52-131/2025

LØG MA N S S KR I VS TOV AN
Prime Minister´s Office
Tinganes • Box 64 • FO-110 Tórshavn
 (+298) 30 60 00 •  lms@lms.fo • www.lms.fo
Løgtingið Tórshavn, tann: 30. juni 2026
J. nr.: 26/15957-8
Viðgjørt: GMN
Svar uppá
skrivligan fyrispurning nr. 52-131/2025 eftir tingskipanini § 52a til Beinir Johannesen,
løgmann, frá Fía Selma Nielsen, løgtingsfólk, um herd revsing fyri brotsverk ímóti børnum
Fyrispurningurin var soljóðandi:
1. Hevur landsstýrið nakrar ætlanir um herða revsingina fyri lógarbrot, sum snúgva seg um
at gera seg inn á børn?
2. Metir løgmaður, at tað ber til at meta lógarbrot ímóti børnum í einum lítlum samfelagi
sum størri brot, sum skulu revsast harðari, enn í størri samfeløgum?
3. Um so er, at løgmaður ætlar at arbeiða fram ímóti at herða revsingina, hvat er so
hugsanin at gera?
Svar:
Til spurning 1
Eg havi sett mær fyri, at hyggjast skal nærri eftir revsilóggávuni fyri at meta um, hvørt
broytingar skulu gerast og um heimildirnar eru nøktandi.
Í fyrstu syftu er ætlanin at hyggja nærri eftir revsingini fyri rúsevnisbrotsverk, tí samgongan
hevur avgjørt, at tað er neyðugt at seta munagóð átøk í verk fyri at fyribyrgja og tálma
nýtsluni av rúsevnum. Partur av hesum er eisini at kanna, um heimildirnar í revsilógini eru
nøktandi, soleiðis at vit hava so góð amboð sum gjørligt at basa trupulleikum, ið standast av
rúsevnum.
Síðan er ætlanin at kanna, um revsilóggávan er nøktandi og tíðarhóskandi í mun til onnur sløg av
brotsverkum, serliga kynslig brotsverk. Ætlanin er somuleiðis at hyggja at broytingum, sum
grannalondini hava framt, eitt nú viðvíkjandi vitlíkistilfari o.ø.
Til spurning 2
Børn eru sakleys og verjuleys, og brotsverk móti børnum eru tí altíð álvarslig, óansæð um
samfelagið er stórt ella lítið.

-- 1 of 2 --

LØG MA NS KR IV S T OV AN
Prime Minister´s Office
2/2
Til spurning 3
Ásetingarnar um kynslig brotsverk vóru seinast dagførdar í desember 2023. Tá
gjørdust kynslig avnoyðsla og lokking revsiverd.
Revsingin fyri ítøkilig brotsverk hanga neyvt saman við, hvussu álvarsligt brotið verður mett at
vera. Fyri tey mest álvarsligu brotini mótvegis børnum undir 12 ár, børnum millum 12 og 15 ár
og ung millum 15 og 18 ár, er revsikarmurin fongsul í upp til 12 ár. Hesin revsikarmur er millum
tær strangastu revsingarnar í revsilógini.
Um talan er um sera álvarslig kynslig brotsverk og hesi brotsverk verða endurtikin, er heimild
fyri at døma ein persón í trygdarvarðhald (forvaring).
Revsikarmurin fyri at breiða út pornografiskar myndir og filmar ella aðrar
pornografiskar, visuellar endurgevingar ella tílíkt av persónum undir 18 ár, er undir skerpandi
umstøðum upp í 6 ár. Brotsverkið, sum verður framt móti barninum, verður tó revsað eftir øðrum
ásetingum, og hevur ein revsikarm uppá fongsul í upp til 12 ár.
Tá ið ásetingarnar í revsilógini um kynslig brotskverk verða endurskoðaðar, verður tað gjørt í
samstarvi við viðkomandi partar, eitt nú løgregluna, fyri at tryggja, at málið verður lýst so væl
sum til ber, so at vit fáa eina tíðarhóskandi revsilóg, ið tekur hædd fyri vitlíki o.ø., tá talan er um
kynslig brotsverk.
Tinganes, 30. juni 2026
Beinir Johannesen
Løgmaður

-- 2 of 2 --

Skrivligur fyrispurningur
eftir § 52a í Tingskipanini
Spyrjari: Fía Selma Nielsen, løgtingskvinna
Svarari: Beinir Johannesen, løgmaður
Evni: Herd revsing fyri brotsverk ímóti børnum
Spurningar:
1. Hevur landsstýrið nakrar ætlanir um herða revsingina fyri lógarbrot, sum
snúgva seg um at gera seg inn á børn?
2. Metir løgmaður, at tað ber til at meta lógarbrot ímóti børnum í einum lítlum
samfelagi sum størri brot, sum skulu revsast harðari, enn í størri samfeløgum?
3. Um so er, at løgmaður ætlar at arbeiða fram ímóti at herða revsingina, hvat er
so hugsanin at gera?
Viðmerkingar:
Revsiramman í málum, sum snúgva seg um at gera seg inná børn, so sum barnaporno,
neyðtøku, grooming, samlegu við barn undir 15 ár, blúnisbrot, avnoyðslu/hóttanum
(sextortion), myndatøku uttan loyvi og siðamisbrotum, kann ikki sigast at vera serliga
høg.
Fyrningarfreistir verða ásettar í mun til revsirammu, og av tí, at revsiramman fyri t.d.
barnaporno er so lin, fyrnast hesi málini skjótari enn onkur onnur lógarbrot.
Tá tað hinvegin snýr seg um lógarbrot í sambandi við rúsevni, verða dómarnir í
Føroyum herdir munandi í mun til dómar í samsvarandi málum í Danmark, tí mett
verður, at rúsandi evni hava størri og skaðiligari ávirkan á eitt lítið samfelag.
Tá fólk gera seg inn á børn í Føroyum, er ofrið enn meira útsett, tí samfelagið er so
lítið, og vitanin um eitt offur hongur ofta við í samfelagnum restina av lívinum.
Á Løgtingi, 18. juni 2026
Fía Selma Nielsen

-- 1 of 1 --