52-120/2025

M E N T A M Á L A R Á Ð I Ð
J.H. Schrøters gøta 7 • FO-100 Tórshavn • Tel: +298 306500 • mmr@mmr.fo
Løgtingið 16. juni 2026
Tinghúsvegur 1-3, Postboks 208 Mál: 22/22133-165
110 Tórshavn Viðgjørt: JK/OyS
Svar
upp á
skrivligan fyrispurning nr. 52-120/2025 eftir § 52a í Tingskipanini frá Eyðgunn Samuelsen,
løgtingskvinnu, settur Bárði á Lakjuni, landsstýrismanni í mentamálum, um Skúlan á
Trøðni.
Fyrispurningurin:
1. Hvat er status fyri arbeiðið við at lýsa námsfrøðiligu og fysisku karmarnar í skúlanum?
2. Er tíðar- og kostnaðarætlan gjørd um, hvussu ljóðviðurskiftini kunnu betrast?
3. Hvussu er ætlanin at arbeiða víðari við at dagføra námsfrøðiligu og fysisku karmarnar?
Svar
Til 1:. Landsverk hevur arbeitt við at eyðmerkja og lýsa tørvin á dagføringum av Skúlanum á
Trøðni, tó at tað ikki er gjørd nøkur beinleiðis tørvs- og funktiónslýsing av námsfrøðiligu og
fysisku kørmunum, sum varð umrødd í sambandi við fíggjarlógararbeiðið.
Skúlin á Trøðni er fevndur av bygningsviðlíkahaldinum hjá Landsverki, og ein røð av viðurskiftum
eru eyðmerkt farnu árini. Ymiskt av hesum er eisini gjørt. Eitt nú er reinsiskipanin til svimjihylin
skift, øll vindeygu og allar hurðar eru skift farnu fimm árini, og reinsiverkið er eisini skift. Av
øðrum týðandi dagføringum, sum eru fyri framman, eru klædningurin sum heild, úthang og
takrennir. Hetta er á skrá komandi árini. Tvær nýggjar lyftur eru eisini júst bílagdar til skúlan.
Sambært teimum upplýsingum, sum fyriliggja, er harumframt tørvur á at fáa bygningin dagførdan
við brunaávaringarskipan og persónstrygdarskipan. Hetta krevur serstaka játtan á fíggjarlógini.
Til 2: Landsverk hevur gjørt eina ítøkiliga ætlan um at betra um ljóðviðurskiftini í Skúlanum á
Trøðni. Ætlanin fevnir um dagføring av bæði loftum og gólvum.
Eftir at løgujáttan varð latin til endamálið, hava Landsverk og skúlin í felag raðfest at dagføra bæði
loft og gólv. Hetta merkir, at færri fermetrar verða dagførdir í fyrstu atløgu, men at arbeiðið í
teimum útvaldu økjunum gevur eina betri samlaða loysn fyri ljóðviðurskiftini. Raðfest hevur verið
at betra um ljóðviðurskiftini í felagsøkjum og økjum, sum frítíðarskúlin eisini nýtir.

-- 1 of 2 --

M E N T A M Á L A R Á Ð I Ð
J.H. Schrøters gøta 7 • FO-100 Tórshavn • Tel: +298 306500 • mmr@mmr.fo
2 av 2
Løgujáttanin í 2026 er 2,4 mió. kr., og hetta røkkur til at dagføra umleið ein triðing av
fermetrunum, grundað á tey tilboð, sum eru komin inn. Arbeiðið verður gjørt í summarfrítíðini,
soleiðis at tað í minst møguligan mun ávirkar skúlagongdina.
Loftsuppgávan fevnir um niðurhongt akustikkloft og nýggj ljós. Gólvuppgávan fevnir um at
eftirskrúva gólvini og leggja nýtt linoleum.
Landsverk umhugsar harumframt at raðfesta eina eyka upphædd í 2027 av
bygningsviðlíkahaldsjáttanini til framhaldandi akustikkdagføringar.
Til 3: Tørvs- og funktiónslýsingin, sum varð umrødd í sambandi við fíggjarlógararbeiðið,
fyriliggur ikki. Saman við viðkomandi pørtum skal greiða fáast á, um tørvur er á at gera hesa
lýsing, ella um vitanin sum Landsverk longu hevur til Skúlan á Trøðni er nøktandi grundarlag fyri
víðari arbeiðinum við at dagføra karmarnar.
Talan er um ein gamlan bygning, ið hýsir virksemið, sum er nógv broytt síðani skúlin var tikin í
brúk. Tí er allarhelst tørvur á at gera eina tørvs- og funktiónslýsing av kørmunum.
Vinarliga
Bárður á Lakjuni
landsstýrismaður

-- 2 of 2 --

Skrivligur fyrispurningur
eftir § 52a í Tingskipanini
Spyrjari: Eyðgunn Samuelsen, løgtingskvinna
Svarari: Bárður á Lakjuni, landsstýrismaður í mentamálum
Evni: Skúlin á Trøðni
Spurningar:
1. Hvat er status fyri arbeiðið við at lýsa námsfrøðiligu og fysisku karmarnar í
skúlanum ?
2. Er tíðar- og kostnaðarætlan gjørd um, hvussu ljóðviðurskiftini kunnu betrast ?
3. Hvussu er ætlanin at arbeiða víðari við at dagføra námsfrøðiligu og fysisku
karmarnar ?
Viðmerkingar:
Skúlin á Trøðni er ein gamal bygningur, nógv slit er, trupulleikar eru við
ljóðviðurskiftunum, og námsfrøðiligi tørvurin er nógv broyttur síðani 1975, tá ið
skúlin varð bygdur. Harumframt er talið á børnum í skúlanum nógv vaksið seinastu
árini. Løgtingsins umboðsmaður hevur í eftirlitsfrágreiðing frá november 2025 heitt á
skúlan á Trøðni um beinanvegin at taka stig til at kanna ljóðviðurskiftini í skúlanum
og gera eina ætlan um, hvussu hesi viðurskifti kundu betrast.
Umboðsmaðurin vísti á, at skúlin hýsir eitt nú næmingum, ið eru ljóðviðkvæmir og
verða ávirkaðir neiligt av vánaligum ljóðviðurskiftum. Ljóðviðurskifti eiga ikki at
vera ein forðing fyri, at næmingar fáa luttikið í felagstiltøkum í einum skúla. At talan
er um ein serskúla, ger støðuna bara enn meiri átrokandi.
Nakað av peningi er játtaður á fíggjarlógini 2026 til at byrja at bøta um
ljóðviðurskiftini.
Í desember 2025 varð upplýst, í samband við fíggjarlógararbeiðið, at skúlastjórin,
Landsverk og ein uttanhýsis ráðgevi vóru í gongd við at gera eina tørvs- og
funktiónslýsing av bygninginum, har bæði námsfrøðiligu og fysisku karmarnir verða
lýstir.
Fyri at fáa lýst hvussu støðan er í dag, og hvør framtíðarætlanin er viðvíkjandi
kørmunum í skúlanum verða hesir spurningar settir.
Á Løgtingi, 3. juni 2026
Eyðgunn Samuelsen

-- 1 of 1 --