52-006/2026

F Í G G J A R M Á L A RÁ Ð I Ð
Ministry of Finance
Tinganes • Box 2039 • FO-110 Tórshavn
 (+298) 35 20 20 •  fmr@fmr.fo • www.fmr.fo
Løgtingið
Tinghúsvegur 1-3
Postboks 208
110 Tórshavn
Tórshavn, tann: 25. august 2026
J. nr.: 26/19962
Svar uppá fyrispurning nr. 52-006/2026 frá Astrið Breckmanna, løgtingskvinnu, settur
Akseli V. Johannesen, landsstýrismanni í fíggjarmálum, um at strika MVG av føroyskum
viku- og mánaðarbløðum.
Fyrispurningurin er soljóðandi:
1. Hvør er grundgevingin fyri, at føroysk viku- og mánaðarbløð ikki eru fevnd av undantakinum frá
meirvirðisgjaldi í § 12 í løgtingslógini um meirvirðisgjald, eins og tíðindabløð eru?
2. Ætlar landsstýrismaðurin at taka stig til at broyta løgtingslógina um meirvirðisgjald, soleiðis at
føroysk viku- og mánaðarbløð eisini verða undantikin meirvirðisgjaldi?
Svar til spurning nr. 1:
Meirvirðisgjaldsfríøkan fyri tíðindabløð er ein søgulig og politisk serskipan, sum stuðlar
tíðindaflutningi og fólkaræðisligum kjaki, meðan onnur føroysk viku- og mánaðarbløð ikki verða
mett at hava somu samfelagsligu endamál. Víst verður til serligu viðmerkingarnar til § 12, stk. 1,
litra h, Løgtingstíðindi 1991, blaðsíða 826.
Í Føroyum eru tíðindablød frítikin fyri meirvirðisgjald við frádrátti, um tey lúka lógarinnar krøv
fyri at vera eitt tíðindablað, undir hesum at tey koma út regluliga og viðgera aktuelt tíðindatilfar.
Verandi skipan er galdandi fyri pappír- og talgild tíðindabløð.
Løgfrøðiliga er munurin ikki, um eitthvørt er prentað sum eitt blað ella ein ávís, men um útgávan
líkur tey serligu eyðkennini fyri at vera eitt tíðindablað í meirvirðisgjaldshøpi.
Viku- og mánaðarbløð lúka vanliga ikki hesi krøv og rinda tí meirvirðsigjald.
Svar til spurning nr. 2:
Landsstýrisamaður ynskir at kanna, um tað ber til at javnstilla viku- og mánaðarbløð, tá tað
kemur til mvg frítøku.
Tinganes, 25. august 2026
Aksel V. Johannesen
Landsstýrismaður í fíggjarmálum

-- 1 of 1 --

Skrivligur fyrispurningur
eftir § 52a í Tingskipanini
Spyrjari: Astrið Breckmann, løgtingskvinna
Svarari: Aksel V. Johannesen, landsstýrismaður í fíggjarmálum
Evni: Strika MVG av føroyskum viku- og mánaðarbløðum
Spurningar:
1. Hvør er grundgevingin fyri, at føroysk viku- og mánaðarbløð ikki eru fevnd av
undantakinum frá meirvirðisgjaldi í § 12 í løgtingslógini um meirvirðisgjald,
eins og tíðindabløð eru?
2. Ætlar landsstýrismaðurin at taka stig til at broyta løgtingslógina um
meirvirðisgjald, soleiðis at føroysk viku- og mánaðarbløð eisini verða
undantikin meirvirðisgjaldi?
Viðmerkingar:
Sambært § 12, stk. 1, litra h í løgtingslógini um meirvirðisgjald er søla av
tíðindabløðum og prenting fyri tíðindabløð undantikin meirvirðisgjaldi. Hetta
undantakið fevnir tó ikki um føroysk viku- og mánaðarbløð, eisini nevnd magasin.
Nýliga var undirritaða á fundi við blaðið Kvinnu, har eigararnir greiddu frá, hvussu
henda skipanin leggur eina óneyðuga fíggjarliga byrðu á útgávuna. Blaðið Kvinna,
eins og onnur føroysk magasin, hevur stóran týdning fyri føroysku mentanina,
føroyska málið og okkara sjálvsfatan. Blaðið framleiðir føroyskt tilfar, skjalfestur
samtíðina og gevur rúm fyri søgum, kjaki og mentan á føroyskum. Tey geva okkum
eisini møguleika at spegla okkum í okkara egna samfelagi og skjalfesta samtíðina, vit
liva í, til komandi ættarlið at lesa og fáa innlit í.
Seinastu árini hava vit sæð ein álvarsaman blaðdeyða, og er hetta ein stórur missur
fyri Føroyar. Tí áttu vit at skapt so góðar karmar sum gjørligt, so føroysk viku- og
mánaðarbløð kunnu halda fram at koma út og mennast. Ein natúrligur liður í tí er at
geva teimum somu treytir viðvíkjandi meirvirðisgjaldi sum tíðindabløðunum.
Tað hevði ikki kostað landskassanum stórvegis at veitt føroyskum feløgum, sum geva
út viku- og mánaðarbløð, mvg-frítøku, tí nærum eingi føroysk viku- og mánaðarbløð
eru í Føroyum. Fleiri hava roynt at geva út hesi bløðini í eina tíð, men gevast ofta
aftur, tí upplagið í Føroyum er so lítið og mvg-byrðan lutfalsliga stór. Um fleiri viku-
og mánaðarbløð komu aftur til lívs, gjørdust vit mentanarliga ríkari.

-- 1 of 2 --

Á Løgtingi, 11. august 2026
Astrið Breckmann

-- 2 of 2 --