52-130/2025

UTTANRÍKIS- OG FISKIMÁLARÁÐIÐ
Ministry of Foreign Affairs and Fisheries
Tinganes – FO-100 Tórshavn – Faroe Islands – Tel. +298 358700 – ufmr@ufmr.fo – www.ufmr.fo
Løgtingið
Tinghúsvegur 1-3
Postboks 208
110 Tórshavn
29. juni 2026
Mál: 26/15844-2
(at tilskila í svari)
Tygara skriv: 52-130/2025
Svar til § 52 a fyrispurning nr. 52-130/2025 frá Steffan Klein Poulsen,
løgtingsmanni, settur Bárði á Steig Nielsen, landsstýrismanni í uttanríkis- og
fiskivinnumálum, um føroyska neyðhjálp og menningarsamstarv
Spurningur:
Vil landsstýrismaðurin virka fyri at brúka føroyskar hjálparfelagsskapir og felagsskapir,
sum føroyingar virka í, til at veita neyðhjálp og menningarsamstarv kring heimin?
Svar:
Landsstýrið letur stuðul til altjóða menningarsamstarv og neyðhjálp sambært løgtingslóg
nr. 44 frá 2007 um altjóða menningarsamstarv og kunngerð nr. 72 frá 2008 um altjóða
menningarsamstarv. Ásett er, at lógin millum annað skal leggja lunnar undir føroyskari
luttøku í altjóða samfelagnum, og at føroysk vitan og føroyskur serkunnleiki, tá ið til ber,
eiga at verða gagnnýtt og ment í samband við verkætlanir, ið fáa stuðul.
Vanlig mannagongd er, at stuðulsumsóknir frá føroyskum felagsskapum við altjóða
virksemi og felagsskapum við føroyskum starvsfólki ella sjálvbodnum, ið virka á
staðnum, har humanitera virksemið verður útint, verða raðfestar, tá ið treytirnar annars
fyri at fáa stuðul sambært leiðreglunum eru loknar. Ætlanin er at halda fram við stuðli til
altjóða humanitert arbeiði eftir sama leisti. Serliga ætli eg at leggja dent á, at føroysk
vitan og føroysk luttøka meira miðvíst verða raðfest í altjóða menningarsamstarvi.
Bárður á Steig Nielsen
landsstýrismaður

-- 1 of 1 --

Skrivligur fyrispurningur
eftir § 52 a í Tingskipanini
Spyrjari: Steffan Klein Poulsen, løgtingsmaður
Svarari: Bárður á Steig Nielsen, landsstýrismaður í uttanríkis- og fiskivinnumálum
Evni: Føroysk neyðhjálp og menningarsamstarv
Spurningar:
1. Vil landsstýrismaðurin virka fyri at brúka føroyskar hjálparfelagsskapir og
felagsskapir, sum føroyingar virka í, til at veita neyðhjálp og
menningarsamstarv kring heimin?
Viðmerkingar:
Summi landsstýri hava raðfest at brúka føroyingar, tá ið neyðhjálp og
menningarsamstarv skal veitast úr Føroyum, meðan onnur landsstýri hava raðfest at
brúka stórar altjóða felagsskapir ella deildir hjá eitt nú ST og ES, sum føroyingar
lítlan og ongan leiklut eiga í.
Við at brúka føroyskar hjálparfelagsskapir og felagsskapir, har nógvir føroyingar eru
virknir í ella hava tætt tilknýti til, so er landsstýrið aktivt við til at menna “føroyska
neyðhjálp” og at senda “føroyskar ambassadørar” kring allan heimin at umboða
okkara tjóð.
Á Løgtingi, 17. juni 2026
Steffan Klein Poulsen

-- 1 of 1 --