52-005/2019

Helgi Abramhamsen
landsstýrismaður
Svar
upp á
fyrispurning nr. 5/2019 frá Djóna Nolsøe Joensen, løgtingsmanni um ljóðdálking, settur
landsstýrismanninum í umhvørvismálum, Helga Abrahamsen (at svara skrivliga eftir TS § 52a)
Spurningurin var soljóðandi:
1. Ætlar landsstýrismaðurin at gera nakað fyri at tryggja heimafrið hjá fólki, sum búgva í økjum,
har ljóðdálking frá skipum er ein trupulleiki?
2. Um so er, hvussu ætlar landsstýrismaðurin at loysa trupulleikan við manglandi heimafriði?
Svar:
Til spurning 1
Landsstýrismaðurin ætlar at bera so í bandi, at til ber at tálma ljóðdálkingina frá skipum, sum liggja
í havn. Í komandi viku verður fundur við felagið Heimafrið og í næstum er ætlanin at kalla
kommunurnar inn til fund at viðgera málið.
Til spurning 2
Ætlanin er í samráð við kommunurnar, við kunngerð, at seta tiltøk í verk, sum kunnu tálma
ljóðdálkingina frá skipavirksemi í havnum. Landsstreymur er eisini ein partur av svarinum, men her
og nú er neyðugt at fáa sett í verk eina tilgongd, sum við tíðini kann tryggja, at ljóðdálkingin verður
tálmað. Spurningurin um landsstreym fer eisini at verða viðgjørdur, men neyðugt verður við
lógarfyrireikandi arbeiði, sum kann tryggja, at vit fáa teir røttu karmarnar fyri landsstreym.
Umhvørvis- og vinnumálaráðið, 16. oktober 2019
Helgi Abrahamsen
landsstýrismaður

-- 1 of 1 --

Nr. 5/2019
Djóni Nolsøe Joensen
løgtingsmaður
Fyrispurningur eftir Tingskipanini § 52a
Fyrispurningur um ljóðdálking, settur landsstýrismanninum í vinnu- og
umhvørvismálum, Helga Abrahamsen (at svara skrivliga eftir TS § 52a)
1. Ætlar landsstýrismaðurin at gera nakað fyri at tryggja heimafrið hjá fólki, sum
búgva í økjum, har ljóðdálking frá skipum er ein trupulleiki?
2. Um so er, hvussu ætlar landsstýrismaðurin at loysa trupulleikan við manglandi
heimafriði?
Viðmerkingar:
Felagið Heimafriður hevur seinastu tíðina arbeitt nógv við at varpa ljós á trupulleikan
við ljóðdálking frá skipum, sum ger seg galdandi í fleiri økjum í landinum m.a. í
Saltangará, Runavík, á Signabø, í Fuglafirði og aðrastaðni. Hesar áheitanir um at
tryggja heimafrið, eiga vit, eftir mínum tykki, at taka í álvara.
Talan er ikki bara um óskaðiligt órógv í gerandisdegnum, tí nógv og jøvn ljóðdálking
hevur beinleiðis ávirkan á heilsuna hjá fólki. Í oktober mánaði í fjør gav altjóða
heilsustovnurin, WHO, út umhvørvisleiðreglur fyri Evropa, har víst verður á, at óljóð
er ein vandi fyri bæði likamligu og sálarligu heilsuna. Eisini hava læknafakligir
myndugleikar í Føroyum gjørt vart við, at tað er neyðugt at taka ljóðdálking í álvara.
Ein máti at loysa trupulleikan er at tryggja skipunum atgongd til landsstreym. Í Noreg
veitir landið stuðul til kommunurnar fyri íløgur í landsstreym. Hetta er ein loysn, sum
kundi verið verd at hugt at. Umráðandi er, at felags reglur verða gjørdar fyri alt
landið, so trupulleikin ikki bara verður fluttur úr einari havn í aðra, men endaliga
loystur.
Á Løgtingi, 7. oktober 2019
Djóni Nolsøe Joensen

-- 1 of 1 --