52-002/2026

HEILSU- OG ORKUMÁLARÁÐIÐ
Kopargøta 1 • FO-100 Tórshavn
Tel: +298 304050 • www.homr.fo • homr@homr.fo
Løgtingið 	14. august 2026
Tinghúsvegur 1-3, Postboks 208 	Mál: 26/19244-4
110 Tórshavn 	Tygara skriv:
Viðgjørt: .
Svar
upp á
Fyrispurning nr. 52-002/2026 eftir § 52a í tingskipanini, um sjúkraflutning í Vágum og
Føroyum sum heild, frá Jóhannis Joensen, løgtingsmanni
Spurningarnir vóru soljóðandi:
1. Hvussu ofta seinasta árið, hevur sjúkraflutningsdepilin, støð 30 í Miðvági, verið uttan
manning ella uttan tøka sjúkraflutningsvakt?
2. Hvørjar ítøkiligar avbjóðingar eru orsøkin til, at tað sambært upplýsingum kann koma
fyri, at støð 30 í Miðvági ikki er mannað?
3. Metir landstýriskvinnan, at tilbúgvingin í Vágum lýkur tey fakligu og kravdu trygdar
krøv, sum eiga at verða sett til øki við meira enn 3000 íbúgvum og altjóða flogvølli?
4. Hvørji ítøkilig átøk ætlar landstýriskvinnan at seta í verk fyri at tryggja eina støðuga og
nøktandi sjúkraflutningstænastu í Vágum?
5. Hvørjar ætlanir eru um at útbúgva og seta fleiri sjúkraflutningsfólk í teimum økjum, har
tørvur er, her undir Vágum?
Svar:
Til spurning 1
Sambært Sjúkrahúsverkinum hevur tað verið trupult at manna Sjúkraflutningsdepilin í Miðvági
(støð 30) seinasta árið. Avbjóðingarnar hava verið serliga stórar seinasta hálva árið.
Ein sjúkrabilur verður vanliga mannaður við tveimum starvsfólkum – einum autoriseraðum
sjúkraflutningsviðgera og einum sjúkraflutningshjálpara. Tað hava tíverri verið tíðarskeið
seinasta árið, har støðin í Vágum ikki hevur verið fullmannað ella ikki hevur verið mannað.
Sambært Sjúkrahúsverkinum hevur støðin í Vágum seinasta árið í umleið 16 samdøgur bert verið
mannað við einum starvsfólki (sjúkraflutningsviðgera). Harumframt hevur støðin verið ómannað
í umleið 30 samdøgur.

-- 1 of 3 --

HEILSU- OG ORKUMÁLARÁÐIÐ
Síða 2 av 3
Tað hevur týdning at nevna í hesum sambandi, at sjúkraflutningstænastan í Føroyum virkar sum
ein “flótandi” tilbúgving. Hetta merkir, at teir einstøku sjúkrabilarnir dekka breitt og ikki bert
innan tey øki, har teir eru staðsettir. Øll tænastan verður stýrd av Vaktsentralinum á
Landssjúkrahúsinum, sum til eina og hvørja tíð gagnnýtir tær tøku resursirnar á bestan hátt. Hetta
merkir millum annað, at tey tíðspunkt, sum sjúkrabilurin ikki er tøkur í Vágum, verður økið
dekkað av sjúkrabilum frá øðrum støðum, men ein manglandi sjúkrabilur í Vágum vil undir
vanligum umstøðum føra við sær eina longri responstíð1.
Til spurning 2
Í síni heild er størsta avbjóðingin trot á útbúnum sjúkraflutningsviðgerum til Sjúkraflutnings-
tænastuna. Tí er skipanin serliga viðbrekin tá sjúkrafrávera og uppsagnir eru.
Ein av orsøkunum til trotið eru herd krøv um útbúgving. Í 2021 vórðu reglurnar um autorisatión
av sjúkraflutningsviðgerum ásettar. Sambært § 70 c í autorisatiónslógini skal tann, sum hevur
staðið danska ella føroyska próvtøku sum sjúkraflutningsviðgeri, hava autorisatión sum
sjúkraflutningsviðgeri. Fyri sjúkraflutningsviðgerar, sum longu vóru útbúnir og arbeiddu á
økinum, varð gjørd ein skiftisskipan. Hesi kundu halda áfram við at arbeiða sum
sjúkraflutningsviðgerar í einum avmarkaðum tíðarskeiði, uttan autorisatión, meðan tey fingu
møguleika at arbeiða fram ímóti at lúka ásettu krøvini og søkja um autorisatión. Skiftisskipanin
var galdandi til 30. juni 2024. Frá 1. juli 2024 var kravið tí, at sjúkraflutningsviðgerar, sum áður
vóru fevndir av skiftisskipanini, skuldu hava autorisatión fyri at arbeiða sum
sjúkraflutningsviðgerar og nýta heitið “ambulancebehandler”.
Síðani 2024 hevur Sjúkraflutningstænastan sent sjúkraflutningsviðgerar, sum ikki luku krøvini
um autorisatión innan freistina, á merittútbúgving í Danmark, so at viðgerarnir kunnu virka sum
viðgerðar, og við somu autorisatión og fakligum førleikum, sum tey lond vit samanbera okkum
við. Tá hesi starvsfólk eru í Danmark í útbúgvingarørindum, verða samstundis færri at dekka
vaktirnar.
Sjúkraflutningsviðgerar í Føroyum verða í dag útbúnir á yrkisskúlanum í Danmark. Útbúgvingin
tekur 4 ár. Hon fevnir um praktikk og umleið 1,5 ára skúlagongd í Danmark. Tað tíðarskeiðið,
sum sjúkraflutningsviðgerarnir eru í skúla í Danmark, eru teir ikki tøkir í starvsfólkahópinum hjá
Sjúkraflutningstænastuni.
Samstundis byggir sáttmálin á økinum á eitt gamalt prinsipp, har tað verður lagt upp til, at
starvsfólkini sum skulu dekka vaktirnar búgva í nærumhvørvinum. Hetta ger tað trupult at fáa
starvsfólk, sum ikki búgva í økinum, at taka vaktir í Vágum.
1 Responstíð skal skiljast sum tíðin frá tí, at neyðkall verður móttikið, til heilsufakliga hjálpin er á staðnum.

-- 2 of 3 --

HEILSU- OG ORKUMÁLARÁÐIÐ
Síða 3 av 3
Samanumtikið metir Sjúkrahúsverkið, at størstu ítøkiligu avbjóðingarnar á økinum í løtuni eru
trot á sjúkraflutningsviðgerum og at verandi sáttmálin, sum sjúkraflutningsviðgerarnir virka
undir, ikki er dagførdur og tí ikki tekur atlit til at infrakervið er broytt.
Til spurning 3, 4 og 5
Tað er sjálvandi ikki nøktandi, at tað í ávísum tíðarskeiðum, ikki hevur verið møguligt at mannað
støðina í Vágum.
Tað verður áhaldandi arbeitt við at útbúgva fleiri sjúkraflutningsviðgerar, og sambært
sjúkrahúsleiðsluni kunnu tað væntast batar komandi mánaðirnar til hálva árið. Eisini kann
nevnast, at í 2026 byrja tríggir lærlingar á yrkisskúla í Danmark, fyri at útbúgva seg til
sjúkraflutningsviðgerar. Teir fyrstu tveir byrjaðu 1. august, og ein byrjar í november.
Leiðslan í Sjúkraflutningstænastuni ger eisini eitt stórt arbeiði fyri at manna vaktirnar, men tað er
trupult við verandi manning og sáttmála.
Sjúkrahúsverkið vísir á, at tørvur er á at leggja eina langtíðarætlan fyri útbúgvingarkapasitetin
innan sjúkraflutningsviðgerar og fyri fíggingina av hesi útbúgving, um vit í Føroyum skulu hava
eina støðuga og haldgóða sjúkraflutningstænastu við høgari fakligari dygd, á støði við
tænasturnar í okkara grannalondum. Hesum sjónarmiði tekur landsstýriskvinnan undir við, og er
hetta eisini í samsvari við strategiina hjá Sjúkrahúsverkinum fyri 2026-2030, sum eg júst havi
góðkent. Har framgongur millum annað, at tað skulu gerast heildarætlanir fyri førleikamenning
og útbúgving hjá starvsfólkunum og har tað í hesum sambandi verður átrokandi at fáa hetta gjørt
fyri Sjúkraflutningstænastuna.
Heilsu- og orkumálaráðið, 14. august 2026
Eyðdis Hartmann Niclasen
landsstýriskvinna

-- 3 of 3 --

Skrivligur fyrispurningur
eftir § 52a í Tingskipanini
Spyrjari: Jóhannis Joensen, løgtingsmaður
Svarari: Eyðdis Hartman Niclasen, landsstýriskvinna í heilsumálum
Evni: Sjúkraflutningur í Vágum og Føroyum sum heild
Spurningar:
1. Hvussu ofta seinasta árið, hevur sjúkraflutningsdepilin, støð 30 í Miðvági ,
verið uttan manning ella uttan tøka sjúkraflutningsvakt?
2. Hvørjar ítøkiligar avbjóðingar eru orsøkin til, at tað sambært upplýsingum
kann koma fyri, at støð 30 í Miðvági ikki er mannað?
3. Metir landstýriskvinnan, at tilbúgvingin í Vágum lýkur tey fakligu og kravdu
trygdar krøv, sum eiga at verða sett til øki við meira enn 3000 íbúgvum og
altjóða flogvølli?
4. Hvørji ítøkilig átøk ætlar landstýriskvinnan at seta í verk fyri at tryggja eina
støðuga og nøktandi sjúkraflutningstænastu í Vágum?
5. Hvørjar ætlanir eru um at útbúgva og seta fleiri sjúkraflutningsfólk í teimum
økjum, har tørvur er, her undir Vágum?
Viðmerkingar:
Sjúkraflutningur er ein grundleggjandi partur av føroysku tilbúgvingini og
heilsuverkinum. Tað eigur at vera ein sjálvfylgja, at borgarar kring alt landið hava
skjóta atgongd til eina trygga og væl mannaða sjúkraflutningstænastu. Fólkini, sum
arbeiða innan hetta økið, gera eitt sera gott og týdningarmikið arbeiði, ið setur stór
krøv. Ein stórur vandi liggur í at miðsavna virksemið!
Sambært upplýsingum, sum spyrjarin hevur fingið, kemur tað fyri, at
sjúkraflutningsdepilin, støð 30 í Miðvági stendur ómannaður, og eingin
sjúkraflutningsvakt er tøk í Vágum. Um hetta er rætt, kann tað hava álvarsligar
avleiðingar fyri tilbúgvingina í einum øki við fleiri enn 3000 íbúgvum og við Vága
Floghavn, har fleiri túsund ferðafólk ferðast hvønn dag.
Tað er týdningarmikið at fáa greiðu á, hvussu ofta hetta kemur fyri, hvørjar orsøkirnar
eru, og hvussu landstýriskvinnan ætlar at tryggja eina støðuga og nøktandi
sjúkraflutningstænastu í Vágum og Føroyum sum heild.
Á Løgtingi, 3. august 2026
Jóhannis Joensen

-- 1 of 1 --