiranum – at koma við ítøkiligum uppskotum
til landsstýrið um, hvørji átøk kunnu setast í verk til tess at bøta um bústaðatrupulleikan.
Arbeiðsbólkurin skal lata sína frágreiðing fyrst í komandi ári, og eg vænti, at eg stutt eftir kann
koma við einari ætlan fyri økið.
Til nr. 3
Víst verður til nr. 2 omanfyri.
Til nr. 4
Í løtuni eru eingin almenn hagtøl fyri, hvussu nógvir heimleysir persónar eru í Føroyum. Vit
vita tí ikki neyvt, hvussu útbreitt heimloysið er. Hetta er galdandi fyri báðar skilmarkingarnar
omanfyri – tó serliga fyri ta seinnu – og hetta er ikki nøktandi.
Fyribils havi eg tó valt at raðfesta tann partin, ið snýr seg um at betra um møguleikarnar hjá
øllum føroyingum at fáa ein virðiligan og hóskandi bústað, men í longdini er neyðugt at fáa
betri vitan innan økið. Tí eru ætlanir um at fara undir at skipa hagtøl á økinum við støði í einum
ES-standardi; hetta so at tað í framtíðini verður møguligt at føra ein meira skynsaman og
málrættaðan bústaðapolitikk.
Tórshavn, 18. desember 2019
Elsebeth Mercedis Gunnleygsdóttur
landsstýrismaður

-- 2 of 2 --

Hervør Pálsdóttir
løgtingsmaður Nr. 34/2019
Fyrispurningur eftir Tingskipanini § 52a
Fyrispurningur um ábyrgd av heimleysum, settur landsstýrismanninum í almannamálum,
Elsebeth Mercedis Gunnleygsdóttur (at svara skrivliga eftir TS § 52a)
1. Er nøkur ætlan at fáa staðfest við lóg, hvør myndugleiki hevur ábyrgd av heimleysum?
2. Hvat verður gjørt fyri at hjálpa teimum, ið eru heimleys í Føroyum?
3. Hvønn skulu heimleys venda sær til fyri at fáa ta hjálp, teimum tørvar?
4. Hvussu nógv heimleys eru í Føroyum, og hvør telur við sum heimleysur?
Viðmerkingar:
Tað er einki nýtt í, at bústaðarneyðin í Føroyum er stór. Fleiri liva í konstantum ótryggleika, tí tey
ikki hava fast tak yvir høvdið. Í Føroyum hava vit ikki lóg um heimleys, eins og tey hava
aðrastaðni. Fleiri føroyingar uppliva, at eingin hjálp er at fáa, tá tey gerast heimleys, tí ábyrgdin ikki
liggur hjá nøkrum ávísum myndugleika.
Tí verður hesin fyrispurningur settur, fyri at vita, hvør hevur ta ábyrgdina, tá fólk eru vorðin
heimleys.
Á Løgtingi, 5. desember 2019
Hervør Pálsdóttir

-- 1 of 1 --