52-129/2025

HEILSU- OG ORKUMÁLARÁÐIÐ
Kopargøta 1 • FO-100 Tórshavn
Tel: +298 304050 • www.homr.fo • homr@homr.fo
Løgtingið 1. juli 2026
Tinghúsvegur 1-3, Postboks 208 Mál: 26/15909
110 Tórshavn Tygara skriv:
Viðgjørt:
Svar til skrivligan fyrispurning nr. 52-129/2025 eftir § 52 a í tingskipanini frá Steffan Klein
Poulsen, løgtingsmanni, til Eyðdis Hartmann Niclasen, landsstýriskvinnu, um
burturbeining av elbilum
Fyrispurningurin er soljóðandi:
1. Er ein loysn funnin fyri, hvussu elbilar skulu burturbeinast í Føroyum?
2. Hvussu nógvir elbilar eru burturbeindir, frá tí at teir komu til Føroyar og til í dag?
3. Hvør er kostnaðurin av at burturbeina ein elbil, og hvør ber kostnaðin av hesum?
4. Kunnu burturbeiningarstøðirnar seta krøv til, hvussu elbilar skulu latast inn til
burturbeining, t.d. at bilur og battarí eru skild sundur, áðrenn elbilurin verður latin inn?
Svar:
Til spurning 1
Tá ið battaríið er tikið úr, kann bilurin burturbeinast og handfarast á sama hátt, sum ein bensin-
ella dieselbilur.
Av trygdarávum eigur battaríið at verða tikið úr á verkstaðnum, sum hevur neyðugu útgerðina og
serkunnleikan til arbeiðið.
Trygdarkrøv galda fyri, hvussu battarí frá elbilum skulu handfarast og sendast til serkøna viðgerð
uttanlands.
Enn er ikki funnin ein loysn fyri, hvussu ábyrgdin og harvið kostnaðurin av burturbeiningini av
elbilum skulu býtast, men Heilsu- og orkumálaráðið arbeiðir við spurninginum. Sí meira um
kostnaðin í svari til spurning 3.
Til spurning 2
Sambært Kommunalu Brennistøðini eru higartil færri enn 10 elbilar latnir inn til burturbeining.
Kommunala Brennistøðin hevur fýra battarí og fýra elbilar í varðveitslu, til greiða er fingin á,
hvør skal bera kostnaðin. Tvey battarí frá bilasølum eru send av landinum til viðgerðar.
Til spurning 3
Bilurin sjálvur verður handfarin á sama hátt sum ein bensin- ella dieselbilur, tá ið battaríið er
tikið úr. Hetta verður fíggjað við teimum 1.000 kr., sum Kommunala Brennistøðin fær sum sín
part av tí lógarkravda burturbeiningargjaldinum.

-- 1 of 2 --

HEILSU- OG ORKUMÁLARÁÐIÐ
Síða 2 av 2
Kostnaðurin av at handfara battarí veldst m.a. um slag, vekt og um battaríið er skatt. Sambært
prísmetingum, sum Kommunala Brennistøðin hevur fingið frá Stena Recycling í mars 2026, er
kostnaðurin fyri eitt battarí, sum vigar umleið 700 kg, umleið 20.400 kr., um battaríið ikki er
skatt. Metingin fevnir um viðgerð og flutning.
Er battaríið skatt, er kostnaðurin mettur til umleið 71.200 kr. Metingin fevnir um viðgerð,
handfaring, serligan kassa, avheinting og flutning. Flutningskostnaðurin kann verða hægri, um
serlig flutningskrøv verða sett.
Á fundi 17. september 2025 millum Umhvørvismálaráðið og Bilasølufelagið varð upplýst, at
arbeiðið at taka battarí úr elbilum er ymiskt frá bili til bil. Tá varð heilt leyst mett, at kostnaðurin
møguliga lá millum 5.000 og 10.000 kr. Bilasølufelagið hevur síðani upplýst, at felagið ikki kann
áseta eina felags kostnaðarmeting, tí kostnaðurin má avtalast við einstøku verkstøðini.
Fyri battarí eru ábyrgdar- og kostnaðarbýti ikki ásett. Núverandi skipan røkkur ikki til hesar
útreiðslur, men kommunustýrið kann tó sambært § 16 í kunngerð um burturkast, eftir
góðkenning frá landsstýrisfólkinum, áseta gjald fyri goymslu, handfaring og viðgerð av
burturkasti.
Heilsu- og orkumálaráðið arbeiðir við spurninginum um, hvussu ein fíggjarliga haldfør skipan
fyri at fíggja eyka kostnaðin av handfaring og viðgerð av battaríum frá elbilum kann skipast, so
at kostnaðurin ikki einsamallur skal hvíla á Tórshavnar kommunu, sum gjøgnum Kommunalu
Brennistøðina tekur ímóti bilum úr øllum landinum, og so at bileigarin ikki kemur at standa við
eini ovurstórari rokning, tá ið elbilurin skal burturbeinast.
Til spurning 4
Tað er kommunustýrið, sum sambært §§ 14 og 15 í kunngerð um burturkast kann seta krøv um,
hvussu burturkast skal skiljast, goymast og handfarast.
Kommunustýrið kann tí áseta, at battaríið skal verða tikið úr bilinum, at bilur og battarí skulu
latast inn hvør sær, og at battaríið skal verða latið móttøkustøðini sambært galdandi
trygdarkrøvum.
Eyðdis Hartmann Niclasen
landsstýriskvinna

-- 2 of 2 --

Skrivligur fyrispurningur
eftir § 52a í Tingskipanini
Spyrjari: Steffan Klein Poulsen, løgtingsmaður
Svarari: Eyðdis Hartman Niclasen, landsstýriskvinna í heilsu- og orkumálum
Evni: Burturbeining av elbilum
Spurningar:
1. Er ein loysn funnin fyri, hvussu elbilar skulu burturbeinast í Føroyum?
2. Hvussu nógvir elbilar eru burturbeindir, frá tí at teir komu til Føroyar og til í
dag?
3. Hvør er kostnaðurin av at burturbeina ein elbil, og hvør ber kostnaðin av
hesum?
4. Kunnu burturbeiningarstøðirnar seta krøv til, hvussu elbilar skulu latast inn til
burturbeining, t.d at bilur og battarí eru skild sundur, áðrenn elbilurin verður
latin inn?
Viðmerkingar:
Tað koma alsamt fleiri elbilar á vegirnar í Føroyum. Sambært tølum hjá Akstovuni frá
1. juni 2026 vóru 3.119 elbilar skrásettir av tilsamans 28.411 persónbilum, sum er
umleið 11% av persónbilunum í Føroyum.
Elbilarnir skulu eins og aðrir bilar fyrr ella seinni burturbeinast og/ella endurnýtast.
Nakrir fáir elbilar eru farnir í skrell, tí teir eru blivnir vrak, men teir fyrstu árgangirnir
av elbilum hava koyrt somikið leingi, at hugsast kann, at talið av elbilum, sum skulu
burtbeinast, fer at økjast munandi komandi árini.
Tað tykist ikki vera funnin ein loysn fyri, hvussu burturbeiningin skal fara fram á ein
skynsaman hátt. Her verður serliga hugsað um fíggjarliga partin. Tað ljóðar, at tað
kostar meira at burturbeina ein elbil samanborið við aðrar bilar orsakað av stóra
battarínum, sum situr í bilinum, og fyri bileigaran kann tað gerast kostnaðarmikið, um
kravt verður, at bilur og battarí skulu skiljast sundur, áðrenn bilurin verður
burturbeindur.
Á Løgtingi, 18. juni 2026
Steffan Klein Poulsen

-- 1 of 1 --