52-122/2025

M E N T A M Á L A R Á Ð I Ð
J.H. Schrøters gøta 7 • FO-100 Tórshavn • Tel: +298 306500 • mmr@mmr.fo
Løgtingið 23. juni 2026
Tinghúsvegur 1-3, Postboks 208 Mál: 22/22133-171
110 Tórshavn Viðgjørt: EK
Svar
upp á
skrivligan fyrispurning nr. 52-122/2025 eftir § 52a í Tingskipanini frá Liljan
Weihe, løgtingskvinnu, settur Bárði á Lakjuni, landsstýrismanni í
mentamálum, um Sernám og dagstovnaøkið.
Fyrispurningurin er soljóðandi:
1. Hvørja ávirkan fer samanleggingin av Sernámi og Undirvísingarstýrinum at hava á
dagstovnaøkið?
2. Hvussu verður tryggjað, at dagstovnar fáa skjóta, dygdargóða og atkomiliga
sernámsfrøðiliga ráðgeving?
3. Hvussu verður dagstovnaøkið formliga umboðað í nýggju bygnaðarligu skipanini?
4. Hvørjar ætlanir hevur landsstýrismaðurin um at styrkja fyribyrgjandi og inkluderandi
arbeiðið í dagstovnum?
5. Fer landsstýrismaðurin at taka stig til eina greiðari skipan fyri ábyrgdarbýti og samstarv
millum kommunur, dagstovnar, Sernám og landsmyndugleikar í sambandi við børn við
serligum tørvi?
Svar
Til 1: Málið við samanleggingini av Undirvísingarstýrinum og Sernámi er at tryggja størri
samanhang millum sernámsfrøðiliga virksemið og øll virkisøkini, sum Sernám veitir ráðgeving til.
Dagstovnarnir eru eitt av hesum økjunum.
Til 2: Í sambandi við bygnaðarligu umleggingarnar verður í løtuni arbeitt við fleiri
menningarátøkum, sum hava sum mál at tryggja, at tað er eitt gott samband millum virkisøkini og
Sernám. Dagstovnaøkið er við í hesum arbeiðinum og fer eisini at fáa gagn av hesum.
Til 3: Arbeitt verður við at styrkja formliga sambandið millum dagstovnaøkið og
útbúgvingarverkið við at ein menningareind er skipað í Námi og ein samstarvsnevnd verður sett
millum land og kommunur á dagstovnaøkinum. Nýggja bygnaðarliga skipanin fyri Sernámi er ikki
skipað við formligari umboðan fyri einstøku virkisøkini, men virksemið er skipað soleiðis at tað
røkkur øllum virkisøkjum.
Til 4: Arbeitt verður í løtuni við einum uppskoti til broyting av dagstovnalógini, har lagt verður
upp til at styrkja fyribyrgjandi og inkluderandi arbeiðið á dagstovnaøkinum. Sambært

-- 1 of 2 --

M E N T A M Á L A R Á Ð I Ð
J.H. Schrøters gøta 7 • FO-100 Tórshavn • Tel: +298 306500 • mmr@mmr.fo
2 av 2
uppskotinum skulu kommunurnar tryggja øllum dagstovnatilboðum atgongd til námsfrøðiliga
ráðgeving, sum fevnir um námsfrøðiliga vegleiðing, inklusjón og fyribyrgjandi tiltøk. Endamálið
við uppskotinum er at styrkja dagliga fakliga arbeiðið á dagstovnum og at tryggja, at børn við
avbjóðingum fáa stuðul so tíðliga sum gjørligt, áðrenn tørvur verður á meira víðfevndum
sernámsfrøðiligum ella tvørfakligum tiltøkum. Somuleiðis verður lagt upp til, at felags faklig
stevnumið, leiðbeining og karmar verða mentir fyri dagstovnaøkið.
Til 5: Í arbeiðinum við uppskotinum um broyting av dagstovnalógini verður lagt upp til eitt greitt
ábyrgdarbýti millum kommunur og land á dagstovnaøkinum. Sambært uppskotinum skulu
kommunurnar hava ábyrgd av námsfrøðiligu ráðgevingini, meðan landið skal veita
sernámsfrøðiliga ráðgeving, tá talan er um børn við serligum ella samansettum tørvi.
Harumframt verður lagt upp til, at landsstýrisfólkið fær heimild at áseta nærri reglur um
samskipan, samstarv, upplýsingargongd og ábyrgdarbýti millum námsfrøðiligu og
sernámsfrøðiligu ráðgevingina. Eisini verður skotið upp at skipa eina samstarvsnevnd fyri
dagstovnaøkið við umboðum fyri land og kommunur, og eitt fakligt Dagstovnaráð, sum skal
ráðgeva hesi samstarvsnevnd.
Vinarliga
Bárður á Lakjuni
landsstýrismaður

-- 2 of 2 --

Skrivligur fyrispurningur
eftir § 52a í Tingskipanini
Spyrjari: Liljan Weihe, løgtingskvinna
Svarari: Bárður á Lakjuni, landsstýrismaður í mentamálum
Evni: Sernám og dagstovnaøkið
Spurningar:
1. Hvørja ávirkan fer samanleggingin av Sernámi og Undirvísingarstýrinum at
hava á dagstovnaøkið?
2. Hvussu verður tryggjað, at dagstovnar fáa skjóta, dygdargóða og atkomiliga
sernámsfrøðiliga ráðgeving?
3. Hvussu verður dagstovnaøkið formliga umboðað í nýggju bygnaðarligu
skipanini?
4. Hvørjar ætlanir hevur landsstýrismaðurin um at styrkja fyribyrgjandi og
inkluderandi arbeiðið í dagstovnum?
5. Fer landsstýrismaðurin at taka stig til eina greiðari skipan fyri ábyrgdarbýti og
samstarv millum kommunur, dagstovnar, Sernám og landsmyndugleikar í
sambandi við børn við serligum tørvi?
Viðmerkingar:
Landsstýrismaðurin hevur boðað frá, at frá 1. juni í ár verður Sernám skipað sum ein
deild í Undirvísingarstýrinum. Sagt verður, at endamálið er at skapa størri samanhang
millum sernámsfrøðiliga virksemið og undirvísingarøkið sum heild.
Sernám arbeiðir tó ikki bert við børnum í skúlaaldri, men er landsumfatandi stovnur,
sum arbeiðir við børnum frá 0-18 ár. Tí er vert at hava í geyma, at hóast
dagstovnaøkið er kommunalt, so veitir Sernám eisini fakliga ráðgeving og stuðul til
børn í dagstovnaldri, har grundarlagið undir læring, menning og trivnaði hjá børnum
verður lagt.
Fyribyrging, inklusjón, skjót og góð ráðgeving og gott tvørfakligt samstarv hevur tí
alstóran týdning fyri børn – eisini, ella kanska serliga, áðrenn skúlaaldur.
Hóast dagstovnaøkið er kommunalt, so setur landið karmarnar fyri virksemið. Tað eru
tíverri javnan dømi um, at serliga børn við serligum tørvi detta niður ímillum skipanir
og ábyrgdarøkini hjá landi og kommunum.
Tí verður spurt um, hvussu hetta økið verður raðfest og tryggjað í nýggja bygnaðinum
hjá Sernámi undir Undirvísingarstýrinum, og hvussu samstarvið millum land og
kommunur verður skipað.
Á Løgtingi, 11. juni 2026
Liljan Weihe

-- 1 of 1 --