52-112/2025

V I N N U M Á L A R Á Ð I Ð
M I N I S T R Y O F T R A D E A N D I N D U S T R Y
GONGIN 7 • FO-100 TÓRSHAVN •
TELEFON 30 66 00 • E-MAIL: VMR@VMR.FO
Løgtingið
Tinghúsvegur 1-3
Postboks 208
110 Tórshavn
Tórshavn, tann: 2. juni 2026
Mál.: 26/13085
Viðgjørt AE
Tygara skriv: 52-112/2025
Svar til skrivligan fyrispurning nr. 52-112/2025 frá Eiriki í Jákupsstovu, løgtingmanni, settur
landsstýrismanninum í vinnumálum, Jacob Vestergaard, um vegasambandið um
Haraldsund
Fyrispurningurin er soljóðandi:
1. Kann landsstýrismaðurin upplýsa, um nøkur verkætlan um vegasambandið um
Haraldssund fyriliggur hjá Landsverki, og hvat ein slík verkætlan er mett at kosta í dag?
2. Hevur landsstýrismaðurin ætlanir um at fremja eina slíka ætlan ella eina aðra møguliga betri
ætlan?
3. Um ja, hvør er tíðarætlanin hjá landsstýrinum um at fremja hesa ætlanina?
Svar til spurning 1
Landsverk hevur í fleiri ár havt eina verkætlan klára at bjóða út, sum er at dagføra byrgingina um
Haraldssund. Landverk metir framvegis, at verkætlanin eigur at verða raðfest. Málið hevur verið
viðgjørt politiskt fleiri ferðir, men higartil hevur tað ikki eydnast at fingið neyðugu játtanina til at
fremja verkætlanina.
Byrgingin um Haraldssund er umleið 350 m long og umleið 20 m breið omanfyri sjóvarmálan.
Størsta partin av teininum er farbreytin ikki nóg breið til, at tvey akfør kunnu møtast. Tí eru
møtipláss gjørd á ávísum støðum.
Verkætlanin fevnir um ein veg við tveimum farbreytum og einari gongu/súkklubreyt, gøtuljós
verða sett upp, og verjugrótið á norðaru síðu verður hækkað við umleið einum metri fyri at verja
ímóti sjóroki. Vegurin verður lagdur soleiðis, at hann verður ein natúrligur partur av vegunum
báðumegin byrgingina. Vegurin á byrgingini fer at liggja sum ein bogi, ið bindur vegirnar á báðum
síðum saman.
Sambært verkætlanini er einans tørvur á heilt stórum dekkgróti afturat tilfarinum, sum longu er í
byrgingini, og sum verður endurnýtt.
Landsverk mælir til, at aldusimuleringar verða gjørdar, áðrenn farið verður undir verkætlanina fyri
at tryggja, at byrgingin er nóg høg.
Landsverk metir, at dagførda byrgingin kostar einar 72 mió. kr. Við í kostnaðarmetingini er eitt
váðaískoyti upp á 30%.

-- 1 of 2 --

V I N N U M Á L A R Á Ð I Ð
Svar til spurning 2 og 3
Ferðsluviðurskiftini um Haraldssund skulu vera í lagi. Við verkætlanini verður byrgingin dagførd,
soleiðis at hon verður tíðarhóskandi og lýkur dagsins krøv til eina slíka farleið.
Íløgukarmurin er avmarkaður, men vónandi ber til at raðfesta verkætlanina.
Jacob Vestergaard
landsstýrismaður

-- 2 of 2 --

Skrivligur fyrispurningur
eftir § 52a í Tingskipanini
Spyrjari: Eirikur í Jákupsstovu, løgtingsmaður
Svarari: Jacob Vestergaard, landsstýrismaður í vinnumálum
Evni: Vegasambandið um Haraldssund
Spurningar:
1. Kann landsstýrismaðurin upplýsa, um nøkur verkætlan um vegasambandið um
Haraldssund fyriliggur hjá Landsverki, og hvat ein slík verkætlan er mett at
kosta í dag?
2. Hevur landsstýrismaðurin ætlanir um at fremja eina slíka ætlan ella eina aðra
møguliga betri ætlan?
3. Um ja, hvør er tíðarætlanin hjá landsstýrinum um at fremja hesa ætlanina?
Viðmerkingar:
Síðan 1986 hevur samlaða politiska skipanin ikki raðfest vegasambandið um
Haraldssund so mikið nógv, at verkætlanin nakrantíð er gjørd liðug.
Tað hava onkrar ætlanir verið um at gera byrgingina lidna, men tað er ongantíð komið
á mál.
Tíðliga í vár varð upplýst, at ein verkætlan er gjørd hjá Landsverki, og at tað kostar 45
milliónir krónur at gera hetta arbeiðið, sum ætlanin var at fáa við í løguætlanina fyri
komandi árini.
Tað má metast vera sera óheppið, at verkætlanin ongantíð er gjørd liðug, og at mann
nú kann hava eitt 40 ára hald fyri, at hetta ikki er gjørt.
Tí hesir spurningar til landsstýrismannin.
Á Løgtingi, 19. mai 2026,
Eirikur í Jákupsstovu

-- 1 of 1 --