52-127/2025

F Í G G J A R M Á L A RÁ Ð I Ð
Ministry of Finance
Tinganes • Box 2039 • FO-110 Tórshavn
 (+298) 35 20 20 •  fmr@fmr.fo • www.fmr.fo
Løgtingið
Tinghúsvegur 1-3
Postboks 208
110 Tórshavn
Tórshavn, tann: 1. juli 2026
J.nr.: 26/16159
Svar til skrivligan fyrispurning nr. 52-127/2025 frá Steffani Klein Poulsen, løgtingsmanni,
settur landsstýrismanninum í fíggjarmálum, Akseli V. Johannesen, um undantøk í
meirvirðisgjaldslógini.
Fyrispurningurin er soljóðandi:
1. Hvussu nógvar mistar inntøkur metir Fíggjarmálaráðið, at landskassin hevur av teimum
undantøkum, sum verða givin í meirvirðisgjaldslógini, har í summum førum sloppið verður
undan at rinda mvg og í øðrum førum, at mvg verður afturborið?
2. Hvat er yvirskipaða frágreiðingin fyri at geva hesi undantøk í meirvirðisgjaldslógini?
3. Hvør er umsitingarligi kostnaðurin hjá tí almenna av at umsita undantøkini í mvg-lógini, og
hvør er metta umsitingarliga byrðan hjá vinnuni av hesum?
4. Hvat heldur landsstýrismaðurin um at brúka ta meirinntøku umframt møguligar
umsitingarligar sparingar, sum kundu fingist við at strika undantøkini í
meirvirðisgjaldslógini, til at lækka mvg-satsin yvir ein kamb í § 14 í meirvirðisgjaldslógini?
Svar til spurningarnir nr. 1 til 4:
Eingin samlað og dagførd meting er tøk av samlaða kostnaðinum, sum landskassin hevur av
undantøkunum í meirvirðisgjaldslógini, frítøkum fyri mvg og skipanum við afturbering av mvg
eftir umsókn.
Leggjast kann aftrat, at 16 ymisk undantøk eru frá skylduni at vera mvg-skrásettur í
meirvirðisgjaldslógini, § 2, stk. 3, umframt at 22 ymisk undantøk eru frá avgjaldsskyldugari sølu
sbrt. § 12, stk. 3, í meirvirðisgjaldslógini. Haraftrat eru skipanir við afturbering av mvg eftir
umsókn í § 3 a, § 3 b, § 3 c og § 3 d í meirvirðisgjaldslógini.
Fleiri av undantøkunum eru varandi undantøk, , sum hava verið í meirvirðisgjaldslógini frá byrjan
av, meðan okkurt er tíðaravmarkað. Nakrar av skipanunum við afturbering av mvg eftir umsókn
verða sbrt. meirvirðisgjaldslógini minkaðar stigvíst næstu árini.
Tað hevði kravt drúgt og umfatandi greiningararbeiði at mett um samlaða kostnaðin fyri
landskassan av øllum undantøkum, sum í dag eru í meirvirðisgjaldslógini, bæði av frítøkum og av
skipanunum við afturbering av mvg eftir umsókn. Víst verður eisini til fyrispurning nr. 52-
092/2025 um kostnaðin av grønum stuðulsskipanum.
Ymiskar frágreiðingar og grundgevingar hava verið nýttar í sambandi við undantøkini og
skipanirnar við afturbering, sum eru í meirvirðisgjaldslógini í dag. Til ber ikki at geva eina

-- 1 of 2 --

F Í G G J A R M Á L A RÁ Ð I Ð
Ministry of Finance
2/2
einsljóðandi ella einstaka frágreiðing ella grundgeving fyri øll undantøkini og skipanirnar við
afturbering av mvg eftir umsókn. Í summum førum hevur talan verið um vørur ella tænastur, sum
politisk ynski hava verið um at stuðla við undantaki ella frítøku fyri mvg. Í øðrum førum hava
umsitingarlig atlit og umsitingarlig viðurskifti gjørt, at ávís undantøk og frítøkur hava verið neyðug
í meirvirðisgjaldslógini.
Eingin samlað og dagførd meting er gjørd av umsitingarliga kostnaðinum ella byrðuni fyri tað
almenna ella fyri vinnuna av at umsita tey undantøk, sum eru í meirvirðisgjaldslógini í dag.
Umráðandi er at gera sær greitt, at tað hevði verið ein umfatandi og grundleggjandi broyting av
verandi skipan við meirvirðisgjaldi at strikað øll tey undantøk, sum eru í meirvirðisgjaldslógini í
dag, og síðani lækkað generella meirvirðisgjaldið, sum í dag er 25%. Hetta hevði kravt drúgt og
umfatandi greiningararbeiði og hevði eisini verið ein grundleggjandi broyting fyri fleiri vinnugreinar
í Føroyum. Hevði eitt tílíkt greiningararbeiði víst, at ein tílík broyting kann gerast við fyrimunum
fyri borgarar og vinnulívið í Føroyum, haldi eg at hesin møguleikin átti at verið umrøddur og
viðgjørdur nærri.
Tinganes, 1. juli 2026
Aksel V. Johannesen
Landsstýrismaður í fíggjarmálum

-- 2 of 2 --

Skrivligur fyrispurningur
eftir § 52a í Tingskipanini
Spyrjari: Steffan Klein Poulsen, løgtingsmaður
Svarari: Aksel V. Johannesen, landsstýrismaður í fíggjarmálum
Evni: Undantøk í meirvirðisgjaldslógini
Spurningar:
1. Hvussu nógvar mistar inntøkur metir Fíggjarmálaráðið, at landskassin hevur
av teimum undantøkum, sum verða givin í meirvirðisgjaldslógini, har í
summum førum sloppið verður undan at rinda mvg og í øðrum førum, at mvg
verður afturborið?
2. Hvat er yvirskipaða frágreiðingin fyri at geva hesi undantøk í
meirvirðisgjaldslógini?
3. Hvør er umsitingarligi kostnaðurin hjá tí almenna av at umsita undantøkini í
mvg-lógini, og hvør er metta umsitingarliga byrðan hjá vinnuni av hesum?
4. Hvat heldur landsstýrismaðurin um at brúka ta meirinntøku umframt
møguligar umsitingarligar sparingar, sum kundu fingist við at strika
undantøkini í meirvirðisgjaldslógini, til at lækka mvg-satsin yvir ein kamb í §
14 í meirvirðisgjaldslógini?
Viðmerkingar:
Tað eru uttan iva góðir tankar, sum liggja aftanfyri øll tey givnu undantøkini, har
borgarin antin sleppur undan at rinda mvg ella fær tað partvíst afturgoldið fyri ávísar
vørur og tænastur. Undantøkini eru tó blivin rættiliga nógv í tali eftirhondini.
Lóggávan verður fløktari fyri hvørt undantak, sum verður givið, og krevur hetta meiri
umsiting.
Yvirskipaði tankin við hesum fyrispurningi er at fáa lýst, um tað ikki gevur betri
meining at lækka mvg-satsin yvir ein kamb heldur enn at geva so mong undantøk til
ávísar vørubólkar, ávísar tænastur og til ávís endamál. Hetta vildi givið øllum
føroyingum ein lætta, óansæð hvat teir keypa, umframt at tað almenna og privata
vinnan spara í umsiting.
Á Løgtingi, 17. juni 2026
Steffan Klein Poulsen

-- 1 of 1 --