52-014/2026

M E N T A M Á L A R Á Ð I Ð
J.H. Schrøters gøta 7 • FO-100 Tórshavn • Tel: +298 306500 • mmr@mmr.fo
Løgtingið 	27. august 2026
Tinghúsvegur 1-3 	Mál: 22/22133-185
100 Tórshavn 	Viðgjørt: KS
Svar
upp á
skrivligan fyrispurning nr. 52-014/2026 eftir § 52a í Tingskipanini frá Bjørg
Brynhildardóttir Egholm, løgtingskvinnu, settur Bárði á Lakjuni, landsstýrismanni í
mentamálum.
Evni: Atlimaskapur í Erasmus+.
Fyrispurningurin er soljóðandi:
1. Eru Føroyar klárar til atlimaskap í Erasmus+-skipanini í 2028?
2. Um ikki, hvørji ítøkilig átøk eru í gongd nú í miðfyrisitingini, og hvørji mangla at verða
gjørd?
3. Er fíggjarligt og starvsfólkaligt rúm fyri at fáa allar fyrireikingarnar gjørdar áðrenn
freistina?
4. Eru útbúgvingarstovnarnir undir Mentamálaráðnum klárir til at taka ímóti útlendskum
lesandi og starvsfólki, og til at senda føroysk lesandi og starvsfólk út gjøgnum Erasmus+-
skipanina?
5. Um ikki, hvat manglar so, og hvussu verður fíggjarligt og starvsfólkaligt rúm tryggjað
útbúgvingarstovnunum at koma á mál rættstundis?
Svar
Til 1 og 2: Síðan tíðliga í 2025 hava Føroyar og ES-kommisiónin havt regluligar fundir, sum
fyrireika báðar partar til atlimaskapin. Hesir fundirnir leggja grundarlag fyri teimum
samráðingarfundum, sum verða, tá ið nýggja Erasmus+-skráin er góðkend væntandi í seinnu helvt
av 2027. Føroyar er væl við í tilgongdini at verða klár, tá ið skráin verður sjósett í 2028.
Tjóðarskrivstovan er í 2025 sett á stovn við einum fulltrúa, og í næstum verður næsta starvsfólk
sett.
Til 3: Fulli kostnaðurin av einum Erasmus+-atlimaskapi kenna vit, tá ið formligu samráðingarnar
eru lidnar, væntandi ultimo 2027. Arbeitt verður miðvíst við at koma á mál, bæði fíggjarliga,
starvsfólkaliga og skipanarliga, og arbeiðið gongur eftir ætlan. So hvørt sum virksemið í
tjóðarskrivstovuni økist, og fleiri starvsøkir verða løgd afturat, verður tørvur á at økja um
starvsfólkahópin.
Til 4: Erasmus+ setur størri formlig krøv til universitet, enn aðrir lærustovnar. Fróðskaparsetur
Føroya er einasta universitet í Føroyum, og størsti hægri lærustovnur, og skal tí hava eina
Erasmus+ góðkenning frá ES-kommissiónini.

-- 1 of 3 --

M E N T A M Á L A R Á Ð I Ð
J.H. Schrøters gøta 7 • FO-100 Tórshavn • Tel: +298 306500 • mmr@mmr.fo
2 av 3
Á Fróðskaparsetri Føroya er sjøtul settur á fyrireikingarnar. Liður í fyrireikingararbeiðinum er, at
Setrið sum útbúgvingarstovnur verður góðkent sambært Erasmus Charter for Higher Education
(ECHE). At fáa eina ECHE-góðkenning í 2027 er fortreyt fyri, at Setrið kann luttaka í Erasmus+
frá 2028. Umsóknin um ECHE-góðkenningina skal latast inn við ársbyrjan 2027. Til
góðkenningina eru ávís krøv um, hvussu Setrið sum útbúgvingarstovnur skipar flytførið hjá lesandi
og starvsfólkum – bæði tey, sum fara aðrastaðni, og tey, sum koma á Setrið.
Fyrireikandi arbeiðið á Setrinum er skipað við støði í krøvunum um flytføri, sum Setrið skal lúka
fyri at fáa eina ECHE-góðkenning. Leiðsla, undirvísarar, granskarar og fyrisiting arbeiða við at
tryggja, at verandi mannagongdir á flytførisøkinum lúka krøvini í eini ECHE-góðkenning, og at
neyðugar nýggjar mannagongdir verða mentar.
Ein av fremstu raðfestingunum hjá Setrinum í fyrireikingunum er tí at taka støðu til, hvørji fak- og
útbúgvingarøki í fyrstu syftu skulu verða fevnd av flytførisavtalum, og eisini hvørjar
útbúgvingarstovnar Setrið skal samstarva við.
Ein strategisk raðfesting er at tryggja, at lesandi á Setrinum fáa møguleika at taka partar av síni
útbúgving í fakum, sum Setrið annars ikki hevur møguleika at bjóða út. Samstundis skulu lesandi
á útbúgvingarstovnum uttanlands kunna taka partar av útbúgvingini á Setrinum. Hetta kann eisini
geva føroyskum lesandi uttanlands møguleika at koma á Setrið í eitt tíðarskeið.
Harafturat er dentur lagdur á, at Altjóða skrivstovan á Setrinum verður nýskipað og ment. Altjóða
skrivstovan verður eitt miðpunkt á flytførisøkinum, og tí er neyðugt, at Altjóða skrivstovan hevur
neyðugu førleikarnar og karmarnar at skipa flytførisøkið.
Ein greið kós er sostatt sett út í kortið, soleiðis at Setrið verður til reiðar í 2028, at lesandi og
starvsfólk úr øðrum londum koma á Setrið, og somuleiðis at lesandi og starvsfólk á Setrinum fara
aðrastaðni í styttri og longri tíðarskeið sum liður í Erasmus+.
Tá umræður aðrar útbúgvingarstovnar, sum ikki er universitet, eru krøvini færri og einfaldari.
Tjóðarskrivstovan hevur í hesum sambandi áhaldandi samskifti við partarnar á frítíðar-, ítrótta-,
yrkis- og útbúgvingarøkinum í Føroyum.
Til 5: Fróðskaparsetur Føroya skal vera til reiðar at luttaka í Erasmus+ í 2028, og krevur hetta, at
Altjóða skrivstovan verður ment. Altjóða skrivstovan skal fyrisita og skipa alla tilgongdina, tá
lesandi koma og fara á skiftislestur, og somuleiðis tá starvsfólk koma og fara í skiftisstarv. Tí er
avgerandi, at ársverkini á Altjóða skrivstovuni verða samsvarandi arbeiðsbyrðuna, sum verður
løgd afturat.
At Altjóða skrivstovan verður nýskipað og starvsfólkahópurin styrktur, verður sostatt ein fortreyt
fyri, at Setrið kann skipa og fyrisita flytføri av starvsfólkum og lesandi í Erasmus+ høpi.
Sum nevnt omanfyri hevur tjóðarskrivstovan áhaldandi samskifti við partarnar á frítíðar-, ítrótta-
, yrkis- og útbúgvingarøkinum í Føroyum.

-- 2 of 3 --

M E N T A M Á L A R Á Ð I Ð
J.H. Schrøters gøta 7 • FO-100 Tórshavn • Tel: +298 306500 • mmr@mmr.fo
3 av 3
Vinarliga
Bárður á Lakjuni
landsstýrismaður

-- 3 of 3 --

Skrivligur fyrispurningur
eftir § 52a í Tingskipanini
Spyrjari: Bjørg Brynhildardóttir Egholm, løgtingskvinna
Svarari: Bárður á Lakjuni, landsstýrismaður í mentamálum
Evni: Atlimaskapur í Erasmus+
Spurningar:
1. Eru Føroyar klárar til atlimaskap í Erasmus+-skipanini í 2028?
2. Um ikki, hvørji ítøkilig átøk eru í gongd nú í miðfyrisitingini, og hvørji
mangla at verða gjørd?
3. Er fíggjarligt og starvsfólkaligt rúm fyri at fáa allar fyrireikingarnar gjørdar
áðrenn freistina?
4. Eru útbúgvingarstovnarnir undir Mentamálaráðnum klárir til at taka ímóti
útlendskum lesandi og starvsfólki, og til at senda føroysk lesandi og starvsfólk
út gjøgnum Erasmus+-skipanina?
5. Um ikki, hvat manglar so, og hvussu verður fíggjarligt og starvsfólkaligt rúm
tryggjað útbúgvingarstovnunum at koma á mál rættstundis?
Viðmerkingar:
Erasmus+ er ein týðandi partur av evropeiska samstarvinum um útbúgving, og gevur
lesandi, starvsfólki og útbúgvingarstovnum møguleika at taka lut í lestraruppihaldum,
starvsfólkaskifti og fakligum samstarvi tvørtur um landamørk.
Føroyar eru í dag ikki knýttar at Erasmus+ við atlimaskapi, og hava tí ikki somu
atgongd til skipanina sum londini, ið eru knýtt at henni. Føroyar hava tó boðað ES frá,
at vit vilja gerast partur av Erasmus+. Innleiðandi fundir hava verið, og í mong ár
hevur atlimaskapur í Erasmus+ verið umrøddur í politisku skipanini.
Atlimaskapurin hevur alstóran týdning, um Føroyar skulu mennast sum lestrarland.
Tað verður bæði lættari hjá føroyskum lesandi og starvsfólki at fáa altjóða royndir, og
hjá føroysku útbúgvingarstovnunum at taka ímóti lesandi og starvsfólki úr øðrum
londum. Hetta fer at styrkja útbúgvingarumhvørvið, altjóða samstarvið og møguleikan
hjá føroyskum útbúgvingum at kappast um lesandi og starvsfólk.
Núverandi Erasmus+-skeið er 2021–2027, og eitt nýtt skeið byrjar í 2028. Tí er
umráðandi, at Føroyar eru væl fyrireikaðar, og at neyðugu politisku, umsitingarligu og
fíggjarligu fortreytirnar eru fingnar upp á pláss í góðari tíð. Endamálið við
fyrispurninginum er tí at fáa greiðu á, hvussu langt fyrireikingarnar í miðfyrisitingini
eru komnar, um útbúgvingarstovnarnir eru klárir, og um neyðuga fíggjarliga og
starvsfólkaliga orkan er tøk, so Føroyar verða til reiðar at gerast partur av Erasmus+
frá 2028.

-- 1 of 2 --

Á Løgtingi, 19. august 2026
Bjørg Brynhildardóttir Egholm

-- 2 of 2 --