52-126/2025

F Í G G J A R M Á L A RÁ Ð I Ð
Ministry of Finance
Tinganes • Box 2039 • FO-110 Tórshavn
 (+298) 35 20 20 •  fmr@fmr.fo • www.fmr.fo
Løgtingið
Tinghúsvegur 1-3
Postboks 208
110 Tórshavn
Tórshavn, tann: 1. juli 2026
J.nr.:: 26/15776
Svar til skrivligan fyrispurning nr. 52-126/2025 frá Steffani Klein Poulsen, løgtingsmanni,
settur landsstýrismanninum í fíggjarmálum, Akseli V. Johannesen, um vitlíki og
effektivisering.
Fyrispurningurin er soljóðandi:
1. Í hvønn mun verður vitlíki brúkt til at loysa uppgávur hjá tí almenna í dag?
2. Hvussu ætlar landsstýrismaðurin at virka fyri, at vitlíki verður brúkt hjá tí almenna
komandi fimm árini?
3. Hvussu fer landsstýrismaðurin at virka fyri, at vit ikki brúka óneyðuga starvsfólkaorku
hjá tí almenna uppá uppgávur, sum vitlíki kann loysa?
Svar til spurning nr. 1:
Eingin nágreinilig kanning er gjørd av vitlíkis-nýtsluni hjá øllum almenna geiranum. Tó eru
gjørdar smærri kanningar, har spurt hevur verið um nýtsluna. KT Landsins hevur spurt sínar
brúkarar, og kanningar hava eisini verið gjørdar í sambandi við vitlíkis-heildarætlanina, sum í
løtuni verður orðað. Hesar vísa, at nógv starvsfólk brúka vitlíki í gerandisdegnum sum eitt
stuðuls- og hjálparamboð, til dømis ChatGPT og Copilot, til ávísar uppgávur, men fáir
almennir stovnar hava ment vitlíkisamboð til stovnin sjálvan og til ávís endamál.
Svar til spurning nr. 2:
Á sumri í fjør varð vitlíki lagt út sum málsøki til landsstýrisfókið í fíggjarmálum.
Landsstýrismaðurin legði síðani hesa uppgávuna til Gjaldstovuna at fremja. Fyrsta uppgávan í
hesum sambandi er at orða eina heildarætlan fyri vitlíki. Henda heildarætlan verður handað
landsstýrismanninum í heyst. Heildarætlanin hevur sum visión, at Føroyar skulu vera eitt
undangonguland, ið vísir, hvussu ein smátjóð við ábyrgd gagnnýtir vitlíki til at styrkja fólkið,
málið og búskapin.
Eitt av málunum sum verður arbeitt við í heildarætlanini er, at tað almenna skal kunna frígeva
munandi starvsfólkaorku næstu árini. Ítøkiliga málið, og hvussu hetta verður rokkið, verður
nærri lýst, tá ið heildarætlanin verður liðug.
Svar til spurning nr. 3:
Hetta verður lýst nærri í heildarætlanini, sum verður liðug í heyst. Ætlanin er at fremja átøkini,
sum verða nevnd í heildarætlanini. Eitt av átøkunum er royndarverkætlanir innan tað almenna,

-- 1 of 2 --

F Í G G J A R M Á L A RÁ Ð I Ð
Ministry of Finance
2/2
sum hava til endamáls at fáa vitan, royndir og læring av, hvussu tað almenna kann gagnnýta
vitlíki á skynsamasta hátt.
Tinganes, 1. juli 2026
Aksel V. Johannesen
Landsstýrismaður í fíggjarmálum

-- 2 of 2 --

Skrivligur fyrispurningur
eftir § 52a í Tingskipanini
Spyrjari: Steffan Klein Poulsen, løgtingsmaður
Svarari: Aksel V. Johannesen, landsstýrismaður í fíggjarmálum
Evni: Vitlíki og effektivisering
Spurningar:
1. Í hvønn mun verður vitlíki brúkt til at loysa uppgávur hjá tí almenna í dag?
2. Hvussu ætlar landsstýrismaðurin at virka fyri, at vitlíki verður brúkt hjá tí
almenna komandi fimm árini?
3. Hvussu fer landsstýrismaðurin at virka fyri, at vit ikki brúka óneyðuga
starvsfólkaorku hjá tí almenna uppá uppgávur, sum vitlíki kann loysa?
Viðmerkingar:
Vitlíki er longu ein partur av gerandisdegnum hjá nógvum føroyingum bæði privat og
til arbeiðis. Vitlíki er tó framvegis í rúkandi menning og kann við tíðini loysa fleiri og
fleiri uppgávur.
Vitlíki er væl egnað til at loysa afturvendandi standard uppgávur sera effektivt
samanborið við, um eitt starvsfólk skal loysa eina tílíka uppgávu manuelt. Tað skuldi
tí verið møguligt at leysgivið starvsfólkaorku, sum antin kann verða spard burtur í
almenna rakstrinum ella flutt í annað starvspláss, sum vitlíki ikki fær loyst.
Starvsfólkatrotið er stórt og tí er neyðugt, at føroyska samfelagið áhaldandi verður
effektiviserað, soleiðis at vit eru kappingarfør og fáa veitt tær neyðugu
vælferðartænasturnar.
Á Løgtingi, 17. juni 2026
Steffan Klein Poulsen

-- 1 of 1 --