52-006/2019

F Í G G J A R M Á L A R Á Ð I Ð
M I N I S T R Y O F F I N A N C E
Løgtingið
Tinghúsvegur 1-3
Postboks 208
110 Tórshavn
Tórshavn, 21. novembur 2019
J.Nr.: 19/00358
Svar upp á fyrispurning nr. 6/2019 eftir tingskipanini § 52a
Fyrispurningur frá Jóhan Eli Poulsen, løgtingsmanni, settur Jørgeni Niclasen,
landsstýrismanni í fíggjarmálum, um tunnilsvegin til Hvalbiartunnilin.
Fyrispurningurin er soljóðandi:
1. Hvør er orsøkin til, at vegurin til nýggja Hvalbiartunnilin Hvalbiarmegin verður
gjørdur við fleiri smáum svingum, heldur enn einum svingi?
2. Kann landsstýrismaðurin greiða frá, hví vegurin er lagdur har, tekningarnar hjá
Landsverki leggja upp til?
3. Um støðið verður tikið í tekningunum hjá Landsverki, ætlar landsstýrismaðurin at
gera nakað við tað?
Svar til 1 og 2
Arbeiðið við Hvalbiarfarleiðini gongur eftir ætlan. Borðað verður ígjøgnum næsta ár, og verður
farleiðin liðug í 2021.
Landsverk upplýsir, at fleiri linjur vóru skitseraðar í samband við at planleggja nýggja
Hvalbiartunnilin. Trý uppskot til vegaføring gjøgnum dalin hava verið viðgjørd nærri. Eitt
uppskot var at fara gjøgnum uppdyrkaða lendið (traðirnar), eitt annað omanfyri og tað triðja
niðanfyri.
Landsverk sigur, at út frá eini heildarmeting av umstøðunum varð valt at leggja nýggja vegin
soleiðis, at farið verður frá landsvegnum til Nes niðanfyri uppdyrkaða lendið, og síðani
bendist vegurin burtur frá ánni, tá komið er longur inn í Dalin. Sambært Landsverk er hetta
fyri at taka atlit til uppdyrkaða lendið og umhvørvið longur inni í Dalinum. Hetta er millum
annað orsøkin til, at vegurin hevur fleiri smærri sving.
Landsverk ger vart við, at vegurin lýkur øll vegateknisk krøv og smáu svingini hava ikki
neiliga ávirkan á ferðsluna. Vegaføringin hevur eisini verið ígjøgnum eina sokallaða

-- 1 of 2 --

F Í G G J A R M Á L A R Á Ð I Ð
M I N I S T R Y O F F I N A N C E
ferðslutrygdargranskoðan. Vegurin er lagdur soleiðis, at hann kann knýtast í ein
umkoyringingarveg um Hvalba, og er sostatt fyrireikaður til, at øll suðuroyarferðslan fer
henda vegin.
Samanumtikið hevur Landsverk upplýst, at Hvalbiarfarleiðin lýkur øll krøv til dygd, trygd og
ferðslu, og er framtíðartryggjað soleiðis, at hædd er tikin fyri at ein undirsjóvartunil verður
gjørdur til Suðuroyar.
Svar til 3
Vegaføringin er júst soleiðis, sum ásett í fylgiskjali “Mynd av linjuføringini”, ið varð lagt við
verklagslógini um nýggjan Hvalbiartunnil. Lógin varð samtykt á løgtingið í apríl 2018. Sí
skjal.
https://logting.fo/files/casestate/22435/114.17%20fylgiskjal%201%20Mynd%20av%20linjuf
oringini.pdf
Tinganes, 22. oktobur 2019
Jørgen Niclasen
landsstýrismaður

-- 2 of 2 --

Nr. 6/2019
Jóhan Eli Poulsen
løgtingsmaður
Fyrispurningur eftir Tingskipanini § 52a
Fyrispurningur um tunnilsvegin til Hvalbiartunnilin, settur landsstýris-
manninum í fíggjarmálum, Jørgeni Niclasen (at svara skrivliga eftir TS § 52a)
1. Hvør er orsøkin til, at vegurin til nýggja Hvalbiartunnilin Hvalbiarmegin verður
gjørdur við fleiri smáum svingum, heldur enn einum svingi?
2. Kann landsstýrismaðurin greiða frá, hví vegurin er lagdur har, tekningarnar hjá
Landsverki leggja upp til?
3. Um støðið verður tikið í tekningunum hjá Landsverki, ætlar landsstýrismaðurin at
gera nakað við tað?
Viðmerkingar:
Vegurin til Hvalbiartunnilin verður bygdur í løtuni. Tað hevur elvt til stóra undran fyri
fólk í Hvalba, at vegurin Hvalbiarmegin er farin væl oman um gamla uppdyrkingar-
vegin, ið liggur har. Fólk hava fingið tekningar frá Landsverki, ið vísa, at vegurin fær
eitt keðiligt “s” skap. Hetta elvir til mikla ørkymlan hjá bygdarfólkunum. Tað vildi
verið upplagt, um vegurin varð gjørdur við einum beinum strekki og bleytum svingi.
Vegurin verður væl at merkja partur av Suðuroyartunlinum, tá ið hann kemur.
Hugsa vit um ferðslutrygd og framtíðarferðslu gjøgnum Hvalbiartunnilin og á
tilhoyrandi vegum kann hugsast, at tað hevði verið skilabetri at lagt vegin soleiðis, at
hann varð so beinur sum gjørligt, við so fáum svingum sum tilber.
Á Løgtingi, 10. oktober 2019
Jóhan Eli Poulsen

-- 1 of 1 --